BY THE WAY, siling ni Cong. Ferj Biron nga iya kuno kwarta ang ginagasto niya sa pagpanghatag sang mga school bag sa mga estudyante.
Ini ang iya ginpaseguro sa publiko samtang gin-kritikar ang paggamit ni Gob. Arthur Defensor Sr. sang kwarta sang probinsya sa nagakalain-lain nga proyekto kag programa sa mga pumuluyo.
Gin-aku ni gob nga, sa matuod, ang kwarta gid man sang probinsya ang iya ginagamit.
Siling niya ugaling nga ginabalik man lang niya ang kwarta sang mga pumuluyo agud gamiton para sa ila kaayuhan paagi sa mga proyekto kag programa, nga obligasyon gid man niya bilang gobernador.
Indi katulad sang ginahimo ni Biron, paathag pa gid gani ni gob, nga ang pagpanghatag sang mga school bag sa kabataan madumduman lang ni Biron kon malapit na ang eleksyon.
Labay man ang akon, daw indi man si gob ang kontra ni Biron sa eleksyon, ti ngaa si gob ang iya gina-isyuhan? Seguro tungod ang ano man nga mabulig ni gob sa pumuluyo, bulig man ina sa kandidatura ni Toto Defensor, ni Beng Tupas kag sang ila grupo. Gali?
Ti, ngaa wala gid bala sing mga abyan nga pulitiko si Biron nga makabulig sa iya agud magamit man niya pabor sa iya? Basi guro. Tsk…tsk…tsk!
***
KON sin-o ang nag-proponer sang rematch ni Pacquiao kag ni Mayweather, galahog lang guro.
Ang mga boxing fans nga mga Filipino maluyag sing matuod-tuod nga sambuwa sa ring. Ina bala nga exciting gid kag ang “matira ang matibay!”
Kon si ring announcer Michael Buffer pa: “Let’s get ready to rumble!”
Well, wala naton makita ining rumble sa “Match of the Century” kuno sang duha, Pacquiao kag Mayweather, sadtong May 2015. Daw gakabud gani si Mayweather nga century plant, nga dayon sini libut sa likud kag mangunyapot agud indi mataktak.
Ti, ina ang “Match of the Century” nga gingastuhan sang sobra $300 ka milyon sang mga minilyon nga tumalan-aw nga Filipino kag sang madamo pa sa kalibutan?
Samtang sige soroso ni Pacquiao, si Mayweather sige man ang palagyo nga indi luyag masaktan kag todo likaw nga makigbayluhanay inumol kay Pacquiao.
In fact, wala gid man sang iguay nga seryoso tungod sang tinalaw ni Mayweather. Kag wala ko lang ini nabatian. Kita ko gid ang away nila nga duha nga wala kurap-kurap sa pagtan-aw sa sulod gid sang 12 ka round.
Kag aba! si Mayweather pa kuno ang nagdaug, kag unanimous pa! Indi ako professional observer sa boksing, apang kumporme ako sa obserbasyon sang isa ka ring broadcaster nga si Pacquiao ang matuod nga nagdaug. Man, sobra gid kadamo sang landed punches ni Pacquiao kontra kay Mayweather.
Sa iguay nga daw naga-praktis lang ang mga boksingero, ang dapat nga magdaug ang may laban nga igu sing inumol. Indi bala?
Kon nakakita ka sang reaksyon sang mga tumalan-aw bisan lang sa TV malas-ayan gid ka sang ila garis-garis lang sa ring. Kon may gahod man sa tion sang pagbayluhanay sing inumol sing pila ka beses, daw palakpak sang masakiton.
Maayo pa seguro nga bungguon ni Pacquiao si Vasiliy Lomanchengko, ang Ukranian nga slugger nga may rekord nga 11-1 kag may siyam ka pag-knockout sang iya kontra.
Sa subong yara pa sa medyo mamag-an nga timbang si Lomanchengko sa 147 pounds ni Pacquiao, apang handa siya kuno sa pagsaka sa welterweight ni Pacquiao, sa diin tsampyon si Pacquiao sang gintumba niya ang defending champion nga si Lucas Mathysse sadtong Hulyo 2018.
Puede man si Amir Khan nga kabalan. Kapila natumba sa sambuwa apang nagabangon kag magwaswas liwat kag nagadaug pa.
Sori, Mayweather, indi kami malipay nga kasumpong ka liwat ni Pacquiao! (w_mateojr@yahoo.com/PN)
