Gintagna nga mangin Chief Justice?

ANG BIBLIYA nagasugid sa aton sang mga hitabo nga gintagna (foretold) nga matabo nga sang ulihi natabo gid man.

Pila sang mga bantog nga manugtagna sa Bibliya nagalakip sa kay Amos, Hosea, Jeremiah, Ezekiel kag Isaiah – ang una nga nagtagna sang pagkabun-ag sa kalibutan ni Jesukristo nga Anak sang Diyos.

In fact, may mga manugpakot (manughimalad kag kasubong nila) nga kon kis-a ang ila pakot nagakatabo man. Kag kon sa madamo, sangsa malaka, nga kahigayunan nga matabo ang ila pakot, may nagapati man sa ila.

Luas sa basta pagpakot-pakot lang, yara man ang aton mga mangin-alamon sa siyensya nga nagahimo sang ila pag-conclujer sang mga hitabo paagi sa logika sang Theory of Probability.

Sa idalom sini ma-conclujer ang posibilidad sang kon bala pila ang tsansa nga matabo ang isa ka hitabo. Puede man nga magsala ini, apang kon ang posibilidad tama ka taas, labi na gid kon sandig sa mga masaligan kag napamatud-an nga salandigan (criteria), ginapatihan na ini sang bisan sang mga mangin-alamon kag sang korte.

Paagi sini, por ejemplo, ang kon bala sin-o ka nga bata (child) puede mahibal-an ini sa isa ka DNA test. Of course wala sing makasiling nga absolute (ukon indi mabali) nga kamatuoran ang ma-conclujer diri.

Sa masami gani ang DNA test mga 98-99% lang nga amo gid, apang bastante na ini nga mapatihan, labi na gid kon wala sing maisip nga kontra nga pagpati.

May nagapakot man gani nga wala kita sang nahibal-an parti sa ila ikasarang sa pagpakot, apang nagakatabo man ang ila pakot, katulad sang wala nagpakilala nga tagtawag sa telepono nga nagpahibalo nga si United States President John F. Kennedy pagapatyon.

Pila lang ka minuto sang iya pagtawag, gintiro si Presidente Kennedy sang isa ka sniper kag napatay gid sadtong Nobyembre 22, 1963 samtang yara sa isa ka parada angot sa iya pagduaw sa iya natauhan nga lugar sa Dallas, Texas.

***

Sa masami man, may mga patimaan ang ginatagna nga hitabo, katulad sang bitoon nga nagpakita sa kalangitan sa pagtudlo kon diin natawo si Kristo. Si Kristo ginsiling nga natawo sa isa ka lungib nga palahuwayan sang mga hayop.

Angot diri, may patimaan bala nga, finally, si  Senior Associate Justice sang Supreme Court Antonio Carpio amo na ang masunod nga Chief Justice?

Coincidence ukon indi, ini ang nahibal-an ta angot sang tsansa ni Carpio nga mapilian nga Chief Justice.

Si Carpio ginbun-ag sadtong Oktubre 26, 1949. Ginpasumpa siya ni anay Presidente Gloria Macapagal Arroyo bilang associate justice sa Korte Suprema sadtong October 26, 2001. Ang deadline sang pag-apply sa pwesto nga Chief Justice gintalana man sa October 26.

Incidentally, ang Oktubre 26 (2013) amo man ang una nga National Convention sang ginhugpong na nga Samahan ng mga Sigma Rho ng Pilipinas Inc., sa diin isa siya sang ginataha nga mga fraternity brod. Fraternity Grand Archon gani siya sadtong 1973-1974.

Mga patimaan bala ini nga gintagna siya nga mangin Chief Justice, bisan sa pagboto niya kontra sa pagpahalin kay anay CJ Ma. Lourdes Sereno tungod sa isyu sang wala ma-sumite nga SAL-N sa diin napierde sila, 6-8, sa botohay? Kag bisan bala mangin-kontra man siya ni Presidente Duterte tungod kontra sini si CJ Sereno?

Kon patimaan ini nga gintagna gid man sang Kahitaasan ang pagpungko ni Senior Associate Justice Antonio Carpio bilang Chief Justice, wala sing duha-duha nga bisan si Presidente Duterte indi makabalabag sini.

Samtang, madamo man ang nagasuporta kay Carpio, lakip ang Integrated Bar of the Philippines kag ang retirado nga CJ nga si Hilario Davide.

Ginatamyaw man sang bug-os nga Sigma Rho Fraternity, paagi sining kolum, si Brod Supreme Court Associate Justice Antonio Carpio sa iya kaadlawan sa adlaw nga ini, Oktubre 26! (w_mateojr@yahoo.com/PN)

LEAVE A REPLY

Please enter your comment!
Please enter your name here