LUYAG naton updan si Mayor Jerry Treñas sa iya paglaum nga mangin malipayon na gid man ang aton pagsaulog sang panahon sang Paskwa sa lubos naton nga pagkatawo – ispiritual kag sa unod.
Ina kay sige-sige na ang pagtaas sang nabakunahan nga mga pumuluyo diri sa siyudad.
“Tungod sini,” siling niya sa iya Facebook Page, “nagadamo man ang aton mga pumuluyo nga matagaan sing proteksyon batok sa delikado nga igu sang virus (COVID-19)”.
In fact, nalab-ut na sang siyudad ang 86% ka porsyento sang mga pumuluyo nga nabakunahan na, kag sige gihapon ang pagpabakuna sang taga-siyudad pati na sang taga-gwa nga luyag magpabakuna diri. Kapareho na ining aton sitwasyon sa National Capital Region (NCR) nga may sobra 80% ang nabakunahan na.
Sa subong gani diri sa siyudad, madamo naman nga mga 12-17 anyos ang nabakunahan na. Isunod na ang mga kabataan nga may edad paidalom tubtub 5 anyos. Agud mapabakud pa gid ang “immunity”, ga-preparar man gani ang siyudad sa pag-administer na sang mga “booster shots”, una para sa mga frontliners kag mga may “comorbidities”, ukon ang may mga balatian nga nagapahina sang ila “immunity”.
Ginpagwa naman gani ni meyor ang iya Executive Order 132-A, nga napetsahan Nobyembre 5, 2021, agud dulaon na ang “curfew”, ukon ang limitasyon sa paglagaw sang tawo sa mga publiko nga mga lugar.
Lakip man diri ang pagpahanugot na sa mga salakyan pampubliko sa pagbaton sang mga pasahero sa 70% sang ila capacidad.
Ginasugo man sini ang “optional” na lang nga paggamit sang “face shield”, kay sunu sa pagtuon indi man ini makapugong sa paghaklo sang aerosols – gagmay nga mga virus – nga makapabilin pa sa paglutaw sa hangin, nga mahimo naman sang “face mask”.
Tungod sini madamo na sang aton mga pumuluyo ang luyag maglagaw-lagaw sa plaza, maligo sa baybayon, magbisita sa mga matahum nga mga tourist spots, kag mag-shopping kag magpalamig sa aircon nga mga “mall”.
Mahimo naman nila ang mas makahulugan na nga pag-selebrar sang panahon sang Paskwa sa naandan na nila nga pamatasan agud ma-enjoy ini sing lubos.
Sa naandan na naton, gina-selebrar naton ang Paswa sugod sa Oktubre tubtub sa pagkatawo ni Kristo sa Disyembre 25, kag tubtub pa gani sa Tatlo ka Hari sa una nga Domingo sang sunod nga tuig.
Amat-amat naman tingkad ang kasanag sa kagab-ihon nga dala sang mga parol kag mga Christmas lights sa mga puluy-an kag palibut. Nga gina-enjoy naman sang aton mga pumuluyo!
Merry Christmas to one and all!
***
Of course, bilang paniguro kay indi pa mapat-ud sang aton health authorities ang aton ikasarang agud lupigon sing lubos ang COVID-19, sige lang anay ang pagpatuman naton sang bagay nga himuon bisan sa mas hilway na naton nga panghulag sa palibut.
Mayor diri ang padayon nga pagpatuman gihapon sang “health protocols”, pagpatuman sang “infection control system” kon diin bagay, paglikaw gihapon sa “crowd gathering” kag “unprotected travel”, kag ang padayon nga pagbakuna sang aton mga pumuluyo.
Samtang ginapatihan sang pila ka health experts nga basi makaligad pa ang duha ka tuig agud lubos mahilway kita sa COVID-19.
Tungod sini sige pa ang pagbantay sang aton mga health experts kon ano pa gid ang mahimo sang COVID-19 kag sang “mutations” ukon “variants” sini nga sige man ang pagpanublag sa katauhan.
Ang mga kandidato sa Mayo 2022 nga eleksyon ginapaabot naton gani nga makapahayag man sang ila plano angot sa sige pa naton nga problema sa COVID-19.
Isa sa sining maayo nga plano amo ang iya ni VP Leni. Ang iban wala pa naton nahibal-an kon ano gid ang ila plano angot diri.
***
Importante man nga matagaan naton sing pagsalig ang mga health authorities sa mahatag nila sa mga pumuluyo kag sa aton mga pamunuan nga mga masaligan nga “statistics” kag “metrics” para man sa masaligan nga “trends” para sa ila nagakaigu nga desisyon.
Pila ka healh experts luyag magpati nga mas masaligan ang “trend” sang pagnubo sang COVID-19 kon ginapakita sini ang masaligan nga week-after-week nga data sang “hospitalization” sang mga pasyente.
Otherwise, kon may hitabo nga “unusual” katulad sang “erratic pattern” sang “trend” sini dapat maabtik man naton ma-aksyonan dayon ini agud makoreharan kag indi na maglala pa./PN
