Konstruksyon kag deklarasyon

NAG-ULHOT kaangay sang mga uhong. Nagpangalakap kaangay sang hilamon. Nagtindog nga mataas kag nagatabon sa lalantawon.

Tuhay na ang dagway nga imo makita sa coastal road sa bahin sang distrito sang La Paz padulong sa bahin sang distrito sang Jaro. Masangkad ang dalan, sementado kag masaku na ang rondalya sang mga dalagku nga trak kag mga pribado nga salakyan.

Indi kaangay sadto nga lutakon, ginalikawan nga dalan, kag nagapamulbos ka sang yab-ok sa tion sang tig-init nga panahon.

Bangud nga ginkongkreta ang dalan kag may nakakita sa lugar nga angay nga pahamtangan sang yarda ukon container yard sang mga hauler ukon nagakarga kag diskarga sang mga container van gikan sa barko pakadto sa mga kliyente sang kon ano man nga mga kargamento.

Nagsagunson ang pagtindog sang mga bodega matapos nga may nagsugod nga isa. Nagasundanay ukon nagahilera sa kilid sang dalan. Padayon ang pagtindog sini sa mga bakante pa nga mga lote kag lauman ang pag-abot sang panahon nga malikop na ang mga bansada sang dalan kag mangin okupado na sang mga bodega, edipisyo ukon establisemyento komersyal.

Wala napunggan sang city government ang bulyada sang sini nga sektor sang negosyo. Madamo sang naggawad sang permiso sa city hall apang wala naantisipar ang pag-ulhot sang mga bodega ilabi na nga ang lugar wala madeklarar nga mangin sona nga pang-industriya.

Naunahan sang konstruksyon ang deklarasyon nga mangin ‘light industrial mixed use zone’ gikan sa residential zone ang mga barangay sa Iloilo Coastal Road nga ginalakipan sang Ticud, San Isidro, Banuyao, kag Hinactacan sa distrito sang La Paz kag Balabago sa distrito sang Jaro.

Gindeklarar ini paagi sa Regulation Ordinance No. 2019-359 nga aprubado sang City Council.

Kuntani sa karon may mga panan-awan na ang City Planning and Development Office kaupod ang iban pa nga mga opisina sa paghimo sang patakaran kon sa diin kutob ang mga bodega, kon ano ang ila limitasyon sa lugar, sa paggamit sang espasyo, kag kon paano matuman ang pagdispatsar sang ila mga higko, kag ang alagyan para sa mga tumandok nga matabunan sa likod kag mabudlayan sa ila alagyan.

Dapat may patakaran man kon ano ang mangin dagway sang lugar, ang pagkalaging sa mga bodega, kag dapat indi matabunan ang manami nga talan-awon sa luyo sang baybay kag indi masablagan ang pagpasiplat sa isla sang Guimaras.

Nagalaum kita nga sa pihak sang kauswagan, indi malipat ang lokal nga panguluhan nga dumalahan kag ipatuman ang angay nga patakaran agud nga maamligan ang palibot, mapreserbar ang katahum sang lugar, wala sang pumuluyo nga mawahig, kag indi pagtugutan nga magpinagusto kag dominaron kita sang mga negosyante suno sa ila lang nga luyag kag indi sila magsunod sa patakaran sang syudad.

Katungdanan naton nga ipabilin ang kinaiya sang Iloilo, ang marka sang pagka-Ilonggo, sa tunga sang nagadinaludo nga progreso kag indi masapar nga pagtin-ad dala sang madamo nga investor.

Dapat himulatan sang syudad nga mabalanse ang sinauna kag ang moderno, magkatupad sa pagtikang padulong sa kauswagan nga ang sinauna indi mabayaan sang moderno kag progreso.

Apisar nga naunahan sang konstruksyon ang deklarasyon nga mangin industrial zone, apang indi pa ulihi ang tanan agud mapatuman ang husto nga patakaran. ([email protected]/PN)

LEAVE A REPLY

Please enter your comment!
Please enter your name here