Salamat kag reklamo sa serbisyo

MADAMO nga salamat sa PLDT-Iloilo sa madasig nga pag-aksyon sa akon reklamo sang sining ulihi lang.

Salamat man sa maayo nga pag-atubang kag pagtratar sang ila supervising officer sa akon agud ipabutyag  ang akon reklamo personal sa iya sa iya mismo nga upisina.

Luas sa sining akon reklamo – ang pagkadula sang dial tone sang amon telepono – gin-explicar man niya ang reklamo sang madamo pa gid nga mga kliyente nga gindala ko sa iya sa amo man nga tion.

Indi tanan niya nga paathag  aton gin-ugyunan, apang nagapasalamat kita, nonetheless, bisan na lang sa pag-akomodar niya sang aton reklamo didto gid sa iya upisina, samtang nakita naton nga masako siya sa pagtatap sang mga papeles sa ibabaw sang iya lamesa.

Madamo gid nga salamat PLDT. Luyag ko man ugaling athagon ining amon mga reklamo kag iban pa nga madumduman ko sa nagliligad.

***

MAY panahon nga madasig magtrabaho ang Philippine Long Distance Company (PLDT) agud sabton ang mga reklamo sang mga kliyente diri sa siyudad sang Iloilo.

Sa matandaan ta, sa panahon ini sang indi pa uso ang internet connection diri sa siyudad. Sa amo man nga panahon, ang problema sang mga kliyente gina-atipan mismo, sa aton pagpati, sang mga empleyado sang PLDT-Iloilo.

Manawag ka lang sa ila upisina kon may problema parti sa inyo telepono kag dayon ma-aktuhan ini sang mga repairman sang PLDT dira mismo sa ila lokal nga upisina.

In fact, ini nga madasig nga pagsabat sa mga reklamo personal gid naton na-ekseryensyahan sadto.

Sang ulihi ugaling, labi na gid sang mag-uso ang internet connection sa madamo nga puluy-an, nangin inutil na ang pag-serbisyo sang PLDT sa mga reklamo.

Una seguro nga rason amo ang pagpa-kontrata sang PLDT sa isa ka service outfit nga may kaugalingon nga mga tinawo nga bulag sa pagpamuno sang PLDT.

Nagagwa nga ang ining service outfit wala gali sing ikasarang sa pagpatuman sang ila obligasyon agud serbihan kag sabton ang reklamo sang mga kliyente sing nagakaigu.

Ang suspetso naton nga ining service outfit nalakip sa mga labor-only nga mga kompaniya nga ginatumod sang DOLE sa Labor Code nga wala sing ikasarang sunu sa gina-requirer sang kasuguan agud mapatuman ang ila obligasyon sa ila mga empleyado kag bisan sang ila gin-kontrata nga serbisyo.

May bag-o nga problema nga nag-ulhot pagkatapos sini – ang pag-centralize na sang serbisyo sang PLDT halin sa ila Manila Office nga gamit gihapon ang service contractor.

Sa karon, kon magtawag ka for repair, ang nagasabat gani tagalog na kon maghambal. In other words, ang imo reklamo mahalin pa sa Manila Office kag magapanaog pa sa kon diin tubtub mag-abot sa lokal nga upisina.

Kis-a sang nagreklamo ako, naaktuhan ang amon reklamo sang malapit isa ka semana. Sang liwat nagreklamo ako, nagkadto na ako sa ila upisina diri sa Lapaz. Aba, tatlo lang ka oras kag naaktuhan dayon ang akon reklamo! In other words, mas madasig kon direkta mag-akto ang lokal nga upisina.

Parti sa problema sang publiko, sang sini lang, ang reklamo yara sa kakulangan sang empleyado nga nagatatap sa mga nagareklamo.  Madasig matuod ang pagsabat sa reklamo sang mga senior citizen, apang ang iya sang publiko, sa kabug-usan, nagaigud.

Sa lima nga dapat mag-atubang sa publiko, isa lang ang nag-ulhot sang mga a las diyes na. May nag-abot pa nga isa sang mga 10:30 sang aga. Tungod sini, madamo ang nag-kulumoron.

Nalangkag ako sa sining problema, kag ginsakop ko na ang pagreklamo sa sining problema sang nakigkita na ako sa supervising officer.

Ang sabat sa akon sa sining problema sang publiko amo nga nag-leave ang tatlo ka empleyado.

“Kinahanglan man magpahuway-huway ang amon mga empleyado,” paathag sang supervising officer.

Nadumduman ko ang akon subject sa mangement. Diri gintun-an namon kon ano ang maghatag sang maayo nga serbisyo sa mga kliyente.

Aba, daw wala ini sa manual sang PLDT! Dapat tani nga sa amo sina nga problema – ang pag-leave sang pila ka empleyado – may mga under-study nga magabulos  sa ila.

Tungod sini, indi kita matuod matingala kon ngaa may subong nga problema sa PLDT-Iloilo. (w_mateojr@yahoo.com/PN)

LEAVE A REPLY

Please enter your comment!
Please enter your name here