HIGAYON ang makatuad sa matuod nga panimuot sang isa ka tinuga. Higayon ang makatuad sa kon ano ang matuod niya nga duag kag ini man ang makapatukal sa iya ginapanaguan nga alukaba agud nga mahumlad ang iya matuod nga persona.
Ang higayon nga ini kaangay sang isa ka hinali nga pagdapya sang mabaskog nga balud sa nawong sang pulitika sa syudad kag probinsya sang Iloilo. Kag ang ini nga balud amo ang pagpadulong diri ni Presidente Rodrigo Duterte.
Natigayon nga mahatagan sang katumanan ang katuyuan sang iya pagpadulong diri sa syudad kag probinsya sang Iloilo nga amo ang magpanguna sa pagpanagtag sang mga certificate of land ownership awards ukon CLOA kag ang emancipation patent.
Natigayon man ang iya pagpamulong-pulong sa tatlo tanan ka lugar nga iya ginpadulungan kag madamo man siya sang nabungat nga manami pamatian, masakit sa dulunggan, kag makasalaklaw sa balatyagon sang iban.
Sa tunga sang iya pag-abot kag pagbiya, mas talalupangdon ang mga pulitiko sa syudad kag probinsya sang Iloilo nga pilit nga makapalapit kag makasugilanon sa iya, pilit nga makakwa sang higayon agud nga mapakita sa tanan kon ano sila ka suod sang presidente kag kon paano nakunyag ang presidente sa ila bilang lokal nga lider.
Madamo sang nagalagaw nga mga sugilanon nga antes pa man nakaabot ang presidente may mga pagtililipon na ang mga pulitiko sang magkaangay nga partido kag sila ang naghinun-anon na sa kon ano ang mangin lakat sang eleksyon sa palaabuton nga 2019.
Makita na ang pagdapya nila sa higad kag didto sila nagtipon. Nagseparar sila sa kadamuan kag matalupangdan ang ila kadamuon, ang kusog sa pagtililipon, ang pagkubot sang ila handom kag ang pagpalab-ot sang mensahe nga yara sila nga isa ka pwersa.
Matuod nga sang nagdapya ang balud, madamo sang ginhal-id sa higad nga wala na makapalapit pa sa presidente. May yara sang ginlampos sa bato nga tuman ka layo ang distansya sa kahigayunan. May yara sang nakita sa una nga naglutaw-lutaw apang sa ulihi nagsarurot kag naalimunaw.
May yara man nga sang una yara nagadikit, nahilayo kag liwat nga nagdikit. May yara man sa ila nga tayuyon ang pagdikit kag wala nahilayo sa bisan isa ka tinion.
Maathag nga sa pagdapya sang balud may yara sang nagbaliskad, may yara sang mahamulag, may yara sang maalimunaw, may yara sang magasampay,may masagnoy sa balas kag may magasakay sa habyog sang balud.
Makahalam-ot kag makalilingaw ang mga hitabu. May mga pulitiko nga nasugilanon sang presidente kag may yara naman sang may ginhatagan sang malawig nga tion.
Ano ayhan ang ila naistoryahan? Ano ayhan ang gintuad sa presidente? Ano ayhan ang ginpamangkot sang presidente? Ano ayhan ang ginpangako sang presidente?
Madamo sang pamangkot nga indi pa masabat sa karon. Madamo sang palaligban nga indi pa maathagan bangud nga wala pa nagkanay ang tanan.
Kaangay sang balud nga nagaukay sa balas, ang nakatago nga bato sa idalom ang magatuhaw kag makakita sang butlak sang adlaw.
Narumpag ang mga mahuyang, ang mga mapag-on wala nalingkang sa nagdapya nga balud. (bertladera@gmail.com/PN)
