Ang away sang MORE kag PECO sa korte

ANG selebrasyon sang PYESTA MINATAY natalana sang Simbahan Catolica para sa iya mga tumuluo sa Nobyembre 1 (All Saints Day) kag Nobyembre 2 (All Souls Day). Sa masami ugaling, ginaupdan man ini sa pag-selebrar sang iban nga may tuhay nga pagtuo.

Sa matuod, ang Nobyembre 1 natuon lang sa pagpadungog sa nalista nga mga santos sang Simbahan Catolica kag ang nakalista man sa Langit nga wala sa lista sangSimbahan, lakip ang mga kalag sa Purgatoryo nga lubos na “nahugasan” ang ila kasal-anan.

Ang Nobyembre 2 natalana naman para sa tanan nga kalag nga wala pa makasulod sa Langit, nabilin pa sa Purgatoryo, kag nagahulat pa mahusgaran sa Judgment Day sa pagbalik ni Ginuong Hesukristo.

Madamo ugaling nga himata ang naga-selebrar sang Pyesta Minatay sa Nobyembre 1, sa paglaum nga nakasulod, ukon manugsulod na, sa Langit ang mga nagtaliwan nila sa bugay sang daku nga gugma sang Diyos.

Kon sa ano man nga petsa ang pag-selebrar naton sang Pyesta Minatay, ang importante nga indi kita malipat sa aton mga nagtaliwan kag mahalaran sila sang espesyal nga pangamuyo sa Diyos para sa ila lubos na nga kaluwasan.

Importante man nga dumdumon naton sa sini nga adlaw ang posible madangtan naton – halin sa aton kamatayon  tubtub sa paghusgar sa aton kalag, kag kon bala ang aton madangtan amo ang padya sang Langit ukon silot – kag manakga (resolve) sa pag-usoy na sang tadlong nga dalan.

***

Masadya ang ining kaso sang Panay Electric Company (PECO) kag MORE.

Ang MORE nag-file sing petition agud i-take over ang mga assets (propiedad) sang Panay Electric Copany (PECO), pagkatapos gin-aprubahan sang Kongreso kag ni Presidente Duterte ang application sini para sa isa ka franchise agud mag-operate bilang distributor sang kuryente sa Iloilo City, pagkatapos nga nag-expire na ang franchise sang PECO sadtong Enero 18, 2019.

Gin-ignore sang Kongreso ang application for renewal sang PECO nga 96 anyos na nga naga-serve sa Iloilo City sugod sadtong 1923.

Gintagaan na gani sang Department of Energy sing temporaryo nga Certificate of Public Convenience ang PECO agud makapadayon sa pag-operate sa sulod pa sang duha pa ka tuig pending sang formal nga takeover na sang MORE.

Gin-kwestyon ini sang PECO. Sa motion sini for reconsideration, ang Mandaluyng RTC 209 naghulog sadtong Hulyo 1, 2019 sang ruling nga “void and unconstitutional” ang franchise sang MORE. Nag-issue man ini sang permanent injunction ang Mandaluyong RTC 209 agud indi mapatuman ang franchise sang MORE.

Ginbalabagan ini sang MORE sa isa ka motion for reconsideration sa Korte Suprema, nga tubtub karon ginatun-an pa sang naulihi.

Samtang nag-file na ang MORE sing petition agud i-take over na ang assets (propiedad) sang PECO sadtong Agosto 14, 2019 sa ruling ni Iloilo RTC 37 Judge Marie Yvette E. Go sa idalom sang Petition for Expropriation sang nauna.

Ginbalabagan man ini sang PECO sa isa ka motion for reconsideration.

Meantime, nag-inhibit si Judge Go sa rason nga “conflict of interest”. Ginbuslan siya ni RTC 35 Judge Daniel Antonio Gerardo Amular.

***

Medyo unique ining kaso sang Iloilo RTC 37 kag Mandaluyong RTC 209. Pareho nila gin-aktuhan ang problema sang franchise bilang electricity distributor, apang naghulog sang conflicting ruling.

Ang RTC 37 naghatag sing poder sa MORE agud i-takeover na ang PECO bilang electricity distributor sa siyudad, samtang ang Mandaluyong RTC 209 kontra diri sa iya ruling nga “void and unconstitutional” ang franchise nga ginhatag sa MORE sang Kongreso.

Ang problema matuod kay indi masiling nga may “primary jurisdiction” ang kon sin-o sa ila, kay pareho sila nga mga Regional Trial Courts nga may patas (parallel) nga jurisdiction.

Gani, maggwa diri nga aktuhan na gid lang ini sang Korte Suprema sa iya “exclusive jurisdiction” sa kaso.

Ipatawag na gid lang seguro sang Korte Suprema ang Iloilo RTC 35 kag Mandauyong RTC 209 agud resolbahon kon sin-o gid ang husto sa ila.

Kon madesisyonan sang Korte Suprema nga depektoso matuod ang franchise nga ginhatag sang Kongreso sa MORE, ang gwa sina nga ibalik ini sa Kongreso agud makorekan. Ukon basi mapamatian pa ang PECO sa iya application for franchise renewal.

Pero kon magdaug ang Iloilo RTC 35, ti tapos na ang binayle para sa PECO. ([email protected]/PN)

LEAVE A REPLY

Please enter your comment!
Please enter your name here