BASI kuno mangin magamo ang pagpamuno ni Marcos Jr. kon magdaug siya sa pagka-Presidente tungod indi kuno mabaton sang madamo nga grupo nga gamhan naman ang pungsod sang isa pa ka Marcos.
Kon matabo, malingin naman ang ulo sang mga pulis kag mga soldado sini sa pagpangapin sa pangulo.
Segurado naton nga indi ini magahalin sa suod nga grupo ni VP Leni Robredo nga advocate sang “rule of law”, wala naga-fake news kag wala nagabinastos sa kampanya.
Pero ugaling ngaa ang pagdaug ni Marcos Jr. ang istoryahan ta? In fact, gapati ang madamo nga, in the long run, si VP Leni gid ang magadaug.
Ginpierde gani niya si Marcos Jr. sadtong encuentro nila sa pagka-Bise Presidente sadtong 2016 nga ulihi man siya sa survey. Karon pa nga mas mabug-at na ang mga isyu batok sa iya kag sa ila pamilya!
Sa madumduman ta pa, nagdaug si Presidente Duterte samtang ika-apat lang siya sa political survey padulong sa aktwal nga inisipay. Ina man ang natabo sa kay US President Roosevelt kag Presidente Truman. Natabo ato tungod sa ulihi nga mga tinion nahibal-an sang mga bumoloto ang matuod-tuod gid nga mga isyu kag kon kay sin-o endorsement ang dapat nila patihan.
***
Of course, indi ta man mabasol ang madamo nga mag-tomar gihapon sing gutgut sa mga Marcos tungod sa malain nila nga nadangtan sa mapintas nga kuko sang martial law, nga sa kampanya ni Marcos Jr. ginadayaw pa gani sini kag sang ila pamilya.
“Golden Age”, sunu sa ila, atong pasista nga pagginahom ni Marcos Sr. tungod kuno sa madamo nga reporma nga gindala sini. Tuod?
Imposible! Indi ka gani sadto makapanginaon sing husto kag magutman pa tungod sa kahadlok sa mabangis nga mga soldado ni Marcos. Sr.
Ang nalipay sa pagbalik sang Demokrasya kag Kahilwayan, nga bunga sang bloodless Edsa Revolution, may kahadlok man gani sa pagdumdum nga basi ibalik naman ang pasista nga pagginahom sa idalom ni Dayunyor, gani indi gid sila magboto kay Marcos Jr.
***
Tungod sini, wala sing kahulugan para sa ila ang panawagan ni Marcos Jr. sing “unity” sang mga pumuluyo sa idalom sang isa ka Presidente Marcos Jr.
Sa matuod, sunu sa ila, luyag lang ni Marcos Jr. ihinago sa ining iya panawagan ang kasal-anan sang ila pamilya sa mga pumuluyo. Wala pa gani nila mauli ang daku nga bahin sang ila binilyon nga ill-gotten wealth, nga gin-confirm sang Korte Suprema.
In fact, abusado pa ini sa indi pagbayad sang buhis sadtong 1982-1985. Tuman ka importante ining buhis sa kabuhi sang gobyerno kag sang mga pumuluyo. Did-an mo sini ang gobyerno kag wala sing gobyerno nga matukod kag wala sing programa sa kaayuhan nga pwede mahatag sa mga pumuluyo.
In other words, kon may “unity” nga dapat ugyunan ina ang pag-ugyon sang matarong mga mga pumuluyo agud awayon ang “corruption” kag “abuse of power” sang mga Marcos sa isa ka away nga “The good vs The Bad” ni VP Leni batok sa kandidatura ni Marcos Jr.
Katulad bala sa away sang matarong (Good) naton nga Diyos batok sa mga indi-matarong (Evil) nga mga anghel sa ila sala nga pagpati nga mataas pa sila sa Diyos.
Indi kay sa sugyot ni Bad Marcos Jr. nga updan siya sa dalok sa poder nga Marcos Dynasty batok sa Diyosnon nga VP Leni!
-0-0-0-
Makakululba na matuod sa tanan nga mga kandidato ang nabilin pa nga tatlo ka bulan sang kampanya, labi na gid ang para sa pagka-Presidente.
Mas importante sa karon ang “bundled votes”, ukon ang tingub nga boto sang interest groups kag credible endorsements, sangsa indibidwal nga boto sa mga political survey nga dala lang sang “bandwagon effect” sang mga abyan sa social media kag binayaran kag fake nga “influencers”.
Ang mga endorsement nga indi credible makapalain pa gani sa kandidato. Katulad sang endorsement sang isa ka pastor nga may kulintas nga mga kaso sa United States.
Lakip sa iya mga kaso ang US dollar smuggling, sex trafficking, fraudulent marriage, kag pakig-sex sa mga kabataan nga indi makabalibad tungod sa pamahog sing “eternal damnation”.
Ti, makasugod na kita seguro sa pagpamensar sing maayo kon sin-o gid ang bagay botohon. Makabulig man ang pagpangayo sing enlightenment sa Ginuo kon sin-o gid sa ila ang botohon. God help us!/PN
