Trahedya sa pagdaug sing daku sa lotto

SAMTANG halos imposible ang pagdaug sa lottery, katulad sang PCSO lotto, madamo gihapon ang nagataya diri sa ila handom nga magdaug sang minilyon nga jackpot.

Sunu sa Lottery.co.uk, ang odds (oportunidad) sa pagdaug sa lotto, nga may anom ka numero, ang pilian amo ang 1 sa 45,O57,474 nga kahigayunan. Susmariosep, daw imposible matuod ang pagdaug diri!

Mabaskug ugaling ang handom sang tawo nga makaigu sang minilyon, labi na gid ang mga imol nga nagapati nga “kon kis-a ang lagpat makaigu man”. Tutal kaya man nila ang P20 nga taya, hambalon pa. “May pag-asa mientras gakabuhi,” dugang pa gani sang isa ka obrero.

***

Sadtong Setyembre 30, 2018, ginbalita nga wala gihapon madaug ang jackpot sa Ultra Lotto 6/58 (kumbinasyon sang anom ka numero kuha sa 1 tubtub 58) nga naglab-ut na sa P809 ka milyon.

Tungod sini, ginbalita man ang pag-dinagoso sang nagapataya agud madaug ining daku nga jackpot. Ining 6/58 jackpot magataas pa kon indi pa gid madaug. Man kon mas gadugang ang pataya, gadugang man ang balor sang jackpot.

Ako ya, ugaling, indi na ma-excite sa handom nga dag-on ang nagadaku nga lotto jackpot, ukon ano pa nga pasugal. Man, wala na ako ya nagasugal.

Nadudla na ako sang masami ko nga pagpamierde sa sugal. Sa pensar ko sadto mapa-enjoy lang ako sang sugal – sang bisan ano lang nga sugal. Gali halit lang ini sa akon pangabuhi.

Salamat man sa karon kay ang napangasawa ko wala nagasugal. Wala man nagasugal ang amon mga kabataan tungod seguro kay wala man nila kami nakita nga nagasugal.

Luas gali sa 6/58, ang iban nga padaug galakip sang 6/42 (42 ka numero), 6/45, 6/49 kag iban pa nga ang jackpot gabalor pataas kon gadiutay man ang numero nga pilian.

Of course, ang ano man nga himuon sang iban wala kita ya gapahilabot. Ila man ina ya kahilwayan.

Tani lang kon mag-entra sa sugal, kon indi gid malikawan,  ang ipusta amo lang ang puede malibre sa galastuhon (disposable income) sang panimalay agud indi man mag-problema ang pamilya sa ila mga kinahanglanon.

In fact, gataya pa man ako sa legal nga STL kon kis-a agud lang makabulig sa mga abyan nga masugata ko nga nagaalungay nga magtaya ako. Talagsa man lang, kag ang ginataya ko taas na gid ang singwenta pesos. Yawat pa ang gamay nga porsyento nga makadto sa ila.

***

Sa isa ka bahin, samtang nagahandom ang madamo sa pagdaug sang lotto jackpot, may kakulba man kita sa kon sin-o ang magadaug (kon wala pa madaug) sa sining P809 ka milyon nga 6/58 lotto jackpot kag sang kasubong kadaku nga lottery jackpot.

Nadumduman ko ang natabo sa isa ka nagdaug sang 6/42 jackpot sadtong 2002. Naglab-ut sa mga P19.6 ka milyon ang ining iya dinag-an.

Taxi driver lang ini nga wala sing nahibal-an kundi ang wala katapusan nga kapigaduhon tubtub nga nagdaug siya sining P19.6 ka milyon nga 6/42 lotto jackpot.

Ang ining nagdaug, si Arturo Eufemia, 58, ginkawatan kag gintiro patay sang pitu ka naga-maskara sa ila kaugalingon nga balay pagkatapos lang sang mga duha ka semana nga nahibal-an ang  iya pagdaug.

Ining natabo kay Eufemia natabo man sa pila ka nagdalaug sing daku sa lottery. Ang iban nga nagdalaug – mga 70 porsyento, sunu sa survey – naghinulsol man gani nga nagdaug sila tungod sa ila masubo nga nadangatan.

Por ejemplo lang, gin-kidnap kag ginpatay ang nagdaug sang $20 ka milyon sa Illinois, USA lottery sang mismo sister-in-law kag sang nobyo sini.

May nagdaug man sang $5.4 ka milyon sa New Jersey, USA.  Tinodohan niya ang iya pagsugal sa iya gindaug. Wala lang dugay “broke” na siya kag naga-istar na lang sa parke.

May nagdaug man sang 152,000 pounds (mga $5 ka milyon) sa Britanya sadtong 1961. Naghinala gasto siya tubtub indi na gani siya makabayad sang iya buhis kag naghinala sing pahubog nga daw wala na sing kapuslanan ang iya kabuhi.

Sa mga nakapulos sing husto sang ila minilyon nga dinag-an, tani sige lang ang inyo maayo nga swerte. Okey lang kami ya sa amon kubos apang malinong nga pagpangabuhi nga wala sing sugal. (w_mateojr@yahoo.com/PN)

LEAVE A REPLY

Please enter your comment!
Please enter your name here