Sabat ni Kap Ong sa mga road-clearing issues

TO BE fair kay Liga president Irene Ong, ginkuha gid naton ang iya panindugan sa isyu nga kuno nagapatumbaya siya kag ang pila ka mga kapitan sa pagpatuman sang 60-day public road-clearing order ni Presidente Duterte.

Ang deadline diri, nga ginapatuman sang Department of Interior and Local Government (DILG), matapos na gani sa Setyembre 30, ukon sa palaabuton nga Lunes!

Indi kuno mahangpan ni Kap Ong ang ining isyu sang pagpatumbaya nila sa Liga.

Sunu sa iya, wala rason nga magpatumbaya sila, labi na gid si Mayor Jerry Treñas. Nga daan kon indi nila matuman ang ining order ni Presidente Duterte magaatubang sila sing administrative case kag ma-suspende pa.

“Ti, luyag bala namon matabo ina sa amon? Indi, syempre! Ang matuod sina ginahimo gani namon ang tanan nga mapadasig ang pagtuman sining order ni Presidente. Ugaling may mga problema nga indi namon dale-dale masabat,” paathag niya.

Una na dira, sunu sa iya, may mga ahensya nga may una nga obligasyon agud mangguba sang mga illegal structures. Amo ina ang Task Force on Anti-Squatting and Illegal Structures. Ang problema sa illegal parking mauna man nga atubangon sang Public Safety and Transportation Management Office, ukon PSTMO.

“Natural mabulig kami sa ila diri sa amon barangay agud mapatuman ining 60-day road clearing. Pero indi kami makamatu-matu lang magpanguna tungod sa problema sang legalidad. Isalig pa namon ina sa PSTMO, sa DILG kag sa LTO,” siling niya.

Ugaling na sila kuno magmatu-matu kon mapat-ud na nila ang legalidad sang ila pagahimuon.

“Mabudlay na nga kami pa ang mabalikan,” paathag gani ni Kap Ong.

Man, isa ka problema da, siling niya, kay basi may mga structures nga nahamtang sa mga pribado nga duta nga indi dapat nila entrahan.

Kon parti naman sa illegal parking, dugang niya, dapat ubayan man sila sang PSTMO sa mga ordinansa sang siyudad sa kon ano ang pagpatuman sini.

“Gani, mahulat gid kami sa pagpamat-ud sining mga ahensya,” dugang ni Kap Ong.

Ang problema pa gani kay ang priority sang PSTMO amo ang pangguba sang illegal structures, gani indi sila dayon maubayan sang PSTMO sa problema sang illegal parking.

In fact, ang ordinansa nagalaygay pa gani kon ano ang ila himuon. Sunu sa Regulation Ordinance No. 2009-216, Article II. On-road Parking: “In any event of non-compliance, the respective Barangay Captains may refer matters to the TMEU (previous name of PSTMO) for proper disposition.”

Galaum si Kap Ong ugaling nga ma-meet gid nila ang deadline sa pagpasalig man sang PSTMO.

Mga 10 sang 180 ka barangay sang siyudad ang wala na lang  lubos makapatuman sang ila obligasyon, sunu kay Executive Assistant Boyet Rico.

Na-solbar naman ang problema sa dalan sa likud sang Iloilo provincial capitol. May sign na dira nga nagasiling “No Parking” kag “Clamping zone”.

Good luck for a job well-done!

***

PASIPLAT

Interesting Facts About West Visayas

By Atty. Rex S. Salvilla +

(President: Iloilo Historical Association and West Visayas Historical Research Foundation, Inc.)

Kilala nga mga Atleta sang Western Visayas – Part 2

(‘American Era Sports’, halin sa Book 7, pahina 9-10)

SANG 1934 Far Eastern Games, si Josefina Ruiz sang IIoilo City amo ang captain ball sang champion nga Filipino Women’s Volleball Team.

Sa swimming, si Cesar Montinola sang Iloilo City kag swimmer sang San Beda College, naglangoy sing 17 ka oras halin sa Parañaque tubtub Las Piñas. Siya man ang una nga recorded swimmer sang Iloilo Strait.

Sang 1941, si Sergeant Gonzalo Peñasales ang captain ball sang defending national champion Iloilo Selection Team sa national open sa basketball sa Manila.

Sang 1907, na-organisa ang Santa Barbara Golf and Country Club (karon Iloilo Golf and Country Club).

Ang una nga Filipino nga nakahimo sang hole-in-one amo si Mariano Cacho Sr., samtang si Miguel Sequito nagdaug bilang pangatlo sa world’s golf greats Norman Nida kag Larry Montes sang 1937.

Sa Rifle and Pistol Marksmanship, ang mag-asawa nga Mariano Nava kag Enriqueta Ledesma sang Iloilo Rifle Club nanguna sa Wimbledon Course (1,000 yards).

Sa basketball, si Amador Obordo sang Mambusao, Capiz amo ang una nga West Visayan Basketball Olympic player. Naghampang siya sa 1935 Berlin Olympic Games sa Philippine team sa idalom ni captain ball Ambrosio Padilla./PN

LEAVE A REPLY

Please enter your comment!
Please enter your name here