Pagpaiway sa paggamit sang helmet

0

Ginaduso sang hepe sang Iloilo City Police Station 1 nga konsiderahon ang ideya nga indi pagpasuksukon sang helmet ang mga motorista nga nagataris sa palibot sang syudad sang Iloilo.

Katuyuan sini nga mangita ang nawong sang mga nagasakay sa motorsiklo kag malikaw ang pagluntad sang krimen nga imbolbado ang riding in-tandem.

Sadto pa man, ginapanindugan ko nga indi angay magsuksok sang helmet sa palibot sang syudad bangud man sadto sang madata nga pagluntad sang kriminalidad nga kahimuan sang riding in-tandem. May mga biktima nga ginaagaw ang ila bag ukon cellphone, may ginadulugan kag ginaholdap, may ginadulugan kag hinali nga kulatahon ukon bun-on, kag mabudlay sila nga kilalahon bangud lunsay may tabon ang ila mga nawong.

Sang ginlunsar ang Oplan Tokhang, naghagan-hagan ang pagluntad sang kriminalidad kag nadula ang kabalaka sang mga nagatrabaho sa gab-i, ilabi na ang mga call center agent, kag nagbalik ang ila kumpiyansa sa kalinong kag katawhay sa dalanon sa tagsa ka kaagahon.

Apang sa nasiling ko, sadto pa sang ginapuisan kon bala angay nga magsuksok sang helmet samtang nagataris sa dalanon sang syudad nagpahayag ako nga indi angay bangud nga indi man makapadalagan sang madasig ang motosiklo, tuman ka guot sang lakat sang trapiko, masami ang pagdulog bangud sa madamo nga bangga sang dalan kag indi largo ang ginadalaganan.

Masami man lang nagaluntad ang aksidente sa largo nga dalan kon sa diin madasig kag nagabutyog ang motorsiklo. Matalupangdan ini sa bahin sang Diversion Road kon sa diin madamo sang aksidente nga nagaluntad. May mga hitabu man sa pila ka mga lugar sa palibot sang syudad apang ang insidente nagaluntad sa masami kon gab-i nga tawhay ang dalan kag madasig ang dalagan sang motorsiklo kag kon hubog ang nagamaneho sang motorsiklo.

Ginlunsar man sang Philippine National Police ang ‘Clean Rider’ stickers kag ginhaylo ang mga motorista nga iparehistro ang ila motorsiklo kag tapikan sang sticker agud nga mahapos ang pagtumod sang kapulisan ilabi na sa tagsa ka may ginahiwat nga checkpoint.

Katuyuan sang sini nga ‘Clean Rider’ sticker agud nga matapna ang mga insidente nga imbolbado ang riding in-tandem.

Diri sa Western Visayas, hawot-hawot sa 4,000 ka motorsiklo ang natapikan sang sticker kag wala pa sa 10 porsyento sa kabug-usan nga kadamuon sang motorsiklo ang natapikan sang sticker.

Indi pa maathag kon bala epektibo ang pagpatapik sang sticker apang ang klaro nga padayon ang pagluntad sang insidente nga imbolbado ang riding in-tandem.

May pungsodnon nga kasuguan nga ginapatuman nga dapat ang tanan nga nagasakay sa motorsiklo magsuksok sang helmet. Ang katuyuan nga maamligan ang mga nagasakay nga indi mahalitan sa pagkuntad sang aksidente apang ini naman ang nakita nga pamaagi sang mga taghimo sang krimen nga ila matabunan ang ila nawong sa paghimo sang kalakasan.

Nagakadapat nga timbangon sang mga natungdan nga ahensya sang gobyerno kon ano ang mas nagakadapat nga ipatuman kag hatagan snag kabilinggan.

Mas madamo ang nagakapatay sa igo sang bala kaysa sa pagkabuka sang ulo sa karsada kag dapat konsiderahon ang pagpaiway sa paggamit sang helmet./PN

LEAVE A REPLY

Please enter your comment!
Please enter your name here