Dapat imprubahon ang serbisyo

MADAMO sang mga masaku nga indibidwal ang nagabatyag sang kalas-ay sa pagtransaksyon sa gobyerno bangud nga kinahanglan ang mag-uyang sang madamo nga tinion agud lamang nga matigayon ang transaksyon.

Mahangpan naton ang rason kon ngaa may mga tawo nga nagapangita sang manugproseso sang ila papeles bangud sa kabudlay hangpon sang sistema sa tagsa ka opisina sang gobyerno.

Kuntani ibutang sang mga nagadumala sang mga opisin ila kaugalingon sa sitwasyon sang mga pumuluyo nga ila kliyente, nga bag-o sa ila patakaran, wala sang ideya kon ano ang proseso ukon sistema, kag indi makahibalo sa kon ano ang mga kinahanglanon nga papeles kag mga dokumento nga dapat pun-an sang mga detalye.

Nagabalang-balang ang mga tawo sa kon ano ang ila himuon bangud nga indi ila ang lugar, wala sang ideya sa sistema kag bag-o sa iya lantaw ang tanan nga bagay kag kulang sa ihibalo sa mga dapat himuon.

Kon mahimo sini sang mga nagadumala sa tagsa ka opisina sang gobyerno, ila mahangpan ang ginaagunto nga kabudlay sang mga nagatransaksyon, kon paano magsalangisag sa pagplastar sang mga dokumento tubtub nga magpatuyo sa paghulat nga malawagan ang ila nga numero.

Ang kabudlay sa transaksyon kag pag-uyang sang panahon ang nagatulod sa pumuluyo nga magpangita sang tawo nga ila malihog agud nga magproseso sang ila papeles, sila ang mga tawo nga halos saulado na ang lakat sang mga papel bangud madamo na ang ila naserbisyuhan. Kaangay sila sang mga empleyado nga saulado ang proseso apang wala sang sweldo kag nagasalig lang sa mahatag nga suhol sa ila sang mga nagalihog sa ila.

Kuntani ang ipahamtang nga mga tawo sa help desk sang mga ahensya sang gobyerno amo yadtong maka-isrot sa pagsabat sa magkatuhay nga kinahanglanon sang mga kliyente.

Kahibalo sa kon ano nga dokumento ang dapat nga ihatag, kon ano ang mga papeles nga dapat ilakip kag kon paano pun-an sang detalye ang mga dokumento agud nga indi na magbalik-balik pa ang kliyente, magadiretso na ang lakat sang papeles sa isa lang ka pagpila.

Dapat man nga tantyaron sang mga nagahatag sang numero kon pila lang ang ila dapat nga iga-isyu nga numero agud nga indi mag-nganga sa hangin ang mga naga-uyat sang numero nga indi na maakomodar apang apat ka oras na ang paghulat.

Angay nga batyagon man sang mga empleyado kon ano ang dapat mga himuon sa pag-atipan sa mga kliyente. Bangud nga nalamon na sang sistema ang empleyado, nangin kinaandan na ang iya mga lihok kag normal na sa iya ang sitwasyon, rason nga daw bulag na siya sa sitwasyon sang mga kliyente, indi na niya makita ang magagmay nga detalye nga mahimo pa imprubahon.

Kaangay ini sa Bureau of Intenal Revenue sa Plazuela II ang sitwasyon. Naga-igod ang numero sang mga tawo nga ginalawag agud nga serbisyuhan, daku nga oras ang nagakauyang, kag daku nga kahul-anan ang ginatuga sa nagaagwanta nga nagaproseso.

Balikdon ang sitwasyon sang mga pumuluyo, pamatian kag tun-an ang ila mga yamo kon paano aktuhan agud maimprubar ang serbisyo./PN

LEAVE A REPLY

Please enter your comment!
Please enter your name here