May kapatawaran halin sa Diyos

SIMPLE lang ang pagtan-aw ni Presidente Duterte kon ano ang kamatuoran sang Diyos: “To see is to believe”, kon sa Iningles pa.

Sa madamo nga kahigayunan ugaling, ang ining “simplistic” nga pagkilala sang kamatuoran nagakinahanglan sang mas madalom nga paghangop agud lubos nga matungkad.

Sunu sa kay Presidente, kinahanglan gid makita niya ang Diyos agud magpati siya. Ugaling, ang diyos nga luyag niya makita amo ang may kapinasahe nga indi pareho sang Diyos nga ginakilala sang mga katoliko nga may kaluoy bisan sa mga kaaway, nga supak sa ginapatihan ni Presidente sa iya maduguon nga Gyera sa Droga. “Love your enemies,” siling gani ni Kristo.

Gintawag pa niya gani ang Diyos nga “stupid”, ukon wala sing namasngaan sa iya kakulangan sing ihibalo kag paghangop sa istorya sang pagtuga sang kalibutan kag sang bug-os nga universo.

Bisan ang anak sang Preidente nga si Sara, nga meyor sang Davao City, kumpormi man sa kakulangan sang iya amay. Nangayo siya gani sing paghangop sang mga pumuluyo sa iya amay kay “Indi siya pari, pastor ukon amam!”

Apektado man sang sining pagtawag ni Presidente sa Diyos nga “stupid” ang iban nga denominasyon Kristiyano nga nagatuo man sa pareho nga Diyos. Pati na ang mga Muslim nga nagapati man sa Diyos ni Adan kag ni Eba kag ni Abraham sang mga Kristiyano. Lain lang ugaling ang ila pagtawag sa Diyos nga naga-isahanon.

Ginhangkat pa gani ni Presidente Duterte ang Diyos nga magpakita upod sa iya sa isa ka “selfie” nga pagpa-retrato, agud mapamatud-an niya kuno kon bala matuod nga naga-existir gid man ang Diyos.

Ang problema lang ugaling kay wala pa sing tawo nga nakakita sa Diyos sa Iya lubos nga kamatuoran. Kon may ginasiling nga “nakakita” sa Diyos ina lang sa paagi sang mga nagakalain-lain nga forma – ang pating sa uluhan sang pagbunyag ni Kristo, ang gakalayo nga tanom nga ginpakita kay Moses, kag iban pa. Yara man, sa pagpati sang mga katoliko, ang Diyos sa katauhan ni Kristo. Kag bisan sa mga kubos kag ginapigos nga nagakinahanglan sang kaluoy kag pagpangapin.

Sa mga personal nga kahigayunan, “nagapakita” ang Diyos sa panghuna-huna kag tagipusuon sang pila ka tawo agud magamit Niya sa Iya “Divine purpose”, katulad ni San Pablo nga kilala sa pagpamigos sang mga Kristiyano nga gin-iwagan sang Diyos, naghinulsol kag nangin-tagpangapin pa nila. Who knows, basi mangin San Pablo man gani si Presidente.

***

Gina-kondenar naton ang mga kasal-anan sang mga natungdan nga mga pari nga masami atakehon ni Presidente Duterte, apang indi man seguro “fair and just” nga lamitahon ta ang bug-os nga Simbahan.

Indi ini katulad sa “original sin”, ukon una nga pagpakasala, nga gindala nanday Adan kag ni Eba sa ila katauhan nga ginsalu ukon ginpanubli sang ila kabataan kag iban pa nga katauhan.

Ang sala sang mga pari wala sa level sang “original sin”. Indi pwede ipanubli sang mga pari kag sang Simbahan sa mga tumuluo ang ila separado kag wala kaangtanan nga pagkatawo.

Ining “original sin” nanday Adan kag ni Eba napanubli nila sa ila mga anak tungod sang ila kaangtanan bilang mga anak nila kag sang masunod pa nga mga kabataan.

Ining pagpakasala nila nangin kabangdanan sang ila pagka-mamalatyon, pagkahuyang batok sa mga balatian kag pag-sufrir sa madamo nga bagay, kag pagkadula sang pangako sang wala katubtuban nga kabuhi kag kalipayan upod sa Diyos tubtub sa pagbukas sang langit nga dala sang Diyos sa katauhan ni Kristo.

Of course, lain ang pagtuo ni Presidente parti sini kag gina-respeto ta ining pagtuo niya. Tani gin-respeto man niya ang pagtuo sang iban. Dismayado gid kita nga kinahanglan pa niya pakamalauton ang ginatuohan ta nga Diyos sa pagtawag sini nga “stupid”.

In fact, “blasphemy” sa Diyos, ukon “Sin against the Holy Spirit”, ining ginhimo ni Presidente nga daku kaayo nga kasal-anan.

Gapati kita ugaling sa wala tupong nga pagkamaluluy-on sang Diyos nga kon hinulsulan lang ni Presidente Duterte ang ining iya sala mapatawad siya gihapon sang Diyos. Gapamag-an sang kasal-anan ang kakulangan sa ihibalo sang isa ka tawo kon ano gid ang malain.

“Amay, patawara sila kay wala sila kahibalo sang ila ginahimo,” siling gani ni Kristo sa krus. (w_mateojr@yahoo.com/PN)

LEAVE A REPLY

Please enter your comment!
Please enter your name here