Ano ka daku ang ‘Catholic vote’ agud magdaug?

GIN-KAAKIG sang mga LGBT ang panugdaon sang isa naton ka utod sa media nga si Boy Mejorada kontra sa ila. Si Boy isa ka blocktimer sa radyo.

Ang LGBT katilingban sang mga Lesbian, Gay, Bisexual, kag Transgender kag iban pa nga gender identities nga indi sakop sang mga Heterosexual.

Heterosexual ang isa ka tawo kon naluyag siya sa opposite, ukon tuhay, nga sex kag indi sa iya kapareho nga lalake ukon babaye.

Sunu kay Boy, ang mga LGBT vulnerable kuno sa korapsyon tungod may mga bisyo ini sila nga ginahimo agud lang ma-sustain ang pagkinahanglan sang ila mga partner.

Angot ining panugdaon ni Boy kay Von, nga staff ni Gob sa iya mismo upisina, nga kuno isa ka “alanganin” ukon  agi (daw indi man) nga duha kuno ang salakyan.

Gin-deny ini ni Von. Siling niya ang isa ka salakyan iya naangkon paagi sa isa ka “loan” sadtong 2011, samtang ang isa iya sang iya utod nga naga-ubra sa gwa (abroad).

Nangayo si Boy sing pasaylo sa pag-“generalize”, ukon pag-umid sang tanan sa ila sa iya akusasyon, apang daw indi gid mabaton ini sang mga LGBT kay nasaktan gid kuno sila sing daku.

Samtang, gin-“disown” man sang chief of staff ni Congressman Biron ang ining panugdaon kontra sa mga LGBT, kag nagsiling nga wala siya labot sa ining panugdaon ni Boy.

Tsk, tsk, tsk! Sa lugar nga makabulig sa kay amoy, daw gatum-ok pa haw?

***

WALA sing en bloc vote, ukon “all together” nga boto ang mga katoliko sa pungsod. Mga 80 porsyento sang populasyon ini sila sa Filipinas.

Base ini sa experyensya sang Estados Unidos kag mismo sang aton pungsod.

Sang magdaug si John F. Kennedy sa pagka-Presidente ang nakuha niya nga boto halin sa mga katoliko sa Estados Unidos mga 20 porsyento lang sang ila kabug-usan.

Diri sa binotohay sa Filipinas, ang isa ka estimate amo ang 10-20 porsyento lang sang catholic vote.

Ina tungod seguro kay nagakalain-lain man ang interes sa pangabuhi sang bisan mga katoliko.

Ining nagakalain-lain nga interes nagalakip sang ila partikular nga problema sa gutom, mataas nga bili sang nahauna nga kinahanglanon, mataas nga pamasahe, oportunidad sa pangabuhi, problema sa kalinong, kag ang masangsang nga baho sang imoralidad sa sosyedad.

Matabo lang ini seguro – nga magboto sila sing buylog – kon ang daku nga isyu amo ang pagpanglupig sa mga tumuluo, katulad sadtong pagpamigos sang mga Kristiyano ni Emperador Nero sang Roma.

Apang pwede bala matabo liwat ining pagpamigos sang mga tumuluo, katulad sang mga katoliko, diri sa aton agud kinahanglan gid awayon ini?

Daw amo gid ini ugaling ang ginapahangop ni Archbishop Socrates Villegas sa video niya sang sini lang.

Ginpabutyag niya diri ang mga “insulto” ni Presidente Duterte, lakip ang pagtawag sini sa Diyos sang mga Kristiyano nga isa ka “stupid God.”

Sa iya Facebook account, gin-quote pa gani niya ang pamangkot, nga tumod sa mga bumoloto, ni Kristo kay Hudas Iscariote: “Are you betraying the Son of Man with a kiss? My dear brothers and sisters, are you going to betray God? Are you going to deny your faith by your vote?”

Ang Simbahan Catolica wala nagapagwa sang lista sang mga kandidato nga luyag sini i-rekomendar sa mga bumoloto. Ang ginapagwa sini amo ang bagay nga mga pamatasan sang mga kandidato, ang pagkamaka-Diyos nila, kag panindugan sa kaayuhan sang pumuluyo sandig sa ginatudlo sang Simbahan.

Namensyonar ugaling ni Villegas ang indi pag-suporta sa pang-gobyerno ni Duterte kag sang iya mga kandidato, labi na gid ang may maathag nga pag-ugyon sa mga isyu batok kay Presidente, katulad sang extrajudicial killings angot sa Gyera sa Droga kag Krimen, pagtampalas sa Diyos, kag pamahog sa mga obispo.

Kag, syempre pa, ang pag-suporta man sini sa mga kandidato nga naga-kontra sa pang-gobyerno sang Presidente.

Wala nagsiling si Archbishop Villegas kon sin-o ining mga kandidato nga kontra kay Presidente, apang laban-laban nalakip diri ang yara sa oposisyon sa idalom sang Otso Derecho nga sandayAlejano, Diokno, Macalintal, Roxas, Tañada, Hilbay, Bam Aquino, kag Gutoc.

Tani madala man sanday Angara, Colmenares, Poe, Pimentel, Villar, kag iban pa sa sobra 60 nga kandidato para senador nga matarong. ([email protected]/PN)

LEAVE A REPLY

Please enter your comment!
Please enter your name here