GINAKASUBO naton ang pahayag sang Samahang Basketbol ng Pilipinas (SBP) nga indi anay maka-entra sa hampang nga basketball sa Asian Games ang Pilipinas sa tuig nga ini nga hiwaton sa Indonesia sa Agosto 18 tubtub Setyembre 2.
Ang Asian Games, ukon Asiad, isa ka apat-ka-tuigan nga torneo sa nagakalain-alin nga mga hampang nga gin-entrahan sang Pilipinas sumugod sadtong 1951. Mga 45 ka nasyon ang naga-partisipar diri.
Apat ka gold sa basketball, nga ginakawilihan gid sang aton mga pumuluyo, ang nadaug na naton diri, nga segurado nga igakasubo gid sang aton mga pumuluyo kon indi kita makapasakop sa sini nga tuig.
Pero ngaa? Sa aton paghangop, ina tungod dismayado ang aton mismo matag-as nga mga opisyales, lakip ang Malacañang, ang Bise Presidente kag mga pamunuan sang SBP sa “unsportmanlike” nga hitabo sa tunga sang Gilas Pilipinas kag sang Boomers sang Australia.
Napulo sa players sang Gilas, si Coach Chot Reyes kag Assistant Coach Joseph Uichiko ang gin-suspendir sang FIBA World Cup, sa diin katapo man ang Pilipinas, tungod sa sining hitabo sadtong hampang nila sang Hulyo 2 sa Bocaue, Bulacan.
Halin isa tubtub anom ka games ang pagka-suspendir sang mga players sang Gilas, samtang si Coach Reyes ginpatawan sing isa ka game kag si Uichiko sing tatlo ka game tungod sa ila man pag-entra sa kinagamo.
Nag-apelar sa sining suspension ang Pilipinas, nga gapati nga sobra-sobra ang ginpataw nga penalidad sang FIBA sa ila.
Tatlo lang sa players sang Boomers ang na-suspendir, nga wala na mag-apelar sang suspension kay daw nalipay na sila sini.
***
Ano gid bala ang kasal-anan sang Gilas kon ngaa sobra-sobra gid ang penalidad nga ginpataw sang FIBA sa ila, samtang mamag-an lang ang iya sang Boomers?
Kag ngaa bisan diutay nga pag-apin sa Gilas wala gid nagpa-utwas ang aton mga opisyales kag daw pagpakalain gid lang?
Kumpormi kita nga “unsportsmanlike” gid man ang ginhimo sang Gilas, pero ang ina nga kasal-anan ginhimo man sang mga Boomers. In other words, patas sila sa ina nga punto.
Apang, indi ko lubos mabasol ang aton players kag duha ka coach nga nagtusmog man sa kinagamo.
In fact, kon namangkot lang kita kon ano ang nagduso sa Gilas sa pagsugbo sa kinagamo tani bisan diutay man lang nga paghangop nahatag man naton sa ila.
Sa aton pagtan-aw, ang matuod gid nga ginbangdan sang rambol amo ang hungod nga pagsiko ni Daniel Kickert kay Roger Pogoy.
Kon ginhungod gid man ni Pogoy ang pagdis-ug kay Chris Goulding, ordinaryo ini nga hitabo sa basketball court nga masami ginapatawan lang sing technical foul ang player.
Apang, iban yadtong sabat ni Kickert. Ginsiko niya sa Pogoy sa liog nga nagpatingkaya gid sa iya. Delikado ang ginhimo ni Kickert, kag sin-o man abe nga kaupod ang indi maabtik mag-react sa ila kulba nga basi napeligro na si Pogoy?
Sunu sa isa ka wado-kai karate expert, delikado ang ano man nga pag-chop ukon pagsiko sa liog kay puede ini makapatay sa biktima.
Tungod sini, dapat gani i-“ban for life” si Kickert sang FIBA for attempted homicide sa kay Pogoy!
Indi ina ya mahimo sang bisan sin-o nga player sang Gilas. In fact, todo pasensya sila sa ginahimo sang mga players sang Australia halin sa ila pagka-arogante kag pagpakahuya sa Gilas sang nag-abanse sila sang daku sa 3rd Quarter.
Nagbuhi pa gani sila sang “racist” remark nga “monkeys” kontra sa aton players sunu sa isa ka photojournalist, nga gin-balewala man lang gani sang Gilas tungod kita ang host kag dapat magpa-ubos.
Of course, gin-deny sang Australia ang ining “racist” nga akusasyon.
Tungod sini, wala naton lubos ginabasol ang Gilas sa natabo nga rambol, labi na gid kay wala gid man sing may na-ospital, ukon bisan nahalitan nga dapat igakabalaka sang bisan sin-o sa mga nag-rambol.
In other words, wala rason nga ipaiway naton ang pag-partisipar sang aton basketball team sa Asiad 2018 tungod lang sa sining kinagamo.
Isa pa, sa una nga daan, ang plano naton amo ang magpadala sang lain nga team sa Asiad kag indi ang Gilas. Ang bati naton, basi ang team sang Rain & Shine sang Philippine Basketball Association. (w_mateojr@yahoo.com/PN)
