Ginapasingtan

NANGIN masinulundon sa katungdanan. Ginlahugan sang kapalaran. Naga-antus bangud ginabalusan.

Nangin sagunson na ang pagpasaka sang kaso batok kay Mayor Jerry Treñas, City Administrator Melchor Tan kag iban pa nga mga opisyales sa city government.

Una nga nagtumar sang akto si Joe Mari Esteral nga Book Binder II sang Local Civil Registrar nga ginsaylo sa Calajunan dumpsite. Ginkwestyon niya ang paghaboy sa iya sa tuhay nga trabaho kag lakip man ang katingala kon ngaa didto pa sa Calajunan dumpsite siya gintapok.

Sunod nga nagpangisog si Dr. Bernard Caspe sang City Health Office nga nagpasaka man sang kaso kriminal kag administratibo sa pagpati nga wala na sa lugar ang mga ginahimo batok sa iya sang administrasyon.

Nagpasaka sang kaso sining ulihi lang si Rosita Camacho nga naga-alegar nga ginpwersa siya nga mag-leave sa sulod sang 60 ka adlaw. Nagatalangison nga nagapanuaron sang iya kahimtangan ang tagreklamo bangud sa kahadlok kag indi makatulog sa nagakatabu sa iya. Nagpangisog siya sa pagpasaka sang kaso bangud luyag niya pangapinan ang iya kinamatarong ilabi na nga may ginasagud pa siya nga apat ka tuig nga bata kag wala na siya sang iban nga palamugnan magluwas ang pagtrabaho sa city hall bilang regular employee.

Magluwas sini, may iban pa nga mga empleyado nga ginapadal-an man sang show cause order, may ginapa-athag sa ila mga akto kag dapat maghatag sang rason kon ngaa indi sila angay nga pasakaan sang kaso.

Lakip nga nagapanagang sa sini nga mga akusasyon si Romeo Caesar Manikan Jr. sang Local Civil Registrar kag ang iya tiayon nga si Eireen Rita Manikan, ang tourism assistant department head.

Natapos na ang eleksyon. Ang kada isa nakapili na sang ila kandidato. Ang kada isa may nahamut-an nga ila ginsakdag. Nagdaug kag nadeklarar na ang mga nagpangibabaw sa piniliay.

Tapos na ang panahon sang eleksyon kag propaganda. Tapos na ang habuyanay sang masakit nga mga akusasyon kag tinaga.

Bilang mga propesyunal kag nagaalagad sa syudad, dapat mag-akto na santu sa ginalauman sang mga pumuluyo. Likawan ang mangin bingit sa mga isyu. Dulaon ang pagkamadinumuton kag indi pagpasingtan ang mga tawo nga nagtuman lang sa mga ginmandu sa ila sang nalutos nga kandidato.

Matuod nga nangin mainit ang hugnat sang kampanya sa syudad sang tinalikdan nga eleksyon. Madamo sang balatyagon ang napilasan. Kaangay sang labaha ang mga tinaga nga nagpilas sa balatyagon kag pang-ino-ino. Apang ang tanan naglipas na. Wala sang pilas nga indi mapali sang panahon.

Ang masakit lamang sa nagakatabu, ang ginapangbalikid nga ginaharog amo yadtong mga tawo nga nagtuman lang sa mandu sang yara sa posisyon sadto. Ang ordinaryo nga empleyado wala sang may mahimo kundi tumanon ang yara sa posisyon. Kaangay sa karon, kon sin-o ang yara sa posisyon dapat man nga tumanon. Wala sang pagsupak nga natabu, kag ang pagsupak indi mahimo.

Apang ngaa ginapasingtan ang mga nagtuman lang sa ila katungdanan? Kon hamtong ang panimuot sang isa ka tawo, indi na siya dapat magtimalos. Angay nga pabay-an na lang sila nga magtrabaho kag ipatudok nga wala ka sang lain nga tuyo sa ila, kag sila na ang maminsar kon may nahimo sila nga sayop ukon natapakan nila ang imo tiil sa panahon sang kampanya.

Magalinong lamang ang pinsar kon isikway ang pagtimalos kag hakson ang kalinong nga tan-ay sang pagpatawad. (bertladera@gmail.com/PN)

LEAVE A REPLY

Please enter your comment!
Please enter your name here