NAGHANDOM sila kag nagmato-mato sa paghimo sang desisyon, wala sang pagpangduha-duha nga sila ang magaserbisyo sa ila kasimaryo.
Madugay nga ginpaminsar ang nangin resulta sang ila desisyon, gintimbang ang mga bagay nga dapat konsiderahon agud nga mahibaluan kon ano ang mas mabug-at nga nagatulod sa paghimo sang desisyon.
May yara sang nagasugyot, may yara sang nagahagad, may yara sang nagapatalaw, may yara sang nagapalikaw apang ang labi nga nagapangibabaw amo ang nagadabdab sa iya balatyagon kag ang naga-inggat sa iya paminsaron nga iya tilawan ang pagserbisyo sa iya mga kasimaryo.
Ayhan bangud sa bugal nga luyag niya sa ila barangay siya ang mangin opisyal, ukon bangud sa nakita nga maganar sa tagsa ka bulan kon yara sa posisyon.
Matuod ang tawo nagakaganyat sa dungog kag sa pilak. Nagapangibabaw ang ila ginahandom nga maagom kaysa sa ila ginahandom nga mahatag nga serbisyo sa ila kasimaryo.
May kinaiya ang kada isa sa mga kandidato. May tagsa-tagsa ka rason kon ngaa sila ang nagapapili kag ang ila motibo ang matungkad lang sa paglipas sang panahon kon yara na sila nga nagapangalagad sa posisyon nga una nila nga ginhandom.
Nagdugok sila sa pagpadulong sa tagsa ka talatapan sang Commission on Elections malapit sa ila lugar. Nagpila, nagsunod sa proseso, nagpasa sang ila tagsa ka dokumento agud nga mangin opisyal nga kandidato sa ila tagsa ka nasakupan nga barangay.
Nagadayaw ang Comelec sa kadamuon sang mga nag-file sang ila certificate of candidacy nga halos naglapaw na sa 10 mil ka mga kandidato sa una nga tatlo ka adlaw sang pag-file sang ila kandidatura.
Maathag nga madamo ang dapat nga islan nga sa malawig nga panahon nagtahaw ang ila pagserbisyo, nangin mabugnaw na ang pagbaton sa ila sang mga tawo kag nangin rason sa paghandom naman sang iban nga ihatag ang ila serbisyo sa ila mga kasimaryo.
Apisar nga may yara sang naga-usisa kon pila ang ila maganar ukon pila ang ila mangin honoraria, may yara naman nga nagabalewala sini sa handom nga makaserbisyo lamang.
Madamo ang magapapili nga wala sang gina-updan nga grupo ukon ang ginatawag nga independent candidate bangud indi nila luyag nga maangot sa bisan sin-o man nga grupo ukon sa ila gina-updan nga kandidato.
Diri sa syudad sang Iloilo, madamo ang nagalikaw nga maipit sa dusdusanay sang magbilas nga nagapreparar sa ila pagbungguanay sa masunod nga eleksyon.
May mga opisyales kag kandidato sa barangay nga nagasakdag kay Cong. Jerry Treñas kag may yara man sa bahin ni Mayor Jose Espinosa III nga sa karon may malas-ay nga pagtamdanay sa isa kag isa.
Kuntani likawan sang mga opisyales sa barangay ang magdukot sa luyo sang lokal nga mga pulitiko agud nga indi sila malatnan sang trangkaso sang pulitika kag indi mabutang sa alang-alang ang ila pagserbsiyo sa ila kasimaryo.
Kuntani indi pagpasilabtan sang mga lokal nga pulitiko ang proseso sang Barangay kag Sangguniang Kabataan Elections kag tugutan nga mangin hilway sa impluwensya sang pulitika.
Kuntani hangpon sang mga kandidato nga sila ang boluntaryo nga magaserbisyo. (bertladera_rmn@yahoo.com/PN)
