NAG-ABOT na ang adlaw nga ginahulat sang tanan. Mas makahulugan ang tagsa ka paglanog sang tambor nga mabatian. Mas maduagon ang mga hitabu nga makita sa tagsa ka bahin sang syudad sang Iloilo. Puno sang kalipay ang makita sa nawong sang tagsa ka nagapakigbahin sa selebrasyon.
Matuod nga ginlipasan na sang panahon ang pagselebrar sang Dinagyang Festival, pila ka dinag-on na ang naglabay, pila na ka tawo ang nagpakigbahin, pila na ka tagpamuno ang nagdumala, kag pila na ka opisyal sang banwa ang nagtindog kag nagpanambiton sang iya deklarasyon nga buksan ang kompetisyon.
Ginasiling nga ang pinakamatam-is nga vino ang gikan sa ubas nga ginligis sang lubos, gindugmok, ginpuga kag ginlipasan sang angay nga panahon. Nagtuyom ang sabor, mas makagalanyat, kag ginabalik-balikan sang nakatilaw na sang iya kasadya.
Nag-umpisa sa simple nga kahiwatan, ginlamudan sang duag, kapagsik kag pagpasidungog sa Señor Santo Niño. Ginhangkat sang panahon, naghimalas tubtub nga nagdaku kag ginkilala sa bug-os nga kalibutan.
Nagtipon ang pila ka tawo kag nagpanguna sa hilikuton, nakaganyat sa iban kag nagsangkad ang partisipasyon, tubtub nga may napasad nga grupo nga nagdumala nga padakuon pa ang selebrasyon. Ginbun-ag ang Iloilo Dinagyang Foundation Inc. Nga nag-uyat sa kahiwatan sa pila ka tuig, ginpa-inggat ang duag paagi sa mga bag-o nga ideya kag mas ginduso nga makilala ang Dinagyang.
Gikan sa tinuig nga naandan nga pagdumala sang IDFI, ginlahugan sang dogsing sang pulitika tubtub nga ginwahig kag ginbuslan sang Iloilo Festivals Foundation Inc.
Nagpasalig ang IFFI nga ila himuon nga Dinagyang 360 ang kahiwatan ukon makita ang manami nga performance sang kada tribu nga nagapasakop sa tanan nga anggulo, sa simple nga pulong, bisan diin lantawon imo makita ang katahum.
Madamo na sang nasulat tuhoy sa maragtas sang Dinagyang, gikan sa iya pagbun-ag tubtub sa karon nga pasundayag.
Apang, mas ginalauman karon ang pasalig sang IFFI nga mangin tuhay ang selebrasyon paagi sa ila pagdumala. May yara sila sang ginahikot nga bag-o nga ideya, may mga pagligwat nga tuhay sa mga naandan na. Labaw sa tanan, mangin pinasahi ang ini nga kahiwatan sang Dinagyang ipaanggid sa nagliligad nga mga tinuig.
Matuod nga daan ang ngalan nga Dinagyang apang madamo sang bag-o nga panan-awan ang mahimo makita kon himakasan. Dapat magpabilin ang kinaiya sang Dinagyang sa tunga sang moderno nga konsepto, sa luyo sang nagabag-o nga mga padugi sang selebrasyon kag sa ibabaw sang tanan nga selebrasyon sa bug-os nga pungsod kag kalibutan.
Kaangay ini sang isa ka tawo nga ang integridad nagapabilin sa iya kaugalingon bisan pa nga makapila ka beses nga pasul-uban sang magkatuhay nga panapot.
Dapat indi magligwat ang esensya sang Dinagyang sa iya katuyuan kag sa motibo sang pagpasad sini sadto, diri dapat naka-angkla ang tanan nga hilikuton agud nga indi kita magtalang sa aton direksyon.
Pasulabihon naton ang selebrasyon sang mga Ilonggo, labaw sa interes sang negosyo kag sa dungog sang pulitiko.
Gintilawan na sang panahon ang Dinagyang, pila na ka administrasyon ang nagbulos-bulos sa pwesto, pila na ka tawo ang nagbulos-bulos sa pagdumala apang ang ngalan nga Dinagyang nagapabilin nga hilway sa mantsa.
Daan nga ngalan sa bag-o nga panan-awan nga ang katuyuan mapreserbar ang pinasahi nga selebrasyon, ang pagtuo, kag ang paghiliusa sang tagsa ka Ilonggo. (bertladera@gmail.com/PN)
