Ginakibang

NAGATUGA sang pagsalangisag ang patakaran nga indi maathag kag mas nagadabdab bangud ginagatungan sang kahadlok kag kahangag.

Nagkampante ang tanan sadtong Pebrero 18, 2020 sang nagpagwa sang joint statement ang Department of Health (DOH), Department of Tourism (DOT) kag Department of Interior and Local Government (DILG) nga “safe” ang pag-organisar kag pagtambong sa mga public events basta ginasunod lang ang tanan nga precautionary measures nga ginarekomendar sang DOH.

Bangud sini, nagsalig man ang organizer sang RUN for Jesus 2020 nga isa ka outdoor religious convention nga wala na sang problema sa ila aktibidad nga kuntani hiwaton sa plaza sang La Paz kag pasakupan sang 20,000 tubtub 30,000 ka pumalasakop.

Naglanog ang balita nga 10 ka tawo ang napatay sa South Korea bangud sa COVID-19 kag nagadamo pa ang kaso sini kag ang mga South Koreans nga magapasakop sa sini nga event sa plaza sang La Paz ang mga katapo sang religious sect nga amo ang ginadudahan nga nangin sentro sang outbreak sa ila nga pungsod.

Naalarma ang Iloilo City government kag nagsunod man sa kahadlok nga ginabatyag sang City Health Office, City Disaster Risk Reduction and Management Office, Iloilo Provincial Health Office, City Legal Office, and DOH Region 6 nga nangin tunaan sang pagkanselar sini sang permit nga ginhatag sa organizer sang event.

Nakabaton man sang report ang syudad nga may apat na ka Koreano ang nakasulod sa Iloilo, may 16 nga nag-abot paagi sa Kalibo Internationa Airport kag may yara pa gid sang 45 ka mga pastor nga natalana nga magaabot.

Samtang, sa report sang GMA News Online nga napetsahan Pebrero 26, 2020, may yara sang 169 ka bag-o nga kaso sang coronavirus ang South Korea kag naglab-ot na sa kabug-usan nga 1,146 ang kaso suno sa Korea Centers for Disease Control & Prevention. Sa sini nga bag-o nga mga kaso, 134 diri ang gikan sa Daegu City kon sa diin nahamtang ang sanga ang Shincheonji Church of Jesus nga naangot sa outbreak kag amo man ang magahiwat kuntani sang event sa plaza sang La Paz sini nga Pebrero 27.

Kahibalo kita nga nagahimakas man ang gobyerno sang South Korea nga matapna ang paglapta sang virus kag maamligan ang ila pumuluyo.

Nagapanagang lang ang mga local officials kag mga ahensya sang gobyerno nga indi mabasulan sa kon ano ang matabu rason nga sa subong pa lang nagapanirado na sila sang ganhaan sa mga Koreano.

Kuntani gintun-an ang tanan antes nakahimo sang emerhensya nga desisyon sa sini nga bagay. Dapat nga nakahimo sang angay nga pagpakig-angot sa mga organizers kon ano ang ila himuon nga precautionary measures sa sini nga event. Kahibalo man ang tanan sa pamahog nga dala sang COVID-19 apang indi dapat masal-an nga discrimination ang pagahimuon nga isolation sa mga bisita.

Yari kita sa henerasyon nga may “sophisticated technology” sa komunikasyon apang kulang kita sa pagtukib sa kon paano gamiton ini sang epektibo. Antes kuntani nagpadasu-daso sa paghimo sang desisyon nga kanselahon, dapat nagpakig-angot kag ginpamatian ang organizer sang event sa ila mga tikang.

Sa tuyo nga makalikaw sa pagbasol sa kon ano man ang posible nga matabu, ang una nga tikang sang mga health authorities amo nga indi pagtugutan ang event sa sina wala na sila sang kabalak-an. Wala nila ginlantaw nga indi lamang ini health issue, may naga-ikog ini nga iban pa nga isyu kaangay sang social issue, religious issue, economic issue, tourism issue kag foreign relations issue.

Ang solusyon indi amo ang paglikaw ukon pagpalagyo agud wala sang atubangon nga palaligban.

Indi makapaminsar sang tadlong ang tawo sa pagsolbar sang problema kon ginalamon na siya sang iya nga kakibang. (bertladera@gmail.com/PN)

LEAVE A REPLY

Please enter your comment!
Please enter your name here