Wala da sing sala si congressman

ANG Panay News, wala sing duha-duha, ang pinaka-fightingest nga pahayagan sa rehiyon sa pagdampig sa mga lupig kag sa pagpakig-away batok sa mga anomaliya kag salawayon sa gobyerno.

Isipon n’yo lang ang sobra 100 ka kaso nga libel nga napatupa sa Panay News kag ang madamo nga death threats, kag makapati gid man kamo seguro sa aton pagkilala sa sining kalidad sang Panay News.

In fact, ang ining maisug nga pagserbisyo sa mga pumuluyo wala gid malingkang bisan pa sa pagtaliwan na sang isganan nga founder sini nga si Daniel Fajardo kag sa pagsaylo na sang pagdumalahan sang Panay News sa iya anak nga si DAN FAJARDO.

Panay News Forever, siling gani ni Dan, kag sang Chairman of the Board nga si Atty. Elijah Fajardo, magulang ni Dan kag subong presidente sang Integrated Bar of the Philippines.

Sa karon gali, nagapadalagan si DAN FAJARDO sa pagka-konsehal sang banwa sang Pavia, Iloilo sa palaabuton nga eleksyon sa Mayo 2019.

Kag segurado dalhon ni Dan ang ining kawsa sang Panay News sa iya panghimanwa, nga naluyagan gid updan sang aton mga pumuluyo sa madugay na nga pag-serbisyo sang Panay News sa ila.

Sa iya pagdalagan sa pagka-konsehal sa Pavia, yara si Dan sa grupo ni Cong. Toto Defensor nga nagapadalagan sa pagka-gobernador sang Iloilo.

Wala sing duha-duha nga dala man ni Toto Defensor ang legasiya sang pagdulot sang matarong kag mabungahon nga pag-serbisyo sa banwa sang iya amay nga si Gob Defensor.

***

Indi pirme ang tindug legal santu sa tindug moral. Amo gani kon kis-a may mga bagay nga legal ang indi makumpormihan sang Simbahan kag mga moralista sa sosyedad.

Sa masami ugaling, may mga pagsulundan legal nga sunu man sa pagtudlo moral sang Simbahan Catolica, nga ang tumuluo nagalakip sang mga 80 ka porsyento sang aton populasyon.

Lakip na diri ang pagsulundan kon ano ang paghusgar sa isa ka akusado.

Sa pagtudlo sang Simbahan, nga segurado upod diri ang aton man mga otoridad sa kasuguan, tatlo ka kondisyon ang balasehan sang dapat pagpamatbat sa isa ka akusado.

Ang ining tatlo ka kondisyon amo ang masunod:

(1) kon ano kabug-at ang pagpakasala

(2) kon ano kasanyog ang ihibalo sa nahimo nga sala, kag

(3) kon bala bug-os ukon indi man bug-os ang pag-kunsinte, ukon pagpasugot, sini sa ginhimo nga sala.

Sa idalom sining mga kondisyon, ang sala pwede mamag-an ukon mabug-at, ukon wala gid sing sala ang akusado.

Sa kaso ni Cong. Jerry Treñas, gapati kita nga posible wala gid, ukon mamag-an, lang ang sala sini sa padayon karon nga pagtuon sang Sandiganbayan sa iya kaso, nga pwede  man kalimtan lang gani ukon maareglo lang. Ngaa man?

Ang kaso kontra kay congressman nag-ugat sa tseke nga ginpangabay ni Senadora Loren Legarda nga ihatag sa Iloilo Press Club agud ipatindug sang ila building, nga ang daku nga bahin sini gin-amutan pa gani sang negosyante nga si Rommel Ynion.

Ginhatag ini kay congressman sa pagpati nga wala sing problema ang paghatag sini sa IPC, nga sang ulihi nahibal-an nga nalipat gali ini sa pag-sumiter sang mga required nga papeles sa Securities and Exchange Commission.

Diri na nagtuhaw ang ini nga kaso sang kuno ilegal nga paghatag sang bulig ni Senador Legarda paagi kay congressman.

Por Dios por santo, ano abe ang sala ni congressman kay nag-serbe man lang siya nga tagdala (courier) sang sining bulig ni Senadora Legarda.

Isa pa, ginhimo niya ini sa pagpati nga wala man sing problema ang status sang IPC sa pagpapati man sa iya sang indi man niya maduha-duhaan.

Ikatatlo, indi gid daku ini nga kakulangan sang IPC tungod ang mga opisyales sang IPC nalimot lang nga wala nila gali ma-sumiter ang tanan nga requirement sang Securities & Exchange Commissison.

In fact, pwede gani nga gin-requirer lang ang IPC nga isumiter ining mga requirement nga wala nila ma-sumiter kag tapos na ang problema, indi bala?

Na-areglo gani ang kinawatan nanday Marcos nga binilyon-bilyon nga wala sing isa sa ila ang napriso, ini pa nga mga P500,000 lang kag bulig pa sa pagpasanyog sang kinahanglanon ta nga Press Freedom sa pungsod? (w_mateojr@yahoo.com/PN)

LEAVE A REPLY

Please enter your comment!
Please enter your name here