Bagay nga disiplina sa mga kabataan

WALA sing permanente nga bagay kundi ang pagbag-o! “There is nothing permanent except change,” siling gani ni Heraclitus, isa ka Greek philosopher, sa English.

Ginakilala naton ining kamatuoran. Ang tawo nagabag-o upod sa panahon kag sa klase sang sosyedad nga iya ginaluntaran. Ang eksperyensa sang aton mga kalolohan lain man sang ila kabataan kag sang

ila kaapohan.

In fact, ang aton sosyedad lain na gid sa karon. Ang masubo kay tam-an na gid ka problemado sa karon ang pagpadaku naton sang mga kabataan.

Kon indi nagaupod sa salawayon nga mga gang, gasulod pa ini sa mga bisyo nga makapalain sa ila, lakip na gani ang pag-entra sa ilegal nga droga, tungod sa ila problema sa ila panimalay nga nagatulod sa ila agud mangin anti-social kag mangin kaaway sang malinong nga sosyedad.

Naglala pa gani ining pamatasan sang mga kabataan tungod sa halog nga disiplina nga ginapatuman sang aton mga kasuguan. In fact, halos indi na makadisiplina ang mga ginikanan sa ila nga kabataan. Mapitik mo lang ang dulunggan sang bata mo mapriso ka na. Ang imo pa bata ang maakusar sa imo!

***

Didto kita sang Martes sa media forum nga ginhiwat sang Task Force on Moral Values sang siyudad sang Iloilo upod sa DSWD kag kapulisan kag iban pa nga ahensya sang gobyerno. Kaupod ta man didto ang iban nga myembro sang Iloilo City Hall Press Corps.

Ang suhestyon sang mga otoridad: Tagaan sing penalidad ang mga ginikanan tungod sa ila “parental neglect” sa masami nga pagkadakop sang ila menor nga kabataan paglapas sa curfew. Ang iban gani nadakpan nga ginapangabuhian pa sang mga bugaw.

Sorry gid sa grupo sang mga LGBT pero ang nadakpan nga mga bugaw halin sa inyo grupo, sunu sa kapulisan.

Ang tudlo sa amon sa Katekismo amo ang: “Respect and love God; not fear God – but fear His punishment.”

Kay amo ina ang husto nga pag-disiplina sang Diyos sa aton, ti ngaa indi naton ipatuman man ina sa aton mga kabataan?

Dapat tagaan poder ang mga ginikanan agud penahan, syempre sing nagakaigu lang, ang ila kabataan kon makasala agud may hadlukan. Kag indi sila ang penahan.

Ngaa abe penahan ang ginikanan kay ginadilian man siya sang kasuguan sa paghatag sang mas mabungahon nga pagdisiplina sa ila kabataan? Luas lang kon ang ginikanan mismo ang promotor sang kalokohan nga dapat penahan.

Sa nasiling gani sa Bibliya: “Spare the rod and spoil the child”. Ti, ngaa abe mangin malain ina?

Daw indi man makapalain sa bata ang hampak sang kamot sang ginikanan sa kamot sang iya bata nga nagapangawat. Wala seguro sing malain nga kastiguhon sa sugilanon ini, kon gapamuyayaw kag gabinastos. Wala man gani sing malain nga punggan sing matig-a ini sa pag-gwa sa balay nga may pamahog nga hanuton kon disoras maglagaw.

Of course, indi man to the point of “cruelty”. Ang bata naman bisan sa diutay lang nga sakit makabatyag na ina agud respetuhon ang laygay kag panugyan sang iya ginikanan.

***

PASIPLAT

Interesting Facts About West Visayas

By Atty. Rex S. Salvilla+  

Flavio Zaragoza Cano

(Mabasa ini sa Book 13, pahina 19-20)

ISA ka pungsodnon nga paindis-indis sa literatura – ang Commonwealth Literary Contest – ang ginhiwat sadtong 1940. Isa sang mga nagpasakop amo si Flavio Zaragoza Cano sang Cabatuan, Iloilo. Ginhingadlan niya ng iya pasakop sing De Mactan de Tirad, nga nakasulat man sa Espanyol.

Sa pag-abot sang awarding sa Manila, ang iya ginpasakop nagdaug lang sing ikaduha nga lugar.

Tungod gapati siya nga dapat siya gid ang nagdaug, gingisi niya ang tseke balor P2,000 sa atubangan ni Presidente Manuel Quezon kag dale-dale nga naggwa sa awarding hall.

Bag-o sini, si Zaragoza kilala na nga “Poet Laureate of the Visayas”. Sang 1926 ginkoronahan siya nga “Rey (Hari) de Balagtas en Poesia en Dialecta Bisaya”.

Natawo siya sadtong 1862. Ginsulat niya ang iya una nga binalaybay (poem) nga gintig-uluhan “Alma Joven” sa edad nga 14 anyos lang. Nagtuon siya sa Centro Escolar de Molo kag sa Instituto Enseñanza de Molo, sa diin nag-gradwar siya sing Bachiller en Artes.

Nag-amot man siya sang madamo nga sinulatan sa mga pahayagan nasyonal kag lokal. (w_mateojr@yahoo.com/PN)

LEAVE A REPLY

Please enter your comment!
Please enter your name here