Demokrasyahon nga pagsolbar sang aton problema sa trapiko

ANG pagkuha sang mga sablag sa public roads indi garantiya nga magasulhay na ang byahe sang tanan. At best, pagpatuman lang ini sang kon hasta diin ang poder sang gobyerno sa publiko nga dalanon.

Ang sablag sa dalanon isa lang sang aton problema sa trapiko. Madamo pa dira nga mga rason kon ngaa gaproblema kita sa aton pagbyahe sa dalanon.

Yara ang problema sa kon ano ang bagay nga kasangkad kag desenyo sang dalan; ang pagpatuman sang maayo nga regulasyon sa mga intersection; ang indi pagsinantu sang paghalin kag pagpauli sang mga estudyante kag empleyado; ang kon diin pwede itugot ang “jaywalking” (pagtabuk nga wala sa pedestrian lane) sa pila ka dalanon nga indi naman peligroso kon tabukon; kag iban pa.

Of course, ang ano man nga solusyon nga ipatuman naton dapat gid ibagay naton sa aton pagpuyo sa Demokrasya, kag indi sa isa ka diktadurya nga ginadiktahan lang sang isa ukon pila lang ka gamhanan.

Sa aton Demokrasya, dapat may pareho nga kahigayunan ang manggaran (nga may mga kaugalingon nga salakyan) kag ang wala sing salakyan nga mga ordinaryo nga pumuluyo, katulad sining kolumnista ninyo.

Ining patas nga kahigayunan mapaluntad naton kon unahon tagaan ligwa ang mga estudyante kag mga empleyado agud makadangat sing sulhay sa ila kaladtuan. Tutal ang mga manedyer kag mga tag-iya sang mga negosyo sa masami nagasulod sa mga a las 10 pa sang aga.

Angot diri, dapat may tumbas nga kadamuon sang mga salakyan pampubliko ang aton mga estudyante kag ordinaryo nga mga pumuluyo. Matigayon man ini sa pagpatuman sang masulhay nga pagbyahe nila sa dalanon nga wala ginapagutukan sang mga naga-park nga mga salakyan.

Apang may mga sablag man gani nga pwede ibalewala agud maka-enjoy ang pumuluyo katulad sang madamo nga mabakal sa palibut kon may ginahiwat nga pyesta sa dalanon. Yara man ang walkway sa Call Real kon Domingo, nga okey man gani kay ICLAJODA president Boyet Parcon, apang gindula na sang mga “killjoy”.

***

Wala gid nagsala ang mga pumuluyo sa pagpabalik kay Mayor Jerry P. Treñas sa pwesto agud liwat ipaambit sa mga pumuluyo ang tumalagsahon niya nga ikasarang agud pamunuan liwat ang pagpauswag sang siyudad.

In fact, madamo kag dalagku na nga mga bagay ang iya nahimo sa una pa lang niya nga 100 ka adlaw.

Panugod na ini sang iya sadto ginpangako sa tion sang kampanya nga WHEELS – Welfare, Health and Sanitation, Education, Environmental Management, Livelihood kag Sustainability.

Una na diri ang pagtukud sang MICE Center, ang ginasiling ni MICE director Salvador “Dong” Sarabia Jr. nga centerpiece, ukon ang pinaka-importante gid nga sangkap, sang Treñas Administration agud makalab-ut kita sa NEXT LEVEL.

Ang MICE nagatumod sa “Meetings, Incentive Travel, Conference, Convention, Exhibitions, Events” nga gintugyan ni meyor sa kay Dong Sarabia agud matigayon ang mas malawak nga pagpauswag sang siyudad, kaupod ang Metro Iloilo kag Guimaras sa idalom sang MIGEDC, ukon Metro Iloilo Economic Development Council.

Prioridad man ni meyor sa una nga 100 ka adlaw niya ang pagpatindug sang P38 ka milyon nga Command Center para sa “disaster risk reduction and traffic” agud masabat dayon ang problema sa kalamidad  kag pagpasulhay sang problema sa dalanon.

Ginapatindug man niya ang P6 ka milyon nga Regional Evacuation Center sa Mandurriao nga suguran bag-o matapos ang ining tuig 2019.

Ginapatigyon man ni meyor ang isa ka Dengue Hydration Unit kag ang padayon nga blood donation sa pagsabat sa kinahanglanon nga dugo para sa mga pasyente sang dengue.

Ginapatuman man sini ang Digital Information Kiosk sa ground floor agud madale matultulan ang mga upisina kon diin mag-transakyon.

Madamo na gani nga trabaho ang nahatag sang iya administrasyon – mga 5,564 tanan sugod sadtong Hulyo tubtub Setyembre 2019 – paagi sa Public Employment Service Office (PESO).

Ginapasanyog man sang Tourism Office sa idalom ni Tourism Officer Junel Divinagracia, upod sa MICE, ang pagkatad-katad sang mga festival kag kahiwatan agud masabat ang huyog sang mga turista kag pangayaw sa iban nga lugar sang pungsod nga makaduaw sila, kon san-o kag diin pwede mag-enjoy sa siyudad sang Iloilo sa bisan ano pa nga tion nga luyag nila.

Go, Go, Go! Iloilo City! (w_mateojr@yahoo.com/PN)