UNDERSTANDABLE ang hingyo sang Isambayan upod kay VP Leni nga mag-unite ang mga opposition group agud malutos ang mga kandidato ni Presidente Duterte sa Mayo 2022 nga eleksyon.
Unfortunately, indi na ini matigayon kay gusto na lang sang sining iban nga grupo ang magtukod sang ila kaugalingon nga mga kandidato.
Kon indi na magliwat pa ang ila plano, magwa nga may apat ka opposition group – ang ila nanday VP Leni Robredo, Senador Ping Lacson, Senador Manny Pacquiao, kag Manila Mayor Isko Moreno.
Daku nga problema bala ini nga sitwasyon para sa ining apat ka grupo sa oposisyon? Depende.
Hambalon pa: “United we stand; divided we fall.”
Duha ka bagay ang paghangop naton sini – nga ang “common enemy” pierdihon sang tingub nga pwersa; ukon, conversely, dag-on gihapon sang “common enemy” ang tingub nga pwersa.
Pwede man pierdihon ang “common enemy” sang bisan wala nagaululupod nga mga kasumpong.
***
Mahapos naton mahangpan ining sitwasyon paagi sa simple nga mga ejemplo.
Butang ta abe nga may pwersa nga 10 ang Duterte group, sa pagpati nga mabaskug gihapon ini – although indi na subong – kag ang kada isa sa apat may pwersa lang nga 3.
Ang tingub nga pwersa sang apat amo ang 12 (3 x 4). Natural lang nga lutoson sang apat nga 12 ang pwersa ang Duterte group sa pwersa sini nga 10 lang.
On the other hand, pwede magdaug ang Duterte group sa pwersa nga 10 kon ang tingub nga pwersa sang apat amo lang ang 8, sa pwersa nga 2 sang kada isa.
Ano naman ang posibilidad sang pagdaug sang apat nga wala nagatingub batok sa Duterte group nga may pwersa nga 12 kag ang kada isa sang apat may pwersa nga 3?
Tungod wala sila nagaupod, ang kada isa makagamit sing lubos sang iya pwersa nga 3.
Kag tungod ang kada isa may kaugalingon nga tindug batok sa Duterte group kinahanglan gid atubangon sini ang apat nga kasumpong sa “4 fronts”, kon diin ang pwersa sini mahulog lang sa 3 (12 divided 4) sa kada “front” nga kaya na lupigon.
Gapadumdum ini sa aton kon paano ang diutay nga hangaway ni Alexander the Great nagdaug batok sa daku nga Persian Army paagi sa pagpihak-pihak sini.
So, patas na sila sa panugod, 12 vs 12. Kag magdag-anay na lang halin sa patas.
Tungod ugaling padayon nga pulihan ang Duterte group sang apat manghina ini kag malutos na gid lang.
Mabilin na lang ang apat nga mag-kumpetensya sa kadamuon sang ila sumulunod, kontra isyu kag stratehiya sa pagkumbinse sang mga botante, sa kabug-usan.
Sin-o ayhan ang madaug sa ila kag sa ano nga talaksan?
Isa ka talaksan amo kon sin-o ang ginakahamut-an nila – sa ano man nga rason – nga indi ta man matudluan ang mga pumuluyo.
Subong man kon sin-o gid ang nagadala sang matuod-tuod nga mga isyu agud sikwayon sang mga pumuluyo ang mga kandidato ni Presidente Duterte?
Ano gid ang liderato sa panghimanwa ang bagay – ang puro lang isug kag may pagka-Dirty Harry, ukon ang may pag-taha sa kasuguan, sa kababaehan, kag sa Diyos nga importante gid sa aton Diyosnon nga pungsod?
Sin-o gid bala sa ila ang may matuod-tuod nga pagpalangga sa aton pungsod kag makapangapin sing husto sa aton mga kinamatarong sa West Philippine Sea?
Sin-o gid bala ang matuod-tuod nga may pag-ulikid sa Demokrasya kag Kahilwayan nga gindak-an naton halin pa sa aton kalolohan, gindaug liwat batok sa martial law nga rehimen ni Marcos, kag luyag pasanyugon liwat sa pagtaliwan sa poder ni Presidente Duterte nga may pagka-Marcos man sa paggamit sing poder?
Kag sin-o bala ang nagapabungol-bungol kag nagapabulag-bulag lang sa mga kalainan sang subong nga gobyerno agud indi siya mapahilabtan sini, gali kay dugang pa gani ginapadaug ini?
***
Natural lang sa mga pumuluyo nga luyag sang bag-o nga gobyerno ang botohon ang may pihu kag maathag nga tindug batok sa indi maayo nga pagdumalahan sang subong nga gobyerno.
Si VP Leni bala ini kag iya mga kaupod nga gadala sing hayahay sang tuod-tuod nga opposition sa mga isyu nga ila ginadala? Ukon sin-o sa ila dira nga luyag maglangoy sa nagabulos-bulos nga sulog nga wala sing piho kon diin nga pangpang matakas?/PN
