[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
ROBERTO ‘BERT’ LADERA
[/av_heading]
[av_textblock size=” font_color=” color=”]
GINTAGBONG
Wala gid niya nalauman nga sia ang hampangan, guyudon padulong sa pil-as kag itagbong nga wala makapangkamras.
Nagsugod sa pulitika si Mayor Jed Patrick Mabilog bilang isa ka persona nga may malawig nga panan-awan. Matayog ang handum kag nagahimakas nga iya nga maagom.
Nangin mapisan, nangin masupog, nangin karismatiko, kag nangin maduagon ang iya nga pagpasimpalad sa patag sang pulitika.
Bilang konsehal pa lamang sadto, masami man kami nga nagakitaay kag nagasugilanon kaangay sang iban. Mamag-an ang iya personalidad, mahapos nga istoryahon, kag mabinugnuhon sa mga tawo nga iya masumalang.
Madamo sang napinsaran kag napasar nga ordinansa, nangin mabinungahon ang iya pagserbisyo bilang konsehal. Naghandum nga magsaka ang posisyon, nagpadalagan bilang bise alkalde.
Nagsipak sang iya banas sang mga Gonzalez, nagbunggo kag nagpangibabaw upod sa bag-o niya pasad nga partido. Madamo sang nag-upod, madamo sang nagsakdag, madamo sang nagtib-ong sa iya kadalag-an.
Nag-abante ang iya kapalaran, ginsumpong ang mga pagpanghangkat, nagpangibabaw kag liwat nga naghandum nga magsaka ang iya posisyon. Nagpadalagan sia bilang alkalde sang syudad.
Sa iya pagkampanya, “Jed Mabilog, ang bise Mayor” ang iya ginasinggit nga ang pakahulugan ‘busy Mayor” ukon masaku nga alkalde, mapisan, kag nagahamdum sang kauswagan sang syudad.
Matapos mataklad ang tuman ka taas nga handum, ginkilala sia nga alkalde sang Syudad sang Iloilo.
Bangod nga yara sia sa gahum, kaangay sang magnet sia ang ginpalapitan, gintipunan kag may likom nga naghandum sang iya kalaglagan.
Ginlauman ayhan ni Mayor Mabilog ang ini nga sitwasyon nga iya karon gina-agunto? Nakasulod man bala sa pinsar niya sang makaisa nga makadangat sia sa sini nga kahimtangan kag maga-atubang sang kaangay sa bukid nga palaligban?
Makapaminsar na siguro si Mayor Mabilog sa karon nga may mga tawo sia nga ginsaligan nga nagtulod sa iya sa kalalat-an. Mga tawo nga sa iya pagpati amo ang naga-amlig sa iya, amo ang nagapakig-away para sa iya, kag handa nga dampigan siya batok sa iya mga kontra sa pulitika.
Ginbutangan sia sang tawo sa iya kilid nga amo ang nagahimu sang pamaagi agud nga maduyan sia sa pagdayaw samtang ginakutkot ang iya ginatindugan.
Ginpalapit sia sa mga tawo nga wala niya nalauman amo ang magahalit sa iya kag magatuga sang daku nga problema. Nabuyo sia bangod sa maayo nga mga handurawon.
Matuod, paano mangin isa ka sala ang isa ka bagay kon ang ginatuga sa imo kalipay. Diri nagsugod ang pag-aslom sang kalamay.
Gin-ila sia sa sitwasyon nga puno sang kalipay, ginpalapit sa gaang sang kalayo, nagmakot kag sia ang nagkalayo.
Sa akon personal nga pagpati, husto si Mayor Mabilog sa pagsiling nga wala sia nagagamit sang ilegal nga droga, wala sia nagabaligya sang ilegal nga droga kag ang iya lang nga sayop amo ang pag-upod sa mga tawo nga sang ulihi natuipan nga mga drug personalities.
Kontani balikan ni Mayor Mabilog ang nagliligad kag ukayon sa iya paminsaron kon sin-o nga iya ginsaligan ang nagtulod sa iya sa sina nga kahimtangan.
Sin-o ayhan ang nagsi-od sa iya liog kag sa sina nga sitwasyon siya ang gintagbong?/PB
[/av_textblock]
[/av_one_full]
