MADAMO sang nagtinguha nga makapadulong sa luwas dala ang handom nga makatibawas apang ang ila nasugata amo ang daku nga ka demalas.
May mga Ilonggo nga overseas Filipino workers (OFW) nga madugay na nga nagatrabaho sa luwas kag may yara man sang halos isa pa lamang ka bulan nga nakalab-ot sa iya destinasyon agud magtrabaho apang ginpanugyanan na nga magpauli bangud sa pandemya dala sang COVID-19.
Magluwas sa sini nga pandemya, madamo pa sang sahi sang problema nga ginapangatubang sang aton mga kasimanwa. Matuod gid nga nagapasimpalad sila kag wala may nakahibalo kon ano nga swerte ang ila maabtan sa lugar nga ila ginapadulungan.
Matuod man nga indi tanan nga OFW ang may maayo nga sitwasyon. May pila sa ila nga nakasalapu sang indi maayo nga amo, mga mapintas, mga wala sang kaluoy, kag manubo ang paglantaw sa mga Filipino. Ginasakit sila, ginapagutman, gina-abusuhan kag ginadalukan sang ila limitado nga kahilwayan.
Bulahan ang mga nakasalapu sang maalwan, mabuot kag tawhanon nga mga amo. Maswerte ang pangabuhi sang aton mga utod nga OFW.
Bangud sini nga sitwasyon, gintalupangod sang 13th Sangguniang Panlalawigan ng Iloilo ang kahimtangan sang mga Ilonggo nga OFW kag residente sang probinsya sang Iloilo.
Luyag sang probinsya nga makahatag sang bisan gamay lang nga ayuda sa mga nawad-an sang palangitaan sa luwas sang pungsod.
Gin-aprubahan sa Third and Final Reading sa 72nd Regular Session sang 13th Sangguniang Panlalawigan ng Iloilo ang Proposed Provincial Ordinance No. 2020-09-13 nga may tigulo “An Ordinance Providing Financial Assistance to Repatriated Overseas Filipino Workers and Providing Funds Thereof.”
Suno sa author nga si 3rd District Board Member Jason Gonzales nga may P21 million nga alokasyon ukon P4.2 million sa kada distrito agud mahatagan sang 10 mil pesos ang mga Overseas Filipino Workers nga residente sang probinsya nga nadulaan sang trabaho sa luwas bangud sa political unrest, civil war, natural calamities, ginmaltrato sang foreign employer, nagmasakit, ukon naaksidente.
Agud nga makabaton sang ayuda, kinahanglan nga pun-an ang application form, ipakita ang flight ticket ukon boarding pass, pruweba sang overseas employment, pruweba nga nadulaan sang trabaho, sworn affidavit nga wala sang may nabaton nga financial ukon credit assistance gikan sa host country, repatriation documents, kag barangay residency certificate.
Ginsiling sini nga indi tanan nga OFW ang nagaganar sang “six figures” kag kalabanan sa ila mga domestic workers nga nagaganar sang kabus sa 25 mil pesos kada bulan.
Masobra na 17,000 ka mga Ilonggo OFW ang napapauli balik sa pungsod sa nakalipas nga mga bulan. Madamo sang pamilya nga bag-o lang nakaginhawa sa kapigaduhon ang liwat naman nga nagbalik sa kapurauton.
Katuyuan sang sini nga ordinansa nga mabuligan ang mga OFW nga ang damgo narumpag bangud sa wala ginalauman nga mga sikumstansya nga nagaabot sa ila kabuhi.
Kabangdanan nga ang paghatag sang ayuda ang indi lamang bangud sa ginaagunto nga pandemya kundi lakip man ang iban pa nga kabangdanan nga indi makontrolar sang OFW nga nagaresulta sa kawad-an sang pangita.
Masubo pa kon ang OFW ang madamo sang utang sa iya pagbiya sa pungsod bangud sa gingasto sa pagproseso sang iya papeles kag pagparik-parik sa mga ginakadtuan nga opisina. Kon mawad-an siya gilayon sang trabaho ukon ginpapauli, palaligban para sa iya kon paano mabayaran ang iya ginpanghulaman sang kwarta. Nagatuga ini sang sakit sa ulo kag nagaresulta sa depresyon.
Bangud sini, kinahanglan nila nga alalayan sa ila ginaabaga nga kahimtangan. Kinahanglan nila sang may masandigan agud indi sila mapuklid sa pagpaminsar sa naagom nga kapalaran.
Lauman naton nga sa tion nga mag-umpisa na sa pag-epekto ang ini nga ordinansa, madamo sang mga OFW nga residente sang probinsya ang makaagom sang benepisyo.
Kuntani, gamiton nila sang lubos ang ini nga bulig pinansyal agud nga mas mapatin-ad nila ang ila pangabuhi. Bisan gamay lang ang kantidad, apang kon kahibalo sila mag-usar mangin maayo ang madulot sini nga benepisyo sa ila kabuhi.
Aton lang ipangabay nga mangin tayuyon ang ini nga katuyuan sang ordinansa, mangin programa kag mapondohan sa kada tuig agud nga may mabaton ang mga OFW nga ginkulabos sang swerte sa ila pagpasimpalad didto sa luwas sang pungsod.
Panugod pa lamang ini kag ginalauman nga mangin positibo ang pagbaton sang mga pumuluyo kag ila tuytuyan ang ila mga kakilala nga OFW kon paano makaagom sang sini nga ayuda gikan sa Iloilo Provincial Government. (bertladera@gmail.com/PN)
