ISA SANG maayo nga proyekto sang Iloilo City Hall Press Corps amo ang paghiwat sang Christmas Party upod sa mga women inmates sa ila dormitoryo sa compound sang Iloilo City Police Office sa atubangan sang University of San Agustin sa General Luna Street, City Proper.
Ginahiwat namon ini kada tuig sa sulod na sang madamo nga tinuig. Sa masami ginahiwat namon ini sa katapusan nga semana sang Disyembre. Sa karon nga tuig, ginaplano ini nga hiwaton sa Disyembre 27.
Makabulusog sa tagipusuon ang makita ining utod naton nga mga women inmate nga malipayon sa sining kahiwatan nga Christmas Party upod sa mga myembro sang Iloilo City Hall Press Corps nga wala sing dapat kahadlokan sa ila.
Sa sini nga Christmas Party, may pakaon kag kalingawan sa pagkanta kag pa-contest sang mga hampang nga may premyo sa mga magadaug, nga halin sa mga amot sang pila ka maalwan ng mga sponsor.
Ang luyag pa mag-amot sa paghatag sing regalo sa ining mga women inmate pwede makakari lang sa media lounge, 3rd floor, Iloilo City Building. May magabaton dira nga mga myembro sang ICHPC sang inyo kaalwan para sa ila.
Ginapauna na namon ang pagpasalamat gid sa inyo kon ano man ang mahatag ninyo. Segurado makabulig ini sing dugang nga kalipayan sa sining mga women inmate bisan paano kag sa ila handom magbalik sing mas madale sa sosyedad sa gwa.
***
Wala namon ginahambal nga kami sa ICHPC mas limpyo gid sangsa ila, ugaling lang kay yara sila sa sulod samtang yari kami sa gwa.
Tungod gani yara kami sa gwa, nangin oportunidad namon ini nga makadala sang ispiritu sang Paskwa sa ila nga yara sa sulod agud mapabatyag sa ila ang gugma sang Diyos bisan pa sa sining tion lang sang Paskwa.
Importante man nga sa bisan ini lang nga kahigayunan sa Paskwa mapabatyag namon sa ila ang pagka-malahalon sang pagbag-o kag maghandom sa mabungahon nga pagbalik sa ila pamilya sa gwa sa mas malip-ut nga tion tungod sa “good behavior” sa sulod.
***
Sa ining kahiwatan upod sa mga women inmate, syempre dala man namon ang mensahe sang Paskwa sa ila, bisan sa pahiwatig lang, sang mga tinugyanan man ni Kristo, katulad ni Saint Luke (15:2) halin sa parable ni Heskristo, sa diin ang mga tax colectors kag mga “sinners” nagtipon sa pagpamati kay Kristo.
Wala maluyagi ini sang mga Pharisees kag scribes, nga nagapanguna sa katilingban sang mga Hudeo sadto.
Ngaa kuno ginabaton ni Kristo sa iya palibut ang mga tax colloectors kag “sinners”, kag nagaupod pa sa pagkaon sa iya (nga matarong)?
Siling ni Kristo, “Sin-o sa inyo, nga may isa ka gatos nga tupa (sheep), nga kon madulaan sing isa indi pagbayaan anay ang 99 agud pangitaon ang isa nga nadula? Indi bala daku man naton nga kalipay nga makita ini kag ikalipay bisan pa gani sa mga kasilingan?”
Siling ko sa inyo: “Mas daku ang kalipay sang kalangitan nga magbalik sa sabak sang Amay ang isa nga naghinulsol sangsa 99 nga mga matarong nga wala kinahanglan sing paghinulsol.”
Dugang pa ni St. Matthew: “In the same way your Father in heaven is not willing that any of these little ones should perish.”
Sa aton pa: “Katulad man sa sining maalaga nga shepherd, ang aton Amay sa Langit indi man magtugot nga bisan isa sa ila nga mga tupa ang mapulak.”
Sa sining pahayag ni Saint Matthew, ginatumod man niya ang “little ones” sa mga pumuluyo nga wala sing “claim to power and influence”, ukon ang mga kubos kag wala sing tingog sa sosyedad tungod masami “taken for granted” lang ang ila kinamatarong.
“See that you do not despise one of these little ones, for I say to you that their angels in heaven continually see the face of My Father who is in heaven,” siling pa ni Saint Matthew.
Sa aton pa, “Indi gid ninyo pagpabay-i ang mga kubos, kay indi luyag pabay-an ninyo ini sila sang Amay sa langit.”
Sa liwat, MERRY CHRISTMAS & A HAPPY NEW YEAR! (w_mateojr@yahoo.com/PN)
