NATAPOS na ang panahon sang kampanya, ang panahon sa pagkaway-kaway, pagyuhom-yuhom, kag pagbeso-beso sa mga pumuluyo sa bisan diin nga bahin sang probinsya.
Wala man ini nagakahulugan nga untaton naton ang maayo nga relasyon sa pumuluyo, ang punto lang naton nga hagan-haganon agud makatutok sa serbisyo nga ginpasalig nga ihatag sa mga pumuluyo.
Natapos na ang honeymoon period. Dapat ginapatudok na sa paminsaron kag balatyagon ang katungdanan nga dapat tutukan. Sa nakalipas nga lima ka bulan, dapat may ideya na kon ano ang katuyuan kon ngaa yara ka nagapangalagad sa sina nga talatapan, dapat kahibalo ka na kon ano ang imo dapat buhaton agud nga mabatyagan sang mga empleyado sa opisina kag pumuluyo sa probinsya ang sahi sang imo pagserbisyo.
Gintumod naton diri si Vice Governor Nathalie Ann Debuque. Dapat nagapanalunton na sa iya paminsaron kag balatyagon ang kahulugan sang iya posisyon, kon ano ang trabaho sang isa ka bise gobernador sang probinsya sang Iloilo.
Ginatalakay naton ini tungod masami naton siya nga makita sa halos tanan nga okasyon sa probinsya sang Iloilo. Masami man siya nga yara sa talatapan sang gobernador.
Manami lantawon ang hugot kag manami nga relasyon nga nagapatunga sa duha ka lider sang probinsya. Apang, dapat may kinaiya kag pinasahi nga personalidad ang bise gobernador nga indi lang daw kaangay nga landong sang gobernador.
Dapat kahibalo siya maghatag sang prayoridad sa mga bagay nga dapat unahon. Dapat mahibalo magbalibad sa isa ka pangabay agud nga ang dapat tutukan nga bagay indi magsakripisyo.
Posible nga naga-adjust pa siya, pero dapat subong nakamarasmas na.
Madamo sang mga empleyado ang nagabatyag tungod masami nga atrasado ang ila sweldo bangud nga atrsado man ang pagsulod sang ila mga dokumento, bangud atrasado man nga mapirmahan kag mapasulod ang mga papeles.
Naglanog ang balita sa radyo nga naatrasar ang sweldo sang mga empleyado sa Sangguniang Panlalawigan. Suno sa report, ang may kakulangan nga nagtuga sang huol yara mismo sa Office of the Vice Governor.
Ang mga empleyado nagasalig sa ila sweldo. Kon maatrasar, apektado ang ila pagkaon, plete, kag iban pa nga galastuhan. Wala problema kon ang empleyado may negosyo, may sarang sa pangabuhi, kon may pondo nga makuhaan, apang indi tanan nga empleyado may iban nga palamugnan.
Nagakaguba ang empleyado sa ila mga gintug-anan. Nagasakit ang ila dughan nga mahabuyan sang sugilanon sa rason nga wala nila natuman ang ila gintug-an nga indi man sila ang may kahimuan kon ngaa wala sila naswelduhan.
Indi ini mabatyagan sang iban, ilabi na sang mga opisyales nga wala nagasalig sa ila sweldo bangud may negosyo. Indi ini mabatyagan sang mga wala nakaagi sa kapigaduhon kag tuman nga pangabudlay.
Paano ang may ginagatas? Paano ang may ginapa-eskwela nga nagakinahanglan sang matag-adlaw nga balon kag plete? Paano ang may ginabayran nga loan ukon utang? Naobrahan na ina nila. Dapat maswelduhan sila sa husto nga tion agud nga indi madugangan ang ila mga palaligban sa pangabuhi.
Tion na nga magtutok sa trabaho bilang bise gobernador. Dapat dumalahan sing maayo ang talatapan. Ipasiguro nga masulhay ang lakat sang mga papeles kag dapat wala sang mabihangan agud nga wala sang may matuga nga huol sa palaabuton.
Magtrabaho sing malinong kag madalom agud may yara sang matigayon. Anhon mo ang magansal kag nagakinaburigal kon sa pag-abot sang kasisidmon wala sang produksyon.
Isa pa sa punto nga dapat mag-ulikid sa mga empleyado amo ang pagbutang sang limitasyon sa kalawigon sang deliberasyon sa tion sang sesyon.
Dapat bana-banaon ang kadamuon sang angay nga talakayon nga makasibu lang sa husto nga oras agud makapauli man ang mga empleyado. May nagahulat nga kabataan, mga estudyante, kag pamilya sa ila nga pagpauli. Kon maatrasar, nagatuga ini sang pagkatublag kag kahangawa.
Kon indi man lang importante, ukon prayoridad, kag mahimo nga ipaiway para matalakay masunod nga sesyon, ngaa kinahanglan apurahon?
Kinahanglan diri ang husto nga pagdumala sa oras. Mas produktibo kon kalagingon ang trabaho sibu sa natalana nga panahon kaysa sa dagun-dagunon nga nagaresulta sa madamo nga kapaltahan.
Kalabanan sa mga katapo sang provincial board mga gung-an na kag kahibalo na sang dalagan sang ila trabaho. Kahibalo na sila kon ano ang dapat unahon kag dapat ipangibabaw labaw sa tanan nga ginatalakay. Ginapasulabi na nila ang mga bagay nga nagakihanglan aktuhan gilayon.
Wala kita sang malain nga tinutuyo sa pagtalakay sini. Luyag lang naton nga magpahanumdom. Basi nabuyo lang ang bise gobernadora kag angay lang nga kuhiton agud nga ipahanumdom ang mga bagay nga dapat hatagan sang atensyon.
Kinahanglan lang siguro ang gamay nga adjustment ukon re-assessment sa mga matag-adlaw nga ginabuhat agud nga mas mahatagan prayoridad ang husto kag angay nga pag-ulikid sa mga empleyado. (bertladera@gmail.com/PN)
