MATAPOS ang panahon sang patay-siga kag mahal nga balayran sa kuryente, nakadangat na gid man sa maayo nga kahimtangan ang mga konsumidor sa syudad sang Iloilo.
Naislan na ang mga nagahilay kag gabok nga mga poste, gina-amat-amat na hipod ang mga ‘spaghetti wires’ nga nagatunton sa dalan kag masami nagatuga sang disgrasya tungod nagasaid ang mga motorista.
Ang kadalag-an, maayo nga serbisyo kag barato nga presyo sang kuryente sang MORE Power ang angay nga ipabugal sa bisan diin man nga bahin sang pungsod. Mismo ang mga konsumidor ang nagapahayag sang ila kalipay kag pagkomporme sa serbisyo sang MORE Power sa ila.
Isa sa pamatuod diri ang hingyo sang mga kabanwahanan nga yara sa palibot sang syudad nga nagahandom nga sila man ang makaagom sang sini nga sahi sang serbisyo sang MORE Power. Nagresulta ini sa pagduso sang hagna nga nangin kasuguan kag natalana nga ipatuman sa ginpapsangkad nga franchise area sa 17 ka mga local government unit sa 2nd kag 4th districts sa probinsya sang Iloilo.
Ang ini nga kadalag-an sang MORE Power kaangay sang balud nga nagasalya sa bisan diin nga honasan. Ginakabig ini nga inspirasyon sang iban pa nga kompaniya nga yara sa sektor sang power distribution, handom nila nga mailog ang mga tikang kag produktibo nga metodo nga ginahimo sang MORE Power.
Gindayaw gid sang mga negosyante sa rehiyon sang Visayas ang ‘best practices’ sang MORE Power, luyag nila matun-an kon paano sini napanami ang ila serbisyo sa electric distribution sa syudad sang Iloilo sa nakalipas nga duha kag tunga sa tuig.
Ginhiwat sang damlag lang ang 31st Visayas Area Business Conference sang Philippine Chamber of Commerce and Industry sa Ormoc City, Leyte nga may tema nga “From setbacks to comebacks: Getting business back on track”.
Ginpatpat ni Mr. Roel Castro, ang President kag CEO sang MORE Power, ang istorya sang distribution utility kag kon paano ini nangin perfect example sa tema sang konperensya nga nagpokus sa ‘innovations for sustainable energy supply toward a cost-effective and efficient energization’ paagi sa pamulong-pulong sang gin-imbitar siya sa atubang sang linibo ka mga delegado.
Ginsaysay ni Castro ang tuhoy sa mga pagpanghangkat kag mga bagay nga ila ginhimo kon paano mapanami indi lang ang sistema kundi lakip man ang mga serbisyo sa mga konsumidor.
Ginpresentar sini sa mga tumalambong kon paano ang MORE Power nakapangibabaw gikan sa plastada nga may mataas nga system loss, gabok kag ginpatumbayaan nga mga pasilidad, tuman ka delikado nga overloaded systems, kag mataas nga electricity rates.
Gintumod ni Castro nga wala sang magic nga gingamit agud mabatyagan akon ano ang gina-enjoy karon sang mga konsumidor sa syudad sang Iloilo.
Indi man basta-basta ang kadaku sang investment sang MORE Power agud mapaayo ang iya serbisyo, wala ini sang magic, kundi realidad kag aktwal nga pagresponder sa sitwasyon.
Masobra na sa 1.3 billion pesos ang investment sang MORE Power lamang nga mangin realidad ang ginasiling nga magic sa sini nga sahi sang serbisyo para sa konsumidor. Lima ka mga butang ang napaminsar sang MORE Power nga dapat yara sa iya agud matigayon ini tanan kag ginalakipan ini sang financial capability para ma-rehabilitate ang mga pasilidad, dugangan ang kapasidad kag ang reliability, paghanda para sa automation paagi sa digital platform, kag padayon nga paghanas sa personnel.
Ikaduha nga aspeto ang technical capability. Naga-recruit sila sang mga tinawo nga may mataas nga lebel sang integridad kag technical expertise kag naga-employ sang masaligan nga contractors nga may malawig nga technical experience. Sunod diri ang pag-angkon sang innovative mindset. Dugang pa, dapat mangin socially responsible nga amo ang second nature sa MORE Power.
Ginapasulabi sang MORE Power ang pag-usar sang renewable energy kag non-indexed sources. Nagapangita sang pasilidad kag process solutions nga indi lubos makahalit sa palibot kag padayon nga pagpatudok sang benepisyo sang sustainability sa mga empleyado kag iban pa nga stakeholders.
Maathag nga ginauna sang MORE Power ang paghatag sang masanag nga serbisyo sa mga konsumidor paagi sa pagpangita sang mas barato nga source sang kuryente, pagpanami sang mga linya agud nga indi matublag ang paglatay sang kuryente kag malikawan ang pagluntad sang power interruptions kag masiguro nga pinakabarato sa gihapon ang power rate diri sa syudad sang Iloilo.
Ang masaligan nga serbsiyo sang MORE Power makahatag sang masaligan nga suplay sang kuryente kag makaganyat sa mga negosyante nga magpatindog sang negosyo sa syudad nga magaresulta naman sa paghatag sang trabaho sa mga pumuluyo.
Kon masanag ang banas nga gina-usoy, maathag kag madasig ang pagtikang sa direksyon sang kauswagan. (bertladera@gmail.com/PN)
