Pwede bala gastuhan sang gobyerno ang pilgrimage sang isa ka relihiyon?

INDI ini pagpakalain sa aton mga utod nga Muslim. In fact, wala kita sing rason nga pakalainon ang mga Muslim kag ang iban sa lain nga pagtuo. Pareho kita nga mga Filipino kag handom ta ang kaayuhan sang tanan.

Isa pa, katapo ako sang isa ka daku nga fraternity sa pungsod nga may madamo nga brod kag sis nga Muslim diri sa pungsod kag bisan sa iban pa nga bahin sang kalibutan.

Apang may problema seguro ang pangabay sang sini lang ni Presidente Duterte para sa mga utod ta nga mga Muslim diri sa Filipinas.

Ginpangabay ni Presidente sa Commission on Audit nga i-reconsider, ukon tugtan, ang paggamit sang P5 ka milyon nga pondo para sa Marawi City housing project agud isaylo kag gamiton ini sa pilgrimage sa Mecca, nga Hajj kon tawgon sang mga utod naton nga mga Muslim.

***

Ang Hajj isa ka pagpanakayon sa Mecca, ang “holy land” sang mga Muslim, sa diin obligado ang mga Muslim nga makasarang sa pagduaw labi na gid sa panahon sang ika-12 nga Muslim lunar month.

***

Wala nagpahayag ang balita kon ngaa gin-disallow sang COA ining anay request ni Presidente Duterte nga gamiton ining P5 ka milyon sa pilgrimage sa Mecca sang mga utod ta nga mga Muslim, nga karon gina-request niya sa COA nga i-reconsider.

Wala man kita medyos nga mahibal-an kon ano ang rason sang COA sa pag-disallow sini.

Kon ang rason ugaling tungod indi puede ang paghatag sang P5 ka milyon para sa Hajj sa idalom sang “Separation of Church and State” nga probisyon sang aton Konstitusyon, gapati kita nga indi matuod ini puede i-reconsider pa sang COA.

Ang aton Konstitusyon nagasiling sa idalom sang Section 6 (Principles): “ The Separation of Church and State shall  be inviolable”.

Ining aton pagpati indi katulad sang mga pungsod sa idalom sang pagginahum theocracy, sa diin ang nagagahum sa gobyerno amo man ang mga pinuno sang simbahan. Makita naton ini nga pagginahum sa mga pungsod sang mga Muslim.

Kon ngaa indi naton masunod ining theocracy sa aton Demokrasya, ina tungod mismo sang sugo ni Jesukristo sa mga Kristiyano nga “ihatag sa Diyos ang sa Diyos kag kay Caesar ang kay Caesar”.

Ngaa, suliton naton, indi gid puede gamiton ining P5 ka milyon para sa pilgrimage sang mga Muslim?

Sa nasiling ta na, ang rason amo mismo ang ginsugo sang Konstitusyon nga may “Separation of Church and State”.

Of course, may pagpaathag man ini sa iban nga probisyon sang Konstitusyon nga nagatugot sang pagsimpon sang Simbahan kag Estado sa pila ka bagay.

Katulad sang pag-empleyo sang mga pari, pastor, mga imam kag iban pa nga ministro sang mga simbahan bilang chaplain ukon kasubong nga kategoriya sang pagpang-empleyo, nga kinahanglan man gani sang gobyerno nga nagapati sa Diyos.

Subong man ang pagsulod sa diin man nga eskwelahan regardless kon ano ang imo relihiyon. Nasulod seguro ini nga ideya sa “equal opportunity” nga probisyon sang Konstitusyon.

Nanotaran man naton nga ginatugot man gani sang gobyerno ang paggasto sa pag-repair sang mga daan nga mga simbahan sang nagakalain-lain nga relihiyon kag iban pa nga edificio religiosa nga nagapadumdumon sa aton sang mga importante nga mga hitabo sa kasaysayan sang mga pumuluyo sa kabug-usan.

Ginatugutan man nga makaboto ang mga pari, madre, pastor, iman kag iban pa nga mga lideres sang mga simbahan sa ila “right to suffrage”.

Ginpahanugutan man, paagi sa paghatag permiso, sa mga aktibidad sang mga simbahan, katulad sang prosesyon kag prayer rally, sa ila kinamatarong sa Freedom of Religion sa idalom man sang aton Konstitusyon.

In other words, kon ginapahanugot man lang sa kasuguan kag maka-benepisyo man lang ang tanan, nga abe indi.

Ugaling, kon ang mga Muslim lang ang pahanugutan sing bulig para sa ila pilgrimage kag indi ang iban, indi na ini puede.

Kon pahanugutan man lang ang paghatag sing galastuhon sa pilgrimage sang mga Muslim, dapat, para fair sa tanan, pahanugutan man ang paghatag galastuhon sa pilgrimage sang mga Kristiyano kag sang iban nga simbahan.

Pero, indi ini ayhan pagpahuyang sang “Freedom of Religion” kag sang kapagros sang Simbahan sa pagsimba sa Diyos? (w_mateojr@yahoo.com/PN)

LEAVE A REPLY

Please enter your comment!
Please enter your name here