‘Bad Samaritan’ ang gobyerno sang Kuwait

AKIG ang mga otoridad sang Kuwait kay gin-rescue sang aton embahada ang aton mga OFWs nga domestic helper nga yara sa katalagman, labi na gid ang mga gareklamo sang panglugos kag pagpamintas sang ila mga amo nga Kuwaiti.

Aba! Kag gin-deklarar pa nila ang aton embahador nga si Renato Villa nga persona non grata tungod ginpa-rescue ining aton mga OFWs.

Nakibot gani ang aton Department of Foreign Affairs sa idalom ni Secretary Alan Peter Cayetano sa sining hitabo. Ina tungod, bag-o sini, nahisugtan na gali sang embahador sang Kuwait kag ni Cayetano nga mag-pasensyhanay na lang pagkatapos nga nag-obligar man mangayo sing pasaylo ang Pilipinas.

Sa matuod, wala sing kinahanglan nga mangayo sing pasaylo ang Pilipinas sa pag-rescue sang sining mga OFWs. Sa ngalan ugaling sang padayon nga mayo nga pagtinamdanay, nag-obligar sa pagpangayo sing pasaylo ang Pilipinas.

Sunu sa special rescue team sang aton embahada sa Kuwait, ginapahibalo man nila ang Kuwaiti nga mga pulis sa ila operasyon kag nagapangayo pa gani sila sang pagbulig sini kon kinahanglan gid.

Kon sa pila ka tion nga indi mapahibalo dayon ang Kuwaiti police, ina tungod sa emerhensya nga sitwasyon nga kinahanglan na sugaton ang mga biktima sa puluy-an mismo sang ila mga amo agud, sa madalian, malikaw sila sa segurado nga kapahamakan.

Ining emerhensya nagalakip sang akto sang pagpanglugos kag pamintas pisikal sang ila mga amo nga kinahanglan ilikaw na sila sa embahada sang Pilipinas ukon dalhon na sa ospital.

Tubtub sadtong Abril 7, mga 26 na ka OFWs ang natabangan sang rescue team nga may pitu ka katapo. Mga 200 pa gani ang nagpalab-ut sang ila panawagan nga ma-rescue.

***

Indi mahangpan seguro sang gobyerno sang Kuwait kon ngaa ginahimo ini (ang pag-rescue) sang embahada sang Pilipinas sa mga OFWs naton nga yara sa katalagman. Ina seguro tungod lain iya ang ila pamatasan sa pagtratar sa mga suluguon sang sa aton. Kay harianon sila, daw eksclabo lang seguro ang panan-aw nila sa ila mga suluguon nga puede nila abusuhan.

Pero indi ini naton ginapasugtan. Ipapatay na lang bala naton ang aton nga mga kasimanwa sa kapintas sang ila amo nga Kuwaiti? Ukon indi gani pabay-an na lang nga ma-rape sila? Ukon indi gani piliton sila saylu-sayluhon sa mga amo nga indi nila luyag kay luyag na gani nila magpauli kay tapos na ang ila kontrata? Nevah!

Indi na iya pwede sa aton sa idalom sang aton Kristiyahanon nga pagtamod sa pareho naton. In fact, indi pwede pabay-an diri sa pungsod ang sin-o man nga gakinahanglan sing bulig.

Sa aton Christian value sa idalom sang ejemplo sang isa ka Good Samaritan nga ginatudlo sa Bibliya, obligasyon naton ang magbulig sa kon sin-o man nga yara sa katalagman, labi na gid kon wala sing iban nga makabulig sa iya.

Ang Article 275 sang Revised Penal Code (Paragraph 1 and 2), por ejemplo, nagaathag gid gani sang salabton sang isa ka tawon ga mag-abandonar kag magpatumbaya sa isa ka biktima nga wala sing iban nga mabulig.

Kon wala ini gintagaan sing respeto sang gobyerno sang Kuwait, kag nagapakalain pa sang matahum nga ugali sang mga Pinoy nga magbulig sa kapareho, wala kinahanglan nga makig-upod kita sa ila, labi na gid ang mag-serbisyo sa ila mga harianon kag mapintas nga mga amo.

Dapat tani buligan pa sang gobyerno sang Kuwait nga maluwas sa katalagman ang aton mga kasimanwa kay ina sila obigasyon nila agud amligan kag ipalayo sa katalagman tungod yara ini sa ila pag-inakop.

Tungod sini, sugot ako sa panugyan na sang Presidente nga himuon na nga permanente ang pag-ban sang deployment sang mga OFWs sa Kuwait, labi na gid ang mga nagatrabaho dira bilang domestic helper.

Sa matuod, di bale diutay ang maganar diri sa pungsod sang sa tratahon nga daw mga esklabo kag pintasan lang sang mga wala huya nga mga amo sa Kuwait. (w_mateojr@yahoo.com/PN)

LEAVE A REPLY

Please enter your comment!
Please enter your name here