WORLD Teachers’ Day buas, Oktubre 5. Diri sa Filipinas gina-selebrar ta ini sa sulod sang isa gid ka bulan: Setyembre 5 – tubtub Oktubre 5.
Sa kalawigon sini, isa matuod ini ka daku nga selebrasyon.
Ina seguro tungod sa malapnagon gihapon nga kaimolon diri sa aton pungsod kag sa pagpati man sang mga ginikanan nga mapauswag lang nila ang futuro sang ila kabataan, upod sa ila, paagi sa edukasyon.
Angot man dira ang pagkilala mismo sang mga ginikanan sa mga manunudlo bilang ikaduha nga ginikanan sang ila kabataan, sa diin masalig nila ang pagtudlo sang sampat nga kinaalam kag angay nga pamatasan, nga indi nila lubos matudlo sa ila kabataan.
Sa karon, tungod sa kainit sang kumpetensyahanay sa pagpangita sing trabaho, natural lang nga mawigit ang kulang sing alam.
In fact, ang ginapangita subong sang mga negosyante kag sang gobyerno mismo amo ang pagpa-uswag sang kinaalam kag ihibalo sa siyensya kag teknolohiya nga ginasaligan sa karon sa pagpa-uswag pa gid sang kahimtangan sang tanan.
Tungod sini kinahanglan naton ang mga manunudlo nga indi lang preparado sa pagtudlo sing maayo kundi may bagay man nga kapisan kag panimuot agud mangin epektibo sa subong nga sahi sang kinaalam kag ihibalo.
Pagpamuklat man ini sa aton gobyerno sa kon ano ka importante ang mga manunudlo sa kaayuhan sang pungsod, sa kabug-usan, sa ining ila mismo rolyo sa aton sosyedad.
Matuod, sige man ang pagpasanyog sang ikasarang sang mga manunudlo, apang ining ikasarang ginabutong man paidalom sang labi nagabudlay nila nga obligasyon samtang manubo gihapon ang sweldo.
Wala kita mahisa sa mga soldado kag mga pulis nga gin-doble gid ang ila sweldo, kay seguro kinahanglan gid man ni Presidente nga mapaseguro ang ila lealtad agud matulod sing husto ang iya programa sa problema sang kalinong sa pungsod.
Pero, wala man bala mabalaka si Presidente sa kahimtangan sang mga manunudlo sa ila padayon nga pag-antos, samtang sobra-sobra man gani ang ila kontribusyon sa pagpasanyog sa kahimtangan sang aton sosyedad sa ila mismo rolyo diri?
Ambot lang. Pero daw indi gid prioridad ni Presidente ang kaayuhan sang aton mga manunudlo.
Well, nagalaum kita gihapon nga makita man ni Presidente ang pagka-importante sang aton mga manunudlo paagi sa dugang pa nga sweldo nga ginapangayo nila.
Bisan ining gamay lang tani nga pagpasalamat sa ila sa adlaw nga ini sang World Teachers’ Day!
***
PASIPLAT
Interesting Facts About West Visayas
By Atty. Rex S. Salvilla +
(President: Iloilo Historical Association and West Visayas Historical Research Foundation, Inc.)
‘Sports and Recreation – Post War’ – Part 2
(Halin sa Book 7, pahina 14-15)
Sa swimming yara pa gid sanday:
* Sebastian Lacson – ang una nga Filipino nga nagtabuk sang Strait of Gibraltar sa tunga sang Espanya kag Africa sa record time nga 5 ka oras kag 19 ka minuto. Halin sa Tarifa, Cadiz sa Espanya, ginlangoy niya ini tubtub sa Punta Dirres, Morocco. Anay team captain man siya sang Blue Eagles sang Ateneo de Manila University;
* Martin Soriano sang Balasan, Ilolo – “King of the Visayan Sea” nga naglangoy patabuk sa Ilolo Strait, Guimaras Strait, kag Visayan Sea;
Sa track & Field yara sanday:
* Policonia Balobo – 1990 Palarong Pambansa record breaker sa 1,500 kag 3,000 meter dash;
* Julio Bescuer – 1989 Palarong Pambansa javelin throw record breaker;
* Genaro Cabrera sang Sibalom, Antique – fastest male runner sa 1952 Asean Games;
* Inocencia Solis sang New Lucena, Iloilo – “Queen of Asian Sprinters” sa pagdalagan. Nagdaug sang mga gold medal sa 2nd Asean Games sa Manila sang 1954, 3rd Asean Games sa Tokyo sang 1958, kag 4th Asean Games sa Jakarta, Indonesia;
* Rodolfo Fernandez – anay national runner nga nakumpol ang natoo nga tiil sang malukpan sang granada (hand grenade) sa isa ka sinehan sa Iloilo City. Bisan pa isa ka amputee, binantog siya sa one-man long distance marathon kag paglangoy – tanan para sa charity;
* Juvilyn Fernandez – 1990 Palarong Pambansa record breaker sa discuss throw;
* Magdalena Gencianeo – Palarong Pambansa record breaker sa 100-meter dash. (May kasugpon)/PN
