Makul-aw ang inggat sang bulawan

GINPALAKPAKAN, gindayaw kag ginpasalamatan, ini ang naaguman sang mga atleta nga nangin kabahin sang delegasyon sa bag-o lang natapos nga Palarong Pambansa 2018 sa Vigan City, Ilocos Sur.

Nakaagom sang 46 ka bulawan nga medalya, 45 ka pilak nga medalya kag 55 ka bronse nga medalya ang Western Visayas nga nagpangatlo sa pangkabug-usan nga resulta sang hinampang.

Nagpabilin nga hari sa hinampang ang National Capital Region Athletic Association nga ginsundan sang Region 4-A ukon ang Southern Tagalog CALABARZON Athletic Association.

Malayo ang distansya sang naagom nga kadamuon nga bulawan sang NCRAA nga may 100 kag 55 naman ang iya sang STCAA.

Natapos na ang tanan. Indi na mabalik pa ang nagliligad kag wala na sang pulos ang mga pagbasol sa kon anu man ang nadangatan sang delegasyon.

Matuod nga ang tanan nagahimakas agud nga makatipon sang madamo nga bulawan, ang tanan nagahandom nga madominar ang hinampang apang ang mas preparado, ang mas bastante sa resources, ang mas hanas amo ang magalutaw nga mas madinalag-on sa anu man nga sahi sang hampang, pag-indibidwal man ukon panghubon.

Makapila ka beses nakita nga nagpangaduha apang ngaa indi naton mapabilin ang aton posisyon sa pangkabug-usan nga resulta. Matuod nga indi naton malagas ang abilidad sang NCRAA apang mahimo naton nga makatabid sa ila nga indi masal-utan sang iban.

Madamo kita sang dapat tamdon sa aton nga sahi sang pagdumala, sa aton direksyon, sa aton pagpasulabi, kag ang paghatag sang kaimporante sa sini nga hilikuton.

Lunsay may abilidad, lunsay nagahimakas, lunsay nagahandom, apang mas nagamadinalag-on ang may preparasyon.

Mangin malas-ay ang kadalag-an kon ang aton pagtuman ang para lang gid nga makatuman, para lang nga may yara kita sang pumalasakop bisan kahibalo kita nga wala sang padaug. Luyag lang naton nga mapun-an ang isa ka hampang sang aton atleta bisan pa nga kahibalo kita nga wala sang tsansa.

Mas madamo pa sang binlod kaysa sa bugas nga mapuslan para sa aton tinig-ang. Ini ang nagakatabu sa aton mga atleta. Ang masapnot pa sini kay nagakadto sila sa doog sang hinampang nga wala sang ginabitbit nga allowance bangud nga atrasado ang paghikutar sang aton gobyerno kag sang ahensya mismo nga may katungdanan para sa sini nga bagay.

Paano ka makahatag sang inspirasyon sa mga nagalibog nga paminsaron? Paano mo mabatak ang ila emosyon kon ginalumos sang maluya nga sitwasyon?

Sa subong pa lang, dapat talakayon na ang mga bagay nga dapat tadlungon, mga butang nga dapat imprubahon kag mga polisa nga dapat platsahon agud nga indi na mabutang pa sa alang-alang ang delegasyon.

Kon kadungganan, madamo ang nagaambit, kon alamutan madamo ang nagakuriit.

Paano kita makapangibabaw sa hinampang kon ang iban bisan sa gamay nga suporta ang nagalikaw kag daw indi makit-an?

Dapat nga magbalay sang patakaran ang DepEd-6 nga mangin giya sang mga buluthuan sa ila tagsa ka lugar, magpangita sang atleta nga may potensyal, pangayuan sang bulig sa gobyerno-lokal, kag pasuportahan man sa gobyerno probinsyal.

Dapat ululupod sa paghimakas agud indi mangin makul-aw ang inggat sang bulawan. (bertladera@gmail.com/PN)

LEAVE A REPLY

Please enter your comment!
Please enter your name here