Syudad sang ILOILO – Makaluluoy ang nadangtan sang 19-anyos nga dalaga matapos nga nakabunggo ang ginasakyan niya nga sports car sa center island sa Barangay Dungon D, Jaro pasado alas-10 sang gab-i sang Sabado.
Gindeklarar nga dead-on-arrival sa Qualimed Hospital sa distrito sang Mandurriao ang biktima nga nakilala kay Chester Lane Go, residente sang Brgy. Sta. Filomena, Arevalo nga nakaagom sang patal nga pilas sa ulo kag iban pa nga bahin sang iya lawas.
Base sa rekord sang Traffic Investigation and Enforcement Unit sang Jaro, sakay ang biktima sa Hyundai Genesis Coupe nga may plate number TQH 866 kag ginamaneho ni John Trevor Galindez, 20, nga residente sang Savannah Subdivision, Oton, Iloilo.
Nag-gwa man sa inisyal nga imbestigasyon nga halin sanday Go kag Galindez sa Brgy. Taft North, Mandurriao kag mapadulong na kontani sa Brgy. Ungka, Jaro sang nagluntad ang aksidente.
Ginapatihan nga nadulaan sang kontrol si Galindez sa iya manibela rason nga nagdiretso sa center island, nagbunggo sa poste sang koryente kag palma kag nagbaliskad padulong sa pihak nga bahin sang dalan.
Ginsundan pa gid ini sang pagbunggo sini sa Isuzu Sportivo wagon nga may plate number UTO 293 nga ginamaneho ni John Castor, 43, residente sang Brgy. Housing, Mandurriao nga naga-usoy naman sang direksyon halin sa Ungka padulong sa Mandurriao.
Pero maswerte nga wala natam-an si Galindez nga nakaagom lang sang minor nga mga samad sa kamot kag ulo.
Bangod naman sang nadangtan ni Go, kinahanglan pa sang mga tinawo sang Bureau of Fire Protection – Iloilo City nga utdon paagi sa paglagari ang atop kag puertahan sang sports car para makuha lamang ini sa sulod sang salakyan.
“Ang passenger side sang sports car badly affected gid. We need (to cut) the ceiling kag dingding sang sports car kay ang gupi niya pasulod, so naipit si Chester Lane Go. In fact, pag-abot namon nagapilo ang lawas niya. Ang ulo niya nagatandog na sa iya tiil,” saysay ni city fire marshall Superintendent Jerry Candido.
Sang ginsekyar man nila ang pulso kag ginhawa ni Go, negatibo na ini.
“Every time nga i-pump mo iya (Go) dughan, naga-gwa ang dugo sa ilong niya,” dugang ni Candido.
Nadiskubrehan man nga wala naka-presentar si Galindez sang iya driver’s license sang ginpangitaan ini sang mga otoridad./PB
