NAGAHIMAKAS ang National Irrigation Administration (NIA) nga malagas ang husto nga panahon nga matapos ang konstruksyon sang Jalaur River Multipurpose Project II bisan pa nga nagaagwanta ang tanan sa huol nga ginatuga sang COVID-19 pandemic.
Sadtong Hulyo 25, nasugilanon ko si Engr. Gerardo Corsiga, ang regional manager sang NIA Region 6 kag concurrent project manager sang Jalaur River Multipurpose Project ukon JRMP II, nga nakalapaw na sila sa 25 percent nga completion target para sa bulan sang Hulyo ukon yara na sila karon sa 31 percent nga completion target ukon six percent na nga lapaw sa target.
Bisan pa nga yara sa pandemya, mabudlay ang paghulag sang tanan apang wala sila naga-untat sa pagtrabaho kag ila tuyo nga ipadayon ang positive accomplishment ukon tinguhaan nga matapos gilayon agud nga makaagom sang benepisyo ang mga pumuluyo.
Ginadalian nga matapos ang proyekto agud nga makabenepisyo na ang kadamuan sang mga pumuluyo. Dapat nga maaaguman na ang mainom nga tubig sa syudad kag katupad nga mga banwa, agud nga mapatubigan na ang 32,000 ka ektarya sa bug-os nga tuig kag agud nga madoble ang tubas sang mangunguma gikan sa 140 metric tons tubtub sa 300 metric tons.
Sa iya pag-update sa mga gina-obra nga bahin sang dam, ginpatpat sini nga halos katunga na sang catch dam sa Barangay Alibunan, Calinog ang nahuman kag target nga matapos sa bulan sang Agosto ukon Setyembre. Kapin naman sa 4 metros ang
kulang sa cofferdam sang high dam para sa pag-divert sang tubig padulong sa diversion tunnel, samtang madali na lang matapos ang afterbay dam kag kon kumpleto na, diretso na ang pag-divert sang tubig.
Sa liderato ni Engr. Corsiga, ginalantaw sang NIA Region 6 ang pandemya indi bilang negatibo, kundi positibo agud mapadasig ang paghuman sang proyekto kag agud makabulig sa mga mangunguma.
Ginakonsentrahan nila ang mga ulubrahon nga may daku nga impact sa proyekto kag nagapokus sa trabaho nga naka-confine sa isa ka lugar samtang nagasunod sa mga health protocols nga ginapatuman sang gobyerno.
Natalupangdan man sini nga nangin mas produktibo ang trabaho sang mga tawo bangud wala na masyado nagasugilanon bangud nagalikaw nga makalanton kag nagasunod sa social distancing bisan nagatrabaho rason nga madamo sang na-accomplish nga trabaho kag nagakonsentrar sila sa mga aktibidades nga equipment-based agud mas madasig ang ila pag-obra.
Bangud nga may limitasyon sa kadamuon sang mga trabahador kag agud matuman ang mga health protocol, sila ang mas naghatag sang igtalupangod sa mga trabaho nga indi tuman ka damo sang tawo ang kinahanglan kundi mga trabaho nga mas nagasandig sa kagamitan.
Gin-athag sini nga wala nagakahulugan nga magasandig na sila sa kagamitan kag indi sa trabahador, luyag lang nila mahibaluan sa sini nga mga ulubrahon kon diin kinahanglan ang trabahador agud nga mabuligan ang mga nawad-an sang trabaho nga makaobra sa sini nga proyekto.
Nagpalab-ot man sila sang kabalaka tuhoy sa nagakatabu nga illegal quarry operation bangud basi kulangon ukon magproblema sila sa mga quarry materials nga ila kinahanglanon sa paghuman sang proyekto.
Ginsiling sini nga mismo ang Sangguniang Panlalawigan nagalantaw man sa ginaobra nga Jalaur River Multipurpose Project II kag nagakabalaka man sa nagakatabu sa palibot.
Nagaresponder man sila gilayon kon makabaton sila sang impormasyon tuhoy sa illegal quarry operation sa palibot kag ila ginakwaan sang litrato ukon bidyo kag naga-obra sang report nga ginapadala sa provincial government agud nga maaktuhan.
Ginpatpat man sini nga may gina-ilog man sila nga sistema gikan sa South Korea nga ginapatuman sang mga Koreano batok sa paglaton sang COVID-19 samtang nagapadayon sa pagtrabaho sa proyekto.
Maathag nga indi dapat makapugong ang pandemya sa lakat sang proyekto, dapat padayon ang konstruksyon agud malab-ot ang target nga completion date. Samtang naga-obra, masami lang nga ipahanumdom sa mga nagatrabaho ang tuhoy sa COVID-19 agud nga indi sila malipat nga magsuksok sang facemask, face shield, kag pagtuman sa mga pagsulundan agud mapangapinan ang kaugalingon batok sa virus.
Madamo na sang mga nagahulat nga mahuman ang proyekto. May mga nakalinya na nga mga tubo sang tubig agud nga makakwa sang suplay kag agud madala sa ila tagsa ka processing plant agud mangin angay nga gamiton sa panimalay kag mainom sang mga gina-uhaw.
Nagahulat man ang mga subdivision nga daw mga uhong ang pagtuhaw sa palibot sang syudad sang Iloilo. Kangay man ang paghulat sang mga mangunguma nga luyag makabenepisyo para sa ila dagaya nga patubas.
Sa likod sang pandemya, wala untat ang trabaho sang NIA Region 6 sa pagpanguna ni Engr. Gerardo Corsiga ang regional manager sang National Irrigation Administration 6 kag concurrent project manager sang Jalaur River Multipurpose Project ukon JRMP II agud nga matapos sa husto nga panahon ang ini nga proyekto.(bertladera@gmail.com/PN)
