Sin-o ang manugdaug?

LABI na gid nagainit ang kampanyahanay sa paghilapit na gid sang May 9, 2022 nga eleksyon.

Ginapahambog na gani sang isa ka kasumpong ni VP Leni Robredo nga segurado na ang ila kadalag-an. Aba, kag nagapanghanda na gani ini agud bantayan ang kuno pagpangdaya sang kasumpong.

Pero ano gid ang kamatuoran? Ang kamatuoran amo nga madasig na nagakarugon ang abanse ni Marcos Jr. sa ila mismo survey. Bisan gani sa iya probinsya nga Ilocos Norte nagasinggitan na ang madamo sing “Wala sing Solid North!”

Kon parti basi madayaan siya, basi siya pa ang mangdaya! Indi pa malipat ang aton mga pumuluyo kon paano ang amay ni Marcos Jr. nga si Diktador Makoy ginpilit gid nga magdaug sa Snap Election sadtong 1986.

Kontrolado niya ang Comelec, gani sang amat-amat na mag-abanse si Cory samtang nagapatapos na ang inisipay hinali lang nag-brownout. Sang magbalik ang kuryente, ano nga milagro kay abanse na si Diktador Makoy!

Wala ini maluyagi sang mga election canvasser kag nag-walkout sila. Wala man ini naluyagan nanday sadto Chief Constabulary Fidel Ramos kag Defense Secretary Juan Ponce Enrile kag nag-deklarar na sang ila pagbulag sa liderato ni Diktador Makoy.

Gin-ugyunan ini ni Cardinal Sin. Nagpanawagan gid gani ini nga proteksyunan ang duha. Dayon man gin-updan ini sang minilyon nga mga pumuluyo nga nagtipon sa palibut sang Camp Crame kon diin nagapanago ang duha.

Gin-updan man ini sang mga loyal sa ila sa Air Force nga nagpamahog na sa Malakanyang. Kag nagtuhaw ang Edsa Revolution, nga nagpalayas na sa pamilya ni Diktador Makoy sa Hawaii sadtong Pebrero 25, 1986.

In other words, basi sila pa gani ang nagaplano sing dinayaay sa May 2022 Election. Kag basi liwat magtuhaw ang Edsa Revolution sang 1986, pareho sang ginakahangaw-an sang isa ka tumalambong sa isa ka forum sang mga nagadalagan Presidente.

***

Okey, nagapanguna si Marcos Jr. sa ila survey nga may 2,000 lang ka respondents halin sa mga 65 ka milyon nga botante para sa ining eleksyon sa Mayo.

Gin-ako nila ugaling nga madamo nga sektor ang wala nasakop sang ila pag-survey. Gani indi masiling nga “representative” gid ini sang kabug-usan, luas pa sa kadiutay sang mga respondent sini.

In fact, wala sing poll survey, bisan pa ang bantugon nga Gallup Polls, nga makapakot gid kon sin-o ang madaug tubtub matabo na ang eleksyon. Nagdaug presidente si Truman sang Estados Unidos bisan pierde sa survey. Subong man si Obama kag Trump. Indi bala?

Samtang, sa iban nga survey nagapanguna naman si VP Robredo. Lakip diri ang survey sang Manila Bulletin, CEAP, kag Veritas Truth Survey.

Sa pagpanalawsaw sang Veritas Truth Survey, napulo kag isa (11) ka rehiyon gid ang naghatag sing pinakataas nga boto sa kay VP Robredo. Apat lang ang kay Marcos Jr. – ang Central Visayas, Northern Mindanao,Davao, Soccksargen, kag Caraga.

Nanguna si VP Robredo sa Region I – Ilocos Region; Region II – Cagayan Valley; Region III – Central Luzon; Region IVA – CALABARZON; Region IV-B – MIMAROPA Region; Region V – Bicol Region; Region VI – Western Visayas; Region VIII – Eastern Visayas; Region IX – Zamboanga Peninsula; NCR – National Capital Region; kag CAR – Cordillera Administrative Region.

Samtang sige man ang pag-endorso kay VP Robredo sang mga “influencers” kag talahaon nga mga personalidad. Lakip diri ang mga dean kag propesor sa law, mga ekonomista, mga health frontliners, sector religiosa Kristiyano kag Muslim, grupo sang mga youth, nagapanguna nga mga entertainer, mga retirado nga AFP Chief of Staff, kag madamo nga grupo sang mga workers kag mangunguma. 

 Mapamatud-an man ini sang dalagku nga rally sang Leni-Kiko tandem nga wala makita sa mga rally sang BBM-Sara tandem. May mga rally man gani sang mga OFW para sa Leni-Kiko tandem sa madamo nga bahin sang kalibutan. Madamo naman ang nagtipyok na sa Leni-kiko  tandem, lakip na ang isa ka grupo sang Partido Federal ng Pilipinas ni Marcos Jr. mismo.

Madugang ta pa dira ang mga ginikanan nga nagapanugyan gid sa ila mga kabataan nga indi magpa-intu sa mga kandidato nga corrupt kag abusado.

Labi na gid ang wala nagabayad sing income tax, wala nagabayad sang ila P203 ka bilyon nga estate tax, kag ginadayaw pa ang rehimen martial law ni Diktador Makoy nga madamo ang ginpang-torture kag pinamatay nga wala matagaan hustisya.

Ti, diin da madaug si Marcos Jr.?/PN