NAGA-umpisa na ang tuig 2021 kag posible may ginaplano na ang iban sa aton kon sa diin naman nga lugar magabisita ukon magalagaw bilang kabahin sang mangin bakasyon.
Mahimo nga maglagaw sa palibot lang sang Panay kag depende sa sitwasyon kon bala magpadayon ukon magtahaw na sa palaabuton ang palaligban tuhoy sa COVID-19 pandemic.
Kon sa diin man ang mangin direksyon sang bakasyon kag kon san-o ini natalana nga himuon, kabay nga ang plano madayon kag ang nagaplano mangin malipayon.
Daku nga bulig sa ekonomiya ang turismo sa isa ka lugar bangud nga ang kada bisita ang may dala nga kantidad nga ginatigana para sa iya mangin kagastuhanan kag makabulig sa mga negosyo sa palibot.
Magluwas sa pagpasanyog sa turismo sang isa ka lugar kag ang pagpapagsik sang ila ekonomiya, dapat naton hangpon nga ang pagbiyahe sing masami ang makahatag sang kalipay ukon seven percent happier.
Nabalhag sa journal sang Tourism Analysis, paagi sa bag-o nga pagtuon, nga ang nagabiyahe sing masami mas malipayon sa ila mga kabuhi kaysa sa mga tawo nga wala gid nagabiyahe.
Ginsiling ni Chun-Chu (Bamboo) Chen, ang assistant professor sa School of Hospitality Business Management sa Washington State University, nga naghiwat siya sang survey agud hibaluon kon ngaa may pila ka indibidwal nga nagabiyahe sing labaw kaysa sa iban kag kon ang pagbiyahe kag tourism experiences ang may malawig nga epekto sa kalipay kag maayon nga panimuot sang tawo.
Ang resulta sang pagtuon nagapakita nga ang mga indibidwal nga mas nagahatag sang atensyon sa tourism-related information kag masami nga nagatalakay sang ila travel plans kaupod sa ila mga abyan ang nagahatag sang katumanan sa ila regular nga mga bakasyon kaysa sa mga yadtong wala masami nagapaminsar tuhoy sa ila masunod nga padulungan.
Dugang diri, ang mga pumalasakop sa survey nga masami nagabiyahe sang kapin sa 75 milyas ang kalayuon gikan sa ila puluy-an ang nagsiling nga kapin sa seven percent sila nga mas malipayon sang ginpamangkot tuhoy sa ila over-all well-being kaysa sa mga yadtong talagsa lang ukon wala gid nagabiyahe.
Samtang amat-amat na nga magahalog ang travel restrictions bangud sa COVID-19 sa palaabuton, ang pagpanalawsaw may importante nga implikasyon para sa mga turista kag sa industriya sang turismo. Base sa resulta sang pagtuon, ginsiling ni Chen nga ang mga travel company, mga resort, kag bisan pa mga airline ang mahimo makalunsar sa social media sang kampanya, kaangay sa pagtuga sang hashtags tuhoy sa scientific benefits sang pagbakasyon, agud nga mapapagsik ang interest sang tawo sa pagtalakay sang ila mga opinyon tuhoy sa pagbiyahe.
Magabulig sing daku ang pagtuon, paagi sa pagpresentar sini sa mga tawo, kon ano ang benepisyo sang pagbiyahe. Agud nga mapanas ang pagpati nga ang pagbiyahe amo lang ang pagpadulong sa isa ka lugar kag bangud nga ang iban mahuyugon lang sa biyahe. Kon mahangpan sang tanan nga magluwas nga makakita sang bag-o nga mga lugar, may yara pa gid nga epekto sa over-all well-being sang tawo kag isa diri amo ang pagka-mangin malipayon.
Ginahatagan naton ini sang importansya bangud kahibalo kita nga madamo sa karon ang nagalantaw sa bag-o nila nga kalendaryo kag ginasid-ing diri ang mga petsa nga may malawig nga holiday ukon wala sang trabaho agud nga makapamentaha sa panahon nga makabakasyon sing malawig.
Luyag man naton nga mabuligan ang industriya sang turismo agud nga mabatak sila sa sitwasyon sang kapigaduhon sang negosyo. Madamo sa ila ang naga-antus kag halos nagapaminsar na nga magsarado sang temporaryo apang ginasustenir gid lamang agud nga indi mata-an sa epekto sang pandemya.
Ginapresentar man naton ang ideya nga may mga rason pa nga dapat tamdon sa pagbiyahe magluwas sa paglantaw lang sa mga manami nga lugar, kag agud nga mabuligan man ang kadamuan nga lubos nga apektado ang paminsaron kag emosyon bangud sa pandemya.
Kuntani mahatagan ini sang importansya kag mangin kabahin sang kampanya sang gobyerno kag mga yara sa industriya sang turismo agud nga mas makaganyat sa mga tawo nga magbiyahe liwat kag magpaliwa-liwa sa mga lugar nga manaya-naya.
Sa subong pa lang planuha na ang mangin masunod nga destinasyon agud nga mapainan mo na sang kantidad kag kon ano ang imo mga mangin aktibidades didto sa imo padulungan.
Indi magpakalumos sa trabaho bangud wala ka ginbun-ag agud nga magpakadena sa lamesa sang imo obra. Makita mo ang kwarta basta nagahimakas ka apang mabudlay pangitaon ang higayon para sa eksperyensya nga maagom lamang kon ikaw ang nagabakasyon ukon nagabiyahe. (bertladera@gmail.com/PN)
