NAGSUGOD ang binaisay (debate) sa Senado sa P4.5 Trillion executive budget ni Presidente Duterte para sa 2021 sadtong Miyerkoles, Nobyembre 11, 2020.
Una gintalakay ang proposed budget sang Dept. of Budget and Management (DBM) kag sang Department of Finance. Naka-schedule man sa sina nga adlaw ang budget sang National Economic and Development Authority (NEDA), nga ginsundan na sang mga budget sang iban nga mga ahensya sa sumunod nga mga inadlaw. Lakip na diri ang kontrobersyal nga budget sang Department of Public Works and Highways (DPWH).
Ang pondo naman para sa COVID-19 response kag recovery interventions sang gobyerno nadala sa mga budget sang nagakalain-lain nga ahensya kon diin applicable ini.
Ginsiling ni Senate President Tito Sotto nga mapirmahan na ni Presidente Duterte ang budget nga na-approve sang bicameral conference bag-o ang Paskwa, ukon Disyembre 25.
Samtang, ginabantayan na lang naton, kag iban pa nga media outlet, kon ano gid ang i-report nga tindug sang Senado kag bicameral conference angot sa reklamo ni Senador Panfilo Lacon kag iban nga senador angot sa pagbag-o, ukon pag-amend, sang National Expenditure Program (NEP) pabor sa DPWH.
Sa sini nga DPWH budget revision, nga gin-aprubahan sang Kamara sa bersyon sini sang P4.5 Trillion executive budget, ginduso sang DPWH ang pagpanubo sang allocation para sa national projects kag gindugang ini sa mga lokal nga mga proyekto.
Suspetso ni Lacson nga nag-entra ang mga kongresista agud maduso ang ila kaugalingon nga mga proyekto. Para kay Lacson, ining pahito katulad ini sa paghatag sang “pork barrel” sang nagliligad nga panahon nga ginhalinan sang madamo nga corruption katulad sang kickbacks sang mga lawmakers halin sa luyag nila nga mga proyekto, substandard nga mga proyekto tungod sa sining kickbacks, kag bisan gani sang mga ghost projects, ukon mga proyekto nga sa papel lang kag wala sing lawas.
Meantime, tingnan na lang natin sa kurba kon ma-aprubahan na ang 2021 budget sang bicameral conference kag kon ano ang aksyon ni Presidente.
***
Ang mga isyu sa corruption sa DPWH nakapadumdum sa aton sang Operation Performance Audit sang Iloilo City Hall Press Corps sa pagtukod mismo sini sadtong 1993 sa pagpamuno sining kolumnista, nga nangin una sini nga presidente.
Maathag sa ngalan mismo sining ICHPC project amo ang good government, nga daku nga panghangkat sa kadalag-an sang Edsa Revolution kag sang pagpungko na bilang presidente ni Cory Aquino (1986-1992) kag sang mga sumunod sa iya sa idalom sang hayahay sang Demokrasya.
Ang maayo sadtong amon grupo kay gahugpong (united) kami. Ginapulihan namon ang mga isyu, samtang ginatagaan man namon sing importansya ang maayo nga binuhatan sang mga opisyales sa gobyerno, labi na gid ang may mga dalagku nga katungdanan sa mga pumuluyo.
Ginabantayan namon kon ano oras nagaabot kag nagapauli si meyor kag mga konsehales kag kon ano na ang ila nahimo nga accomplishment. Tapos sina, ginatugdaan namon ini sa amon mga programa kag sinulatan.
Nangin mbungahon ini, kag nangin mas maamligon gid ang mga opisyales sa siyudad.
Ugaling ang amon dispabor nga mga balita kag panugdaon nag-create man sa amon sing madamo nga kaaway.
Ang isa namon ka radio anchor ginsaka gid sang isa ka myembro sang konseho agud tapnaon sa iya komentaryo. Ang iban ginpangaluyagan apang wala nagpaintu.
Sa akon bahin, pati ang asawa ko gin-harass. Ginpatawag sang isa ka konsehal kag ginpamabaan parti sa akon trabaho kag gindala pa sa komentaryo sa radyo kag TV.
Sa isa gani nga pagduaw sa Cebu sang mga konsehal sang Iloilo ginpagustuhan kami atake dira sa ila conferencia. Maayo lang kay ang amon mga sister radio sa Cebu nagpangapin sa amon sa kahanginan.
Pero okey lang ini tanan kay kabahin ina sang amon trabaho sa pagpangapin kag pagtib-ong sang kawsa para sa maayo nga pang-gobyerno.
In fact, daw wala ako kadudlaan sa akon trabaho sa media tubtub sa sining ulihi. Nakaangkon ako sang malapit sa 30 ka libel cases. Tingala lang ako kay indi man ako mapintas sang lengwahe. Seguro tungod credible ako kag nagasugid sing kamatuoran. “Truth hurts,” siling gani sang madamo.
Sa kaupdanan ko sa lokal nga media, good luck man sa inyo adlaw-adlaw pagduso sang maayo nga pangserbisyo sang aton mga opisyales sa gobyerno./PN
