GINAPALAB-UT naton ang aton mainit nga panginbulahan – base sa resulta sang eleksyon nga ginpagwa sadtong Sabado (adlaw sa Filipinas) sang United States media – sa kay President-elect Joe Biden kag Vice President-elect Kamala Harris!
Ang matuod, humalangad ako sang Democratic Party sugod pa sang nakilala ko si President Franklin D. Roosevelt (1933-1945), nga popular sa tawag nga FDR, tungod sa matahum niya nga panindugan kag panghimanwa, nga dala tubtub subong sang iya partido.
Si FDR ang pinakauna nga presidente sang US nga nakapungko sa pwesto sing apat ka termino (4 k tuig kada termino). Ginkilala siya nga “saviour” sang mga pumuluyo sa panahon sang Great Depression (1933-1939), kon san-o madamo ang nawad-an sing ubra kag pagsara sang mga negosyo kag industriya sa US. Gin-report gani nga may mga 7 ka milyon ang nagkalamatay sa gutom.
Apang napabangon ni FDR ang ekonomiya sang US paagi sa iya New Deal nga nagtuga sang madamo nga trabaho kag welfare programs para sa mga kubos, kag nagpabangon man sang mga negosyo kag mga industriya paagi sa mga relief programs para sa ila.
***
Sa report sang Associated Press sining ulihi, sobra sa 270 ka electoral votes nga makapadaug sa iya ang nakuha na ni Biden. Sa ulihi nga report nga nabaton naton, tubtub na gani sa 306 ka electoral votes ang nakuha na niya kontra sa 214 lang ni Trump.
Sa iya pagdaug, pagdaug man ini ni Harris. Dira sa US ang boto sa presidente isip man nga boto sa bise presidente, so much so nga kon magdaug ang presidente daug man ang bise presidente.
Of course, pwede gihapon ma-kwestyon ining pagdaug nanday Biden kag Harris sang kampo ni President Donald Trump sa iya reklamo nga gindayaan siya kuno. Ginatudlo niya ang mga mailed-in, boto sa sulat, kag absentee voting nga lakip ang mga soldado nga na-deploy sa iban nga mga pungsod.
Banta ko laban man seguro sang mga soldado ang wala nagboto kay Trump. Man sige ang padala niya sang mga soldado sa mga patag-awayan sa kon diin sugo lang nga sugo siya sa mga lugar kon diin daw indi man maintiendihan kon sin-o ang iya kontra. Pati kaalyado kontra gani niya, nga daw wala siya kinahanglan sang ila bulig. Buing gid!
Kahalam-utan ugaling kay ni isa ka ebidensya wala pa siya nakapakita, kag ang matonog lang amo ang iya ginasinggit nga siya gid ang nagdaug sa eleksyon tungod gani kay gindayaan siya kuno.
Paano abe madayaan sing amo ina ka daku (306 electoral votes kay Biden kag 214 lang kay Trump), samtang yara sa iya ang tanan nga poder nga gamiton ang pangdaya kon gustuhon niya? Tungod sini, nagagwa gani nga si Presidente Trump isa lang ka “sore loser”.
Diri sa Filipinas gani, ang masami ginatudlo nga nangdaya amo ang administrasyon tungod gani yara sila sa poder kag mahapos magamit nila ang ila damang-damang kon indi matapna sang kontra partido kag independent election groups katulad sang Namfrel.
***
Ang masadya (nga indi masadya) kay nanakga gid si Presidente Trump nga indi mag-concede, kon magbaton sang iya pagkapierde. Kag nanakga man nga indi siya maggwa sa White House, nga puluy-an sang Presidente sang United States, tubtub madeklarar siya nga nagdaug sang Supreme Court, nga kalabanan sini mga appointee niya.
Pensar niya seguro pwede niya mabakal sing kwarta ukon kabalaslan ang US SC. Aba, indi amo ina ang US Supreme Court sa ila sinumpaan “to serve justice to every man”.
Indi man bajo mando lang ang US Military agud sundon ang iya sugo bisan labag sa ila sinumpaan. Sunu sa US Constitution dapat apolitical, ukon wala ginaapinan, ang mga soldado kag indi magpahilabot sa mga gusot sang mga pulitiko kag sa mga isyu panghimanwa sang civilian population.
Basi pa seguro ang mga soldado ni Hitler, ni Mussolini, ukon sin-o pa nga diktador nga ubos na nagkalamatay sing indi maayo? Si Hitler nagpakamatay upod ang iya kahagugma. Si Mussolini ginbitay suli sa publiko, ginbulad sa init, kag ginpagustuhan luthang sang mga naugot-ugot sa iya.
Sorry na lang Mr. Trump. Kon wala ka ebidensya, kag daw wala gid, batuna na lang ang mas importante nga kadalag-an sang Demokrasya kag indi ang imo sobra nga ambisyon!/PN
