NAGBIYA lang sa iya pwesto si Col. Martin Defensor Jr. apang bisan isa ka kaso sang riding in-tandem wala gid sang may nasolbar.
Padayon ang pagsinggitan nga nagapangayo sang hustisya ang mga himata nga nalisdan. Naalimunaw ang ila paglaum sa kamot ni Defensor. Napanas ang paghandom nga maagom ang hustisya.
Nag-umpisa sa pagpangalagad bilang Iloilo City Police Office si Colonel Martin Defensor Jr. sadtong Setyembre 12, 2018 kag nagbiya sadtong Pebrero 20, 2020. Sa tunga sang isa ka tuig kag pito ka bulan, wala gid sang bisan garhum lang sang hustisya sa bisan isa lang ka kaso ang nahatagan sang kasanagan.
Mahina sa pagsolbar sang mga kaso nga may kahimuan ang mga riding in-tandem suspect si Defensor. Mas ginapabugal niya ang 5,714 ka tawo nga nadakpan nga nakalapas sa anti-smoking law. Ginpabugal man sini ang paghiwat sang ICPO sang 177 ka operations, nakatikma sang 153 ka illegal drug personalities kag 61 sa 180 ka mga barangay sa syudad ang na drug-cleared.
Maathag nga wala siya sang ibungat kag ipabugal nga may nasolbar siya nga bisan isa ka kaso sa 14 ka mga kaso nga iya ginapungkuan, apat diri ang natabu sa panahon sang iya ginbuslan nga si Police Colonel Henry Biñas nga amo karon ang director sang Bacolod City Police Office, samtang ang 10 ka kaso ang natabu sa iya nga panahon.
Una na naton siya nga ginsukot sa iya pasalig sadto nga iya tutukan kag solbaron ang ini nga mga kaso sang pagpamatay. Sadtong Marso 10, 2019, ginpahanumdom naton sa iya ang iya katungdanan kag ginpasalig sa aton paagi man sa sini nga kolum nga may tig-ulo “Ang pasalig ni Defensor”. (https://www.panaynews.net/ang-pasalig-ni-defensor/)
Ginplastar naton ang mga kaso nga dapat tutukan kag hatagan sang solusyon, ginalakipan ini sang mga masunod: (Sa panahon ni Police Colonel Henry Biñas)
* Hulyo 13, 2018 – Ranny Bibanco, 33-anyos, sang Trance Street, Barangay 2, Tigbauan, Iloilo nga ginluthang sa Iloilo Terminal Market
* Setyembre 7, 2018 – Don Azucena, 39-anyos, sang Barangay Calumpang, Molo nga ginluthang sa gwa sang ila balay
* Setyembre 7, 2018 – Rolando Puda, 41-anyos, sang Barangay Ingore, La Paz nga ginluthang malapit sa ila puluy-an
* Setyembre 11, 2018 – Gerardo Mamarion, 25-anyos, sang Barangay Tacas, Jaro nga ginluthang sa Zone 4, Barangay Ungka, Jaro.
(sa panahon na ni Police Colonel Martin Defensor Jr.)
* Oktubre 5, 2018 – Neil Resma, 38-anyos, sang Barangay Bakhaw, Mandurriao kag ginluthang sa Barangay Calubihan, Jaro
* Nobyembre 7, 2018 – Marvin Vasquez, 34-anyos, sang Zone 3, Barangay Bakhaw, Mandurriao ang ginluthang sa Barangay Taft North, Mandurriao.
* Nobyembre 19, 2018 – Retired Senior Police Officer II Rolando Alag, ginluthang sa Barangay Villa Anita, City Proper samtang nagamaneho sang iya puti nga van
* Nobyembre 24, 2018 – Nestor Piagola Jr., 33-anyos, sang Barangay Zamora-Melliza, Iloilo City nga ginluthang sa Rima-Rizal Street, Iloilo City.
(Naabtan lang tuig 2019, nadugangan pa gid ang mga kaso)
* March 2, 2019 – Lhuil Clemente, 40-anyos, sang Barangay East Baluarte, Molo, ginluthang sa Mabini Street, City Proper.
* May 21, 2019 – Tristan Zachary Eribal, 19-anyos, sang Barangay Caingin, La Paz, nga ginluthang kag ginbuno sa Barangay Balabago, Jaro.
* May 21, 2019 – Jimrod Eribal, 22-anyos, sang Barangay San Isidro, Jaro, nga ginluthang kag ginbuno sa Barangay Balabago, Jaro.
* June 8, 2019 – Allan Salario, 51-anyos, sang Barangay Calmay, Janiuay, Iloilo, nga napatay sa igo sang luthang sa ulo kag likod sa Metropolis Subdivision sa Barangay Tagbak, Jaro.
* Jan. 19, 2020 – Alain Muller, 42-anyos, sang Barangay Cuartero, Jaro, nga ginluthang sa gwa sang iya balay.
* Jan. 19, 2020 – Delfin Britanico sang Barangay Nabitasa, La Paz, nga ginluthang kag napatay.
Gin-aku sini ang kapaslawan nga masolbra ang kaso sang mga pagpamatay. Nabudlayan ang iya tinawo bangud tanan nga suspek nagapanabon sang ila guya agud indi makilala kag wala sang testigo nga nagapanugid.
Kaangay sa ginsulat naton sadtong Hunyo 6, 2019 sa sini man nga kolum nga may tig-ulo “Palusot nga imbestigasyon”. (https://www.panaynews.net/palusot-nga-imbestigasyon/), wala na sang lauman nga pagkasolbar sa sini nga mga kaso bangud may sabat kag rason na nga nahuman sa pinsar ni Defensor.
Nagbiya siya nga wala sang may ipabugal kag bitbit niya pakadto sa Campo Delgado ang iya kapaslawan. (bertladera@gmail.com/PN)
