E-jeep

NAG-UMPISA na ang klase sa syudad sang Iloilo apang wala pa sang e-jeep nga makita nga nagataris sa mga dalalon.

Mas manami pamatian ang press release sa kahanginan kag ang paglantaw sang dagway sang salakyan sa mga bidyo kag larawan.

Apang ang ginalauman nga petsa kag pagtaris sa dalan sang mga moderno nga salakyan ang nalugaw-an, wala nahatagan sang katumanan bangud sa mga problema nga wala man nalauman.

Nasugilanon naton si Mr. Boyet Parcon ang presidente sang Iloilo City Loop Alliance of Jeepney Operators and Drivers Association ukon ICLAJODA nga tuman na sila ka handa para sa pagbukas sang klase apang ang mga kinaandan nga salakyan ang magabiyahe kag sarang nga makaserbisyo sa mga pumuluyo.

Ginsiling sini nga nakatipon na sila sang mga kinahanglanon nga papeles agud nga makatukod sang kooperatiba kag nagahulat na lang sila sang maathag nga patimaan gikan sa Land Transportation Franchising and Regulatory Board tuhoy sa ila igapatuman nga modernization program.

Nagprangka man ang pamunuan sang LTFRB sa ila nga wala pa sang kwarta ang gobyerno nga mahatag kaangay sa ginpasalig nga subsidy nga nagabalor sang 80 mil pesos agud makabulig bilang down payment sa isa ka unit sang e-jeep nga ila kwaon kag ipadalom sa bank financing.

Nagaplastar pa sila sang mga kaathagan kag kondisyunes bangud kinahanglan pa mapasakaan ang pletehan antes sila magsugod sa pagpadalagan sang e-jeep sa dalanon.

Bangud sini, akon man ginpalab-ot ang akon punto nga dapat mahibaluan anay ang kadalumon sang tubig antes sila maglumpat agud indi sila malumos.

Dapat may test drive mga matabu agud mahibaluan kon kapable kag may ikasarang ang e-jeep sa pagtaris sa dalanon sang syudad, sa sistema sang pagmaneho, kag sahi sang mga driver nga nagapadalagan sang ila mga salakyan. Hibaluon kon makasibu sa sitwasyon sang trapiko sa syudad ang e-jeep.

Dapat man tun-an kon ano ang mangin problema sini samtang nagadalagan. Kon may problema, sin-o ang magaresponder sa pagkay-o? May yara bala sang mga technician nga gilayon matawgan? May mga piyesa bala nga sarang mailis sa maguba? May baligyaan bala sila sa Iloilo nga mahimo baklan sang mga spare parts?

Mahapos lang magsiling kag magbantala nga manami ang e-jeep apang wala pa ini nakatilaw sa paglinas sa mga dalanon sang syudad. Wala pa ini nakabatyag sa kon ano ang palibot nga iya dalaganan, indi kaangay sa mga pasayod sini nga masulhay nga nagadalagan bangud indi magutok kag masulhay ang iya pagbiyahe.

Samtang, dapat tun-an man kon pila gid dapat ang mangin pletehan agud nga indi mapyerdi ang operator sini. Dapat mahibaluan sang LTFRB kon pila ang ila itugot nga mangin plete basi sa matag-adlaw nga dapat kitaon sang isa ka unit, ukon sa kada bulan nga maganar nga makabayad sa financing sa bangko.

Husto ang desisyon sang ICLAJODA nga dapat gid tun-an sang lubos, hibaluon ang tanan nga punto kag konsiderahon ang pila ka mga bagay antes magkomporme sa ginaduso nga modernization program sang LTFRB.

Samtang indi pa maathag kag wala pa sang pahulag ang gobyerno tuhoy sa ila plano nga modernization program, wala pa sang e-jeep nga magataris sa dalan. (bertladera@gmail.com/PN)

LEAVE A REPLY

Please enter your comment!
Please enter your name here