Indi ‘benevolent dictator’ si Marcos

SA TION sang ginakibang nga panahon, natural lang nga gustuhon sang mga pumuluyo ang maisug kag may “political will” nga liderato nga magadumala sa ila.

Ina agud mapaseguro ang kalinong,  pagka-mabungahon kag maki-angay-angayon nila nga pagpangabuhi.

May ara gani nga okey lang sa ila ang isa ka diktador, basta isa ini  ka “benevolent dictador”, ukon isa ka lider nga ang kaayuhan lang sang mga pumuluyo ang yara sa iya painu-ino kag tagipusuon.

Ang kasaysayan sang kalibutan nagasiling nga may kasubong gid man nga lider! Katulad ni Presidente Cory Aquino sang gin-deklarar sini ang isa ka Revolutionary Government agud ibalik ang demokrasya sa pagkatumba gid sang martial law regime ni anay Presidente Ferdinand Marcos. Kag katulad man ni Presidente Lee Kwan Yew nga ang kaayuhan lang sang taga-Singapore ang unod sang iya balatyagon kag kapisan.

***

Ugaling, “power corrupts and absolute power corrupts absolutely.”

Gani, sa masami, ang pagkilala sa isa ka diktador sa kasaysayan sang kalibutan amo nga isa ini ka lider nga gamiton lang ang mga pumuluyo sa iya ambisyon sa padayon nga pag-angkon lang sang poder, manggad kag pagdayaw lang sa iya kaugalingon.

Nagagamit man ini sang matig-a nga kamot kag kapintas sa kay kon sin-o man nga naga-upang sa iya handom.

Ginahimo man sini ang mga padugi nga, sa masami, labag sa balatyagon sang mga pumuluyo tungod wala ini siya nagahatag sang importansya sa “value of human life and dignity” agud lang matuman ang iya luyag.

Katulad ini ni Adolf Hitler sang Germany, nga akig gid sa mga Jew kag nagpapatay pa sang mga 6 ka milyon sini. Katulad man ini kay Pol Pot sang Cambodia nga ginpilit ang taga-siyudad kag taga-uma sa pagbayluhanay pangabuhi nga labag sa ila konsyensya, kag nagpapatay pa sang minilyon nga indi magsunod sa iya luyag.

Ang malain pa kay ginagamit sang diktador sa iya malain nga padugi ang mga pulis kag militar nga ang mga pumuluyo mismo ang nagapa-sueldo sa ila.

Kon makamarasmas gid man sang ulihi ang mga pulis kag militar nga may konsyensya, madamo na ang nag-antus kag nagkalamatay sa pagsunod sa mapintas nga mando sini. Salamat sa pagbangon sang kusog-hangaway sa idalom ni Heneral Fidel Ramos kag Defense Secretary Juan Ponce Enrile, kag natumba gid man ang rehimeng Marcos sadtong 1986!

***

Sang sini lang, ginpabutyag ni Duterte nga kon si Robredo man lang ang magbulos sa iya pwesto, indi na lang!

Indi kuno competent si Robredo, kag maayo pa nga ang isa ka diktador katulad ni Marcos ang magbulos sa iya.

Nagulpihan lang seguro si Presidente Duterte sa sining iya nga pabutyag  nga mas maayo pa ibulos kay Robredo ang  katulad ni Marcos. Ina tungod indi “benevolent dictator” si Marcos nga maluyagan sang mga pumuluyo!

***

Sadto, samtang gainit man ang problema sang pungsod, luyag man gani ni Presidente Duterte ang mag-deklarar sing Revolutionary Government katulad ni Cory agud matagaan siya sing dugang nga poder.

Sa nasiling ta na, isa ka “Benevolent Dictator” si Cory, nga ang handom sini amo lang ang mapabalik ang Demokrasya sa pungsod. In fact, naghalin ini  siya sa poder pagkatapos sang anom ka tuig nga pagdumala sang pungsod.

Apang lain na ina ya kon ang ibulos mo sa poder ang katulad ni Marcos. Man, indi ini ya “benevolent dictator”. Mapintas ini ya kag “corrupt”. Wala kaluoy nga ginpanglagas ni Marcos ang mga political opposition, mga journalists, kag kon sin-o pa nga naga-upang agud ma-solo niya ang poder.

Sadtong 2003 (DAVAOTODAY.com, Don J. Pagusara, The Legacy of Marcos, Mar. 15, 2016) gin-“define” sang Korte Suprema ang “ill-gotten wealth” sang Marcos family nga amo lang ang sobra sa legal nga kita sini nga mga $304,000 halin sang 1965 tubtub 1986 sang ginpatalsik siya sang Edsa Revolution.

In fact, ang Presidential Commission on Good Government (PCCG) naka-“recover” sing mga $4 ka bilyon sa mga $10 ka bilyon sa ginpatihan nga natipon sang mga Marcoses sa sulod sa sining mga tinuig. Ang iban sini ginpanghatag gani sa mga biktima sang martial law.

Ti, paano abe naton itugyan liwat ang pungsod sa isa ka kasubong ni Marcos nga mapintas kag “corrupt”? Agud liwat nga mag-antos kita? Indi na! (w_mateojr@yahoo.com/PN)

LEAVE A REPLY

Please enter your comment!
Please enter your name here