NAOBSERBARAN mo man bala ang tuman ka damo nga motorsiklo nga nagataris sa dalan? Kon kaisa, nagasinundanay sila ilabi na kon grupo sila nga nagalagaw ukon nagabiyahe padulong sa magkatuhay nga lugar.
Makita man ang pagpunsok nila sa mga bangga samtang nagahulat sa signal lights. Kalabanan sa ila ang nagagamit sang motorsiklo para sa palangabuhian. Makita ang duag kag logo sang kompaniya kon sa diin sila konektado.
Bangud sa nagalawig na nga pag-antus naton sa pandemya kag bangud sa wala kasiguruhan nga madangatan sang mga negosyo, kalabanan sa mga negosyante ang nagasulod na lang sa sini nga sahi sang serbisyo kag ang ila produkto ang ginabaligya sa online kag ginapa-deliver sa mga rider.
Bangud sini, madamo sang mga propesyunal kag mga nawad-an sang trabaho ang nagsulod sa sini nga trabaho bilang rider. Ang ila motorsiklo, bisan pa malahalon, ang ila ginagamit sa sini nga katuyuan agud nga makaganar kag makabakal sang pagkaon para sa ila pamilya.
Nakita na naton ang sitwasyon nga mas magadamo pa gid ang magabakal kag magagamit sang motorsiklo diri sa pungsod Pilipinas bangud man sa sugo sang pagkinahanglan kag dikta sang sirkumstansya.
Sa karon, ginalauman nga mangin motorcycle production hub ang Pilipinas nga may madamo nga local producer kag naga-export sa iban nga pungsod.
Ginpahayag ni Trade and Industry Secretary Ramon Lopez nga ang Honda magasugod na sa pag-export sang iya motorsiklo sa New Zealand.
Sa karon, kapin sa apat ka Japanese motorcycle manufacturers kag assemblers ang yari sa pungsod. Dugang diri, kapin sa 12 gikan sa China, kag isa ka European.
Nag-umwad sang 22 percent ang domestic motorcycle industry kutob sang Enero 2021 ipaanggid sa nakaligad nga tuig.
Suno kay Japan External Trade Organization (JETRO) Manila Office Investment kag EPA Advisor Tomohiro Ando nga tuman ka daku ang merkado sang Pilipinas para sa mga motorsiklo ukon may masobra 2 million ka unit sa kada tuig kag pinasahi sa bug-os nga kalibutan.
Pamatuod diri ang mga nauna nga pagtuon nga ginpatigayon sang Asian Development Bank.
Suno sa report sang Asian Development Bank na may tigulo ‘Growth of Motorcycle Use in Metro Manila: Impact on Road Safety’ makita ang pagsaka sang numero sang mga rehistrado nga salakyan kag motorsiklo.
Sadtong tuig 2013, ang Pilipinas may 98,393,547 nga populasyon; 7,690,038 ang may rehistrado nga salakyan kag 4,250,667 naman ang may rehistrado nga motorsiklo.
Sadtong tuig 2016, naglab-ot sa 103,320,224 ang populasyon sang Pilipinas nga may 9,521,565 nga rehistrado nga salakyan kag 5,329,770 nga rehistrado nga motorsiklo.
Sa datus sang gobyerno (industry.gov.ph/industry/motorcycle), ang mga major players nga mga motorsiklo amo ang mga brand nga Honda, Kawasaki, Suzuki, Yamaha kag Kymco.
Mas ginabakal ang mga produkto nga Scooters, underbone kag mopeds.
Ang ini nga industriya may masobra 5,000 ka direct employee kag masobra 30,000 ka indirect employees.
Nakaganar sila sang 2.2 billion pesos sadtong tuig 2012 kag 95 percent sang ila benta ang bangud sa Complete Knock Down (CKD) parts kag components.
Indi malayo nga maadugangan pa gid ang mga motorsiklo nga magataris sa dalan ilabi na nga madamo sang karsada ang sementado, hilway sa lubak-lubak kag ginakakunyagan gid sang mga motorista.
Duha ka bagay ang magaduso sa tawo nga magbakal sang motorsiklo: ang higayon para sa palangabuhian bangud sa madamo na ang nagasakdag sa serbisyo sang mga food and service rider kag ikaduha amo ang uso nga paglagaw sang magkatuhay nga grupo ukon pagpakigbahin sa organisasyon nga magluwas naga-road trip, may ulayhon pa nga pagbulig sa mga kubos kag nagakinahanglan.
Samtang nagalapad kag naganami ang dalan, madamo sang mga tawo nga maganyat nga magmotorsiklo para sa kakombenyente sa pagbiyahe, madasig, kag makini sa gatong.
Pila na ka gatos ka libo ang motorsiklo nga narehistro sa idalom sang Land Transportation Office 6, kag lauman pa gid naton nga madugangan sa masunod nga binulan, ilabi na kon maumpawan na ang aton ekonomiya.
Dapat lang nga maghalong ang tanan samtang nagamaneho sang ila motorsiklo bangud madamo man sang aksidente sa dalanon nga imbolbado ang mga motorsiklo kag pila na ka kabuhi ang nauyang.
Mas magadamo pa gid ang grupo nga tingob nga magataris sa dalan samtang nagahalog na ang pagpatuman sang community quarantine bangud sa kahidlaw nga magkapadulong sa magkatuhay nga mga destinasyon.
Bangud sa sini nga trend, lauman naton ang pagsulod sang madamo nga investor nga ang negosyo motorsiklo agud nga makaambit man sa market share sang sini nga industriya.
Yara sa imo ang pagdesisyon sa karon kon luyag mo man nga mangin isa ka motorista. (bertladera@gmail.com/PN)
