Ngaa diri gid na-assign si Jovie?

WALA man seguro dapat kulbaan ang but-anan ta nga mga pumuluyo sa Western Visayas sa balita nga ma-assign diri si Police Chief Inspector (ukon Police Major) Jovie Espenido.

Pero basi ma-assign diri siya – sa Bacolod kuno – kay may ginapalagas naman sa iya nga narco-politician diri, kag kon may ara gid man dapat na sila matuod mangamlig.

Ina tungod sa pagpati sang iban nga wala ini si Espenido gapati sa “due process”. Trigger-happy kuno ini. Katulad kuno sa indi husto nga pagpapatay sa mga meyor sang Leyte kag Ozamiz sang didto siya ma-assign.

To be fair kay Espenido, gin-deny niya ini.

***

Sa matuod, lain na gid man ang mga hitabo sa sining panahon ni Presidente Rodrigo Duterte.

Sa karon, indi kinahanglan nga mapamatud-an sang korte nga nahimo mo ang isa ka mabug-at nga kasal-anan agud kurugon ka sa mabug-at man nga penalidad nga bagay ipataw sa imo.

Ining mga mabug-at nga kasal-anan nagalakip sang Murder, Robbery with Homicide kag Rape with Homicide.

Sa subong wala na sing death penalty. Ang pinakabug-at amo ang life sentence (wala limit nga pagka-bilanggo) kag reclusion perpetua (30-40 ka anyos nga pagkapriso nga may tsansa nga ma-pardon).

Sa karon ugaling, bastante na nga patungdan ka ni Presidente Duterte sing hambal nga “I will kill you!” ukon “Ikaw ang susunod!” nga kurugon ka sa kulba bisan inosente ka pa.

Ina bisan ginasiling pa sang iya spokesperson nga abogado ini si Presidente kag indi niya mahimo aktwal ang kasubong kapintas nga hambalanon.

Ang problema ugaling – kon indi gid man amo gid ang luyag sang Presidente matabo – kay madamo sang kapulisan nga literal ang paghangop nila sa hambal sang Presidente.

Gani kon siling niya “I will kill you!” ukon “Ikaw ang susunod!” patay ka gid bisan ano pa ang rason, katulad sa madamo na nga kaso nga mabudlay patihan mismo sang mga pumuluyo sa rason nga kuno shootout ukon depensa lang sa kaugalingon sang mga pulis.

Sa karon, “what you hear is what you see” sa ginahimo sang pila ka pulis. Madamo na gani ang akusasyon kay Presidente halin sa mga human rights advocates, diri kag sa luas, sa diin siya ang gina-pasibangdan sa kahimuan sang pila ka pulis sa idalom sang principle nga command responsibility.

***

Tungod sini, dapat na mag-amlig ang Presidente sa nagagwa sa iya baba tungod madamo nga mga pulis nga nagapati literal sa iya ginahambal.

Kag mapatuman na sang mga pulis ang tuod-tuod nga “due process” sa pagdakop kag pagdala sa husgado sang mga akusado.

Katulad bala sa ginhambal niya sang sini lang sa kaso sang mga ninja cops sa idalom ni PNP chief Albalyade nga regional director pa ini sadtong 2013, nga sa lugar i-dismiss ining ninja cops ginpa-reassign lang, gani pati siya naakusahan sang pareho niya nga opisyal sa kapulisan.

Sa sini nga kaso, 30 sang 200 ka kilo sang shabu ang ginpalapaw sining mga ninja cops, nga ginpa-reassign lang sa Mindanao sa lugar nga hulugan sing outright dismissal.

Siling ni Presidente: “Prove first the guilt of PNP chief Albalyade!” bag-o niya kuno husgaran ini. Good! Kag indi kay “I will kill you!”

About time nga masunod ta gid ang ginapaabot naton halin sa kasuguan mismo under sa ginakilala ta nga “rule of law” kag indi sa “rule of men”.

***

PASIPLAT

Interesting Facts About West Visayas

By Atty. Rex S. Salvilla+

(President: Iloilo Historical Association and West Visayas Historical Research Foundation, Inc.)

‘Sports and Recreation – Post War’ – Part 4

(Halin sa Book 7, pahina 16-17)

Sa Boxing yara sanday:                                                                                          

* Reynaldo Galido sang Negros Occidental – champion sa light welter weight sa 12th Asiad sang 1994 sa Tokyo;

* Dodie Boy Peñalosa – champion sa IBF World Junior Flyweight kag flyweight sang ginlutos sini si Dokolomo sang Japan;

* Gerry Peñalosa – world champion sa WBC 115 Super Flyweight sang ginlutos niya si Hiroshi Kawashma sang Japan sang 1997;

* Elias Recaido sang Negros Occidental – champion sa Flyweight sa 12th Asiad sadtong 1994 sa Tokyo;

Sa Chess:

* Eugene Torre sang Iloilo City – 1st Asian Chess Grandmaster sang ginlutos niya si Russian Grandmaster Anatoly Karpov sa 21st Chess Olympiad sang Pransya. (May kasugpon) ([email protected]/PN)

LEAVE A REPLY

Please enter your comment!
Please enter your name here