[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=’30’ subheading_active=’subheading_below’ subheading_size=’15’ padding=’10’ color=” custom_font=” av-medium-font-size-title=” av-small-font-size-title=” av-mini-font-size-title=” av-medium-font-size=” av-small-font-size=” av-mini-font-size=” admin_preview_bg=”]
NI ROBERTO ‘BERT’ LADERA
[/av_heading]
[av_textblock size=” font_color=” color=” av-medium-font-size=” av-small-font-size=” av-mini-font-size=” admin_preview_bg=”]
HAMPANG SANG GAHUM
Masupog, may ‘political will,’ ginatuman ang iya napinsaran ilabi na kon para sa kaayuhan sang kadamuan.
Nagpungko si Mayor Jose Espinosa nga ginadayaw sang kadamuan, ilabi na sang mga nagalantaw sa kon ano nga sahi sang liderato ang iya nga ipakita. Nagapamalakpak ang tanan bangod wala sia sang ginabalikid sa paglimpyo sa mga plaza ilabi na yadtong mga nagasablag sa dalan nga mga baligya sang ukay-ukay.
Tuhay nga sahi sang liderato nga nagawahig sa mga kinaandan nga kinaugali ukon gawi. Makabig nga baliskad sa liderato sang iya ginbuslan nga alkalde sang syudad.
Indi mahuyugon si Mayor Espinosa sa liki-liki nga pag-akomodar sa mga nagahingyo sa iya, wala niya ginakabalak-an ang mangin resulta sa iya pulitika kon iya bungguon ang mga punong barangay nga wala nagasunod sa iya pamalakat.
Ginabukho niya nga hatagan sang bag-o nga nawong ang mga plaza, ginpabutagan sang mga masanag nga suga, ginpapinturahan ang mga kudal kag ginpalimpyuhan agud nga mangin angay nga lagawan sang mga pumuluyo.
Matunog ang pamalakpak sang mga naga-obserbar nga mga pumuluyo, matam-is nga mga pagdayaw ang mabatian gikan sa mga kritiko kag naga-amat-amat na sia tuon sa kon paano maghambal kag mag-atubang sa tawo nga kaangay sang isa ka bagayan nga alkalde.
Mismo si Mayor Espinosa ang nagpagwa sang mando nga magtukod sang Special Selection and Evaluation Team (SSET) nga magatsekyar sa performance sang mga executive assistants nga ginpang-appoint sadto ni anay Mayor Jed Patrick Mabilog. Luyag sini hibaluon kon bala nagatrabaho kag angay nga ipabilin sa ila tagsa ka puesto.
Wala man nalipat ang pumuluyo nga ang iban sina sa ila ang mga tinawo ni Congressman Jerry Treñas kag nagatabid sa opisina ni Mabilog kag dira nagakwa sang ila sweldo apang sila ang mga may kabalaslan didto kay Treñas.
Ang pagpalangga yara kay Treñas, ang pag-angga yara kay Mabilog.
Antes pa man nakahulag ang gintukod nga SSET, nag-una na sa pag-reappoint si Espinosa, kag samtang nagahulat sa resulta sang ebalwasyon liwat sia nga nag-anunsyo sang dugang nga ibalik sa ila puesto.
Para ano pa ang gintukod nga SSET kon mahimu man lang sia nga magadesisyon nga wala sang rekomendasyon? Bangod lang indi sia makadirekta kag makatampad sa tawo nga luyag niya kakason sa puesto? Pamaagi bala ini nga maseparar niya ang bato kag ang balas? Pamaagi bala ini niya agud nga ipatudok sa ila nga siya ang dapat kilalahon nga naga-uyat sang gahum?
Manami na ang panugod sang pagdumala ni Mayor Espinosa bangod wala sia sang may ginapasin-o, ang tanan dapat nga masunod sa patakaran.
Apang maathag pa sa butlak sang adlaw nga kon kaalyado sa pulitika, nagapangingkoy na sia kag indi sia makabiya sa landong nga nagapahulag sa iya. Indi niya mabatas nga kakason ang angut sang pusod sang ila mga kaalyado sa kahangawa nga magatipon sila kag mangin potensyal nga kasumpong sa palaabuton nga piniliay.
Ang mga pumuluyo amo ang makaluluoy nga ginakwaan sang inugpatad sang pulitiko sa ila hampang sang gahum sa patag sang pulitika./PB
[/av_textblock]
[/av_one_full]
