MAGA-umpisa na ang enrollment sa Hunyo 1 tubtub Hunyo 30 sa sini nga tuig. Ginaagda ang tanan nga ginikanan nga magbuylog sa sini nga lihok para sa masanag nga palaabuton sang ila kabataan.
Kahibalo man ang tanan kon ano nga kahangawa ang nagatublag karon sa paminsaron kag balatyagon sang ginikanan tuhoy sa madangatan sang ila kabataan sa pagbukas na sang klase.
Kahibalo man ang mga manunudlo sa sitwasyon bangud sila mismo may mga kabataan man nga magabutho. Nagahimo sila sang pamaagi kon paano matigayon ang pagtuon nga hilway sa kabalaka kag kahadlok sa covid-19 pandemic.
Sa masami ko nga pagpakigsugilanon kay Dr. Lea Belleza, ang spokesperson sang Department of Education 6, nga makita sa ila paghimakas kag mabatyagan ang ila determinasyon nga matigayon ang katuyuan nga makabutho ang mga estudyante paagi sa pagtan-ay sang mga palaagyan ukon opsyon nga nagasunod sa health protocol nga ginapatuman sang gobyerno.
Kahibalo ang DepEd sang iya katungdanan. Kinahanglan sini nga matuman ang obligasyon nga makatuon ang mga estudyante. Kinahanglan sini nga magtan-ay sang opsyon agud indi mabutang sa peligro nga malatnan sang covid-19 ang mga estudyante.
Madamo sang mga buluthuan ang ginagamit bilang quarantine facility sang mga local government unit nga wala sang iban nga opsyon magluwas sa eskwelahan. Nakita na ini sang DepEd kag may mga plano na kaangay sang paghiwat sang sanitation kag disinfection antes ang pagsugod sang enrollment kag klase.
Daku na ang kahul-anan nga natuga sa aton sang covid-19 pandemic. Madamo na sang kabuhi ang nautas. Madamo na sang health workers kag front liners ang nabutang sa peligro. Daku na ang pyerdi sa aton ekonomiya. Madamo na ang nagaagunto sa kapigaduhon. Natublag ang tanan kag wala sang bisan isa ang wala naapektuhan.
Kon padayon kita nga magkahangawa ukon magkahadlok, wala kita sang madangatan, indi kita makabangon kag wala sang higayon nga magmadinalag-on.
Nagapati kita nga dapat buksa naton ang aton panghuna-huna. Mangin mahinalungon kita nga magabatu sa sini nga palaligban kag dapat indi kita madugmok sa higad nga wala sang may nahimuan.
Kinahanglan naton ang edukasyon nga amo ang magahatag sa aton sang kapag-on sa paminsaron, agud nga mapanas ang kakugmat, agud nga masanagan ang paminsaron nga nadulman. Palaagyan ang edukasyon agud nga makita naton ang paglaum sa likod sang sini nga palaligban.
Paano kita makalampuwas? Ginatos ka bilyon ka pesos na ang aton pyerdi sa ekonomiya. Nagatay-og na ang aton panagang nga health system. Kon malingkang pa gid ang edukasyon, sa diin kita ayhan puluton?
Buksan naton ang aton paminsaron kag pamatian ang DepEd kon ano ang ila estratihiya ukon opsyon sa pagpatigayon sang klase nga nagasunod sa health protocol ukon indi mabutang sa peligro ang mga estudyante.
May solusyon para sa mga wala sang gadget ukon wala sang internet. Kahibalo ang DepEd sa problema sang kada isa bangud indi tanan nga estudyante may ikasarang. Ang solusyon mahimo nga itan-ay kon ang ginikanan magpahibalo sa kon ano ang iya sitwasyon.
Wala sang problema nga indi masolusyunan kon nagasugilanon ang tanan. Indi masolbar ang problema kon sa social media ibalandra. Indi makita ang solusyon kon sa imbukada pa lang sarado na ang paminsaron.
Kinahanglan naton ang pag-ugyon sang tanan, sang komunidad, sang mga pulitiko kag sang mga kritiko.
Indi naton luyag nga magpasad sang henerasyon nga wala sang hinalung-ong. Indi naton luyag nga magpasad sang henerasyon nga ginlupog sang covid-19 pandemic bangud sa kahadlok.
Kon pyerdi kita sa ekonomiya, sa ikaayong-lawas, sa turismo, sa negosyo kag iban pa, kuntani indi naton pagtugutan nga lutuson ang aton edukasyon nga amo ang mangin lyabe para sa mas mapag-on nga palaabuton.
Ginikanan, indi pagdaluki ang imo kabataan sang edukasyon nga ila kinahanglan. Indi pag-ilaton sa ila ang imo kahadlok, ikaw ang ila ginasaligan nga una nga mag-away sa kahangawa paagi sa husto nga impormasyon. Kinahanglan naton ang edukasyon.
Palihog kumpirmar sang enrollment sang imo kabataan. Magpakig-angot sa DepEd agud masanagan tuhoy sa mga bagay nga nagaburon sa imo pinsar.
Madamo pa sang matabu nga maayo bangud nagahimakas ang tanan nga makalampuwas sa sini nga sitwasyon.
Indi ka bala magkanugon kon mag-abot ang tion makabalik na kita sa normal apang wala sila naka-enroll ang imo bangud sa imo kahadlok?
Indi dapat maapektuhan ang palaabuton sang kabataan bangud sa desisyon nga ginlupig sang emosyon kag wala sa lugar nga kahangawa.
Dapat nga magdesisyon pabor sa masanag nga palaabuton. Indi pag-uyangan ang tion kag higayon, ipa-enroll na ang kabataan. (bertladera@gmail.com/PN)
