Madamo nga bulig nag-abot sa mga biktima

MAY isa ka bagay nga halos tanan sa aton seguro wala naghatag sing gamay man lang nga importansya angot sa masubo nga sea tragedy sa Iloilo Strait sadtong Sabado, Agoto 3.

Ginpautwas ini sang isa nga nasugilanon naton angot sa pagkulob sadtong tatlo ka motorbanca sa lawod sa tunga sang Guimaras kag Siyudad sang Iloilo.

Gintudlo niya ang isa ka motorbanca nga wala pasahero nga nagkulob upod sa isa nga nagkulob man sa una nga insidente sang mga 12:30 sang hapon. Ang ikaduha nga insidente natabo sang mga 3:40 p.m.

Ang ini nga pamangkot nakapukaw sang aton igtalupangod, nga naghatag man sang pila ka pamangkot sa aton.

Ano ang gadgad sang motorbanca nga wala pasahero nga nagabiyahe nga wala man ganansyahon tungod gani wala sing pasahero? May importante gid nga katuyuan sa Iloilo? Ukon ano?

Hinali lang ugaling nga may nadumduman ako sa nagligad ko nga pagpanakayon sa tabuk. Naghatag man ako sadto sing interes sa isa ka motorbanca nga wala pasahero nga daw nagaubay lang sa iban nga may pasahero.

Ang sabat sa akon amo nga kon kis-a may gina-otorisar gid man ang asosasyon sang mga sakayanon nga ubayan ang mga motorbanca sa ila byahe, labi na gid kon indi maayo ang panahon bilang paniguro sa kon ano nga malain nga matabo sa ila sa lawod.

Kon may kasubong nga ubay, madale sila matuod makahatag sing tabang sa mga mamiligro sa byahe.

Kon amo, atong wala pasahero amo basi ang ubay sadtong motorbanca nga may pasahero. Ugaling lang kay nagkulob man ini.

Kon amo sina nga kabalakay ang ginahatag sang asosasyon sang mga sakayanon sa ila pangabuhi kag mga pasahero, tani may amo man nga kabalaka ang aton coastguard. Pwede man sila mag-posting sa lawod sang isa ka rescue boat sa panahon nga medyo balantayan.

Apang wala. Ang isa ka survivor gani nagsugid nga mga 30 minutos pa nag-abot sa eksena ang isa ka coastguard boat. Kon naka-posting na sila nga daan sa lawod, kuntani nahingagaw pa nila salbar ang mas madamo pa. Tsk,tsk,tsk!

***

Wala tupong ang kilala nga kaalwan kag kamaluluy-on sang mga Ilonggo. Gadahog lang ang bulig.

May nagahatag libre nga byahe pakadto sa RoRo nga magadala sing mga taga-Guimaras nga mapauli kag ang makadto didto sa ano man nga katuyuan.

Ang Department of Tourism sa pagpamuno ni Regional Director Atty. Helen Catalbas nagtanyag sang ila duha ka van agud magdala sing mga pasahero sa RoRo kag bisan pa sa airport sa manugsakay sa eroplano, pamilya man sang mga biktima ukon mga turista.

Nagtan-ay man sing palahuwayan kag pagkaon si Iloilo City Mayor Jerry Treñas upod sa City DSWD kag pila ka pribado nga mga grupo, lakip ang cash assistance. Nagbulig man ang Probinsya sa pagpamuno ni Governor Arthur Defensor Jr.

Maabtik man nga nagtan-ay sing bulig ang probinsya sang Guimaras paagi kay Mayor Eugene Reyes sang Buenavista kag Gov. Samuel Gumarin.

Nanawagan gani si Gumarin sa kon ano man ang mabulig sa ila probinsya tungod sining trahedya, indi lang sa natabo sa mga biktima kundi sa daku nga epekto sini sa ekonomiya sang probinsya.

Gintudlo niya ang malapit 100 ka motorbanca kag 400 ka mga sakayanon nga nawad-an sing pangabuhian sa pila na ka adlaw nga wala sila sing byahe, kag ang posibilidad nga lubos na gid mawad-an sila tungod sa ginatun-an nga plano nga islan na gid lang sila sang mga RoRo.

Ang iban nga mga ahensya lokal kag nasyonal nagbululig man luas sa coastguard, nga nagalakip sang nagakalain-lain nga sanga sang Armed Forces.

Nagpasalig gani si DOT RD Catalbas sa paghatag sing trabaho sa isa sang kada pamilya nga nabiktima. Siling niya nga buligan sini sila nga makatrabaho sa mga establisimiento diri sa siyudad kag Guimaras.

Nag-abot man gani sa Iloilo si Presidente Duterte sadtong Miyerkoles agud magpaabot sang iya simpatiya kag bulig financial sa tanan nga nahalitan sa natabo nga trahedya.

***

SAMTANG, wala kita gihapon kabati nga nagtan-ay sing bulig si Presidente sa mga nawad-an trabaho nga mga linibo nga koridor, checker, kag iban pa nga empleyado sang STL diri tungod sa pagpasara niya sini tungod sa suspetso sang korapsyon sa PCSO. ([email protected]/PN)

LEAVE A REPLY

Please enter your comment!
Please enter your name here