TUNGOD indi sila kumporme sa desisyon sang Comelec 1st Division nga naga-dismiss sang disqualification (DQ) case ni BongBong Marcos, ginapreparar na sa karon sang mga petitioners ang pagpasaka sang ila reklamo sa Comelec en banc. Tubtub pa gani sa Korte Suprema, kon kinahanglan.
Sa nasiling na ni Vice President Leni Robredo, mas gustuhon niya nga dag-on si BongBong Marcos (BBM) sa presidential election sa Mayo 9, 2022, kag indi tungod ma-disqualify lang ini. Katulad ini sang dag-on niya si BBM sadtong eleksyon sang 2016 sa pagka-bise presidente.
Subong man sina ang luyag matabo ni presidential aspirant Senador Ping Lacson, nga dag-on ang eleksyon sa “merits” sang kandidato.
Pero, wala makapugong si VP Leni sang iya kaham-ot sa pagpangatarungan ni Commissioner Aimee Ferolino sa iya pagsulat sang “ruling” sang majority decision sang 1st Division sa DQ case ni BBM.
“Mahirap siyang intindihin kasi pag sinabing walang crime…[eh] kasi may conviction na sa RTC (Regional Trial Court) saka sa Court of Appeals. Pag sinabi mong walang enough na batas [para magparusa ng non-filing ng income tax return], magwa-wonder ka bakit naconvict kung wala palang enough na batas,” siling gani ni Robredo, nga isa man ka abogada.
Ang majority decision ginhimo ni Ferolino upod ang isa pa ka commissioner minus si Commissioner Rowena Guanzon nga nagboto kontra. Ugaling wala na ini maisip tungod nagtapos na ang iya termino sadtong Pebrero 2 nga wala pa masulat ni Ferolino tubtub sa schedule sini nga yara pa sa pwesto si Guanzon.
Suspetso gani ni Guanzon nga ginhungod gid ni Ferolino nga i-delay ang pagsulat sang “ruling” agud indi na ma-recognize ang iya boto on record.
May tugda man si Guanzon sa sining “ruling” ni Ferolino.
Sunu kay Guanzon, katingalahan ang pangatarungan ni Ferolino sa sinang “ruling” nga ginsulat niya.
Paano, siling niya, nga wala sing krimen sa indi pagbayad sang buhis ni BBM halin sadtong 1982-1985 kay convicted si BBM sang Trial Court kag sang Court of Appeals sa iya “repeated non-filing of income tax returns”?
Gin-dispute man ni Guanzon ang pagtudlo ni Ferolino sa kasal-anan ni BBM nga isa lang ka malum prohibito, ukon indi “inherently wrong and immoral” tungod kuno “there is no law punishing non-filing of ITR?”
Kon may ara man kuno isa lang ka mamag-an nga multa (fine), kag tungod sini indi ini malum in se, ukon “inherently wrong”.
Gin-kwestyon ni Guanzon ining “reasoning” n Ferolino.
“There is no law punishing non-filing of ITR? Why was BBM (BongBong) convicted then? Any bright-bright n’yo naman (You guys are so smart),” dugang ni Guanzon.
Sa aton pa, ngaa wala ma-punish si BBM kay, sa matuod, convicted si BBM sang trial court kag mismo sang Court of Appeals, kon diin wala na ini nag-appeal sa Korte Suprema tungod seguro kay nagapati ang iya mga abogado nga basi madugangan pa ang iya sentensya.
Siling pa ni Guanzon nga ang isa ka suspetsado pwede maakusahan sing moral turpitude bisan pa sa kaso nga malum prohibito, sunu mismo sa Korte Suprema.
Kon mapamatud-an nga “harmful to people or property”, por ejemplo, pwede siya maakusahan sing moral turpitude, sunu sa aton man nabasahan.
Katulad sang indi pagbayad sang buhis, labi na gid kon ang nagahimo sini isa ka opisyal sang gobyerno.
Sa nahibal-an na sang publiko, wala nagbayad sing buhis si BongBong Marcos samtang Bise-Gobernator kag Gobernador sang Ilocos Norte sadtong 1982 tubtub 1985.
Ini naman ang matugda ni anay Bureau of Internal Revenue (BIR) Commissioner Kim Henares.
“Moral turpitude does not even come in,” pamat-ud gani ni Henares.
Ginpahayag ni Henares nga maathag (clear) ang Tax Code parti sini.
“I think the discussion on moral turpitude is just confusing the whole issue,” siling niya.
“The law itself is very clear: If you are a government official, you violated any provision of the tax code, whatever those provision[s] are and you got convicted, you are perpetually disqualified,” pamat-ud pa niya.
Gintudlo niya ang Chapter III, Sec. 269 sang Tax Code kon diin ang isa ka opisyal sang gobyerno dapat magbayad sing buhis nga indi kinahanglan kon san-o wala siya nagbayad.
“Ang kasal-anan diri, retroactively,” dugang niya. Kag ina kon ngaa na-convict si BBM sa indi pagbayad niya sing buhis./PN
