MAY namangkot kon paano maluwas ang “wala kahibalo sang ila ginahimo”, nga ginhinambit ni Hesukristo sa krus.
Well, sa isa nga “wala kahibalo” kon ano gid ang matuod nga pagkilala sa Diyos, pwede ini maluwas sa idalom sang ikaduha sa duha sang mayor nga sugo sang Diyos: “Love thy neighbor…”, nga ginhinambit man ni Hesukristo. Ang una amo ang “Love God above all things.”
Sa “Judgment of Nations”, sa sinulatan ni Matthew, siling ni Hesukristo: “Inherit the kingdom prepared for you from the foundation of the world. I was hungry and you gave me food, I was thirsty and you gave me drink, a stranger and you welcomed me, ill and you cared for me, in prison and you visited me…Amen, I say to you, whatever you did for one of these least brothers of mine, you did for me…” Wala nagsiling diri si Hesukristo kon ano ang relihiyon sang iya ginapatungdan.
***
May man-og sa bisan diin nga katalunan, siling sang hurubaton.
Ang tumod sa man-og diri amo ang mga tawo nga indi masaligan sa mga matarong nga buhat nga ginahilintulad sa mapintas nga man-og. Ina bala ang klase sang man-og nga kon indi ka niya mapatay paagi sa iya makahililo nga laway, katulad sang cobra, malumoy ka sini sing bilog tungod sang iya kadakuon katulad sang anaconda.
Isa na dira ang pagka man-og sang isa ka tawo nga nagapamentaha sang iya pareho.
Katulad sang pasahero nga manaog lang sa dyep nga wala nagabayad sing plete, ukon ang drayber man nga ginapalipat-lipatan lang ang kambyo.
Of course, talagsahon ini nga mga hitabo diri sa Iloilo. Sa kabug-usan, ang Ilonggo nga pasahero naga-uli gid sang sobra nga plete sa drayber. May mga drayber man nga naga-uli sang mga bagay personal ukon bagahe nga nalipatan sang ila pasahero, kag ini bisan pa gani nga daku nga kwarta ukon malahalon nga pagkabutang.
Ini nga pagka-honesto ginapakita gani naton nga mga Filipino sa bulangan (cockfight). Diri lawagay lang ang taya apang ang tanan nagaaku sang ila katungdanan sa pag-abot sang bayaray.
Of course, sa nasiling na naton sa ibabaw, mag-andam gihapon kita kay may man-og gid sa katalunan.
***
Sadtong Domingo, Nobyembre 16, nagsimba kami ni asawahon sa Mandurriao Parish Church, nga sakop sang amon parokya, upod ang kinagot namon nga anak nga manunudlo sa SanAg High kag ang isa man ka hinablos sa bahin ni asawahon.
Pagpondo gid sang taksi sa atubangan sang simbahan nagpitik dayon ang metro sing P42. Ang P40 amo ang flag-down rate, nga amo ang minimum nga sukot, kag ang P2 para sa waiting time per minute.
Indi kita sini makahangop. Ang P2 para sa waiting time per minute, pero naggwa na ang dugang nga P2 samtang bag-o lang nakapondo ang taksi nga wala pa makalipas ang isa ka minuto.
Nakibut pa gid kita kay dayon man pitik sang dugang nga P13.50 para sa sunod tani nga isa ka kilometro nga dalagan sang taksi. Ang metro nagsiling nga isa pa lang ka kilometro ang byahe. Dapat tani ang dugang nga P13.50 para sa after-one kilometer, pero pangot pa lang ang byahe sa isa ka kilometro sunu sa machine receipt nga nakuha namon sa drayber.
In fact, natabo man ini sa duha ka tion nga nagsakay ako sing taksi despues tungod sa paglagas sang oras sa aton kaladtuan.
***
In other words, tyope ang calibration sang metro sang taksi. Wala pa ang isa ka minuto nagpitik na ang P2. Dapat man sa masunod pa nga isa ka kilometro mapitik ang P13.50 apang nagpitik na ini pangot pa lang sa isa ka kilometro.
Kon ining tyope nga calibration kapalpakan lang sang technician sang LTFRB, aba manabat gihapon ang LTFRB tungod nasukot dugang sing P15.50 ang pasahero, nga indi dapat.
Sa isa ka bahin, kon ining dinaya nga calibration kahimuan sang kompaniya sang taksi, dapat penahan ini tungod sang pagpangtyope sini sa pasahero.
Gapati kita nga sensitibo ang aton mga ahensya sang gobyerno sa pag-protektar sang kaayuhan sang mga pumuluyo. Gani gasalig kita nga mabasahan ining aton reklamo diri sa aton kolum agud matagaan sing atensyon ining aton reklamo sa LTFRB, kag ma-aksyunan. (w_mateojr@yahoo.com/PN)
