PENSAR ko anay neutral, ukon wala pinilian, ang serbisyo sang mga ospital sa pagtatap sang ila mga pasyente.
Syempre, indi lang sa ila kinahanglanon agud matatap sa kon ano man nga sablag ukon balatian nga ila ginapadangat sa ospital, kundi pati man ang makapahalipay sa ila, katulad sang pagtan-aw sa ila paborito nga programa sa TV.
Pero, kon matuod ang reklamo sang isa ka pasyente sa isa ka private room sa isa man ka pribado nga ospital, nga indi lang ugaling niya luyag hingadlan, makatan-aw ka lang diri sang mga programa sa TV sa isa gid lang ka channel.
Kon matuod, masubo matuod ini. Kay sa lugar nga mabuligan ang pasyente agud maumpawan sa iya ginabatyag basi maglala pa kay magalain lang ang iya buot.
Ina tungod indi niya matan-aw ang paborito niya nga programa sa TV, labi na gid kon ang ginapatan-aw sa iya indi gid niya maluyagan.
Personal sa akon, nagatan-aw ako sa programa nga naluyagan ko kag indi tungod tutok lang sa isa ka TV channel. Ang paborito ko gid nga mga programa ang yara sa ugto. May masadya. May komedya. May bastante nga mga premyo nga makabulig sa madamo nga pigado. May human interest. May leksyon nga makuha, kag iban pa.
Kon kis-a, ugaling, may wala man ako sing maluyagan dira, labi na gid kon binastos nga makapalain sa mga kabataan nga makatan-aw. Gilayon ako sina magsaylo channel kag magbalik lang ugaling sa channel nga naluyagan ko.
Tani, ma-intiendihan ining problema sa luyag tan-awon sang mga pasyente sang sining pribado nga ospital.
***
To be fair sa sining ospital, naluyagan ta man ang serbisyo sini. Matinahaon kag pirme lang maaliwalas ang mga nawong ang iya empleyado halin sa security guard tubtub sa nagatatap sa mga kwarto sang pasyente.
May naga-āGood Morningā kag maabtik magsabat kag bisan magtudlo personal sa gapabulig nga mga bisita.
Orderly kag limpyo ang tanan nga halos wala ka sing masimhutan nga indi amo sa bisan diin nga kanto. Maluag ang mga alley nga makapasulhay sang paginhawa sang bisan sang nagabakho nga mga nagaduaw sa mga nalisdan nga mga pasyente. Matahum ang mga talan-awon sa palibot sang ospital sang madasig nga naga-ugad nga siyudad sang Iloilo.
In other words, ang ining ospital isa ka quality medical facility sa diin matatapan ka gid sing maayo, luas lang sa sining reklamo sang pagpagwa sang isa gid lang ka TV channel nga makapalain sing buot sang pasyente nga may paborito nga talan-awon sa iban nga channel.
Tani indi lang pagdid-an ang mga pasyente sang ila luyag tan-awon sa TV nga makapahalipay sa ila. Man makabulig man ina padasig sang ila pag-ayo tungod malingaw sila sa pagtan-aw sa ila paborito nga TV program sa kon diin nga channel nga luyag nila. (w_mateojr@yahoo.com/PN)
