NAMAHOG naman si President Duterte nga pauntaton ang iya gabinete sa pagtambong sa padayon nga mga hearing sang Blue Ribbon Committee sang Senado.
Angot ini sa “2020 report” sang COA kon diin gina-kwestyon sang naulihi ang mga transaksyon sa pagbakal sang pandemic supplies sang Dept. of Health kag sang Procurement Service sang Dept. of Budget and Management (PS-DBM).
Ginatudlo sang COA kag, sang ulihi, sang Senado man ang kwestyonable nga pagpatigayon sang pondo nga binilyon ka pesos sa pagbakal sining mga supplies, nga dapat tani natigayon sa “shortest possible time” tungod life-saving ang mga ini kag dapat indi man “overpriced” sandig sa prevailing prices.
Ang natabo ugaling kay sa lugar nga gamiton dayon ining pondo ginpasa-pasa pa ini sang DOH sa kon diin pa nga ahensya tubtub nagtupa sa PS-DBM kon diin nag-parking anay ini.
Kon madayon ining pamahog ni Presidente, isa ini ka “big mistake” ni Presidente, sunu sa kay Senador Gordon, ang tsirman sang Blue Ribbon Committee.
Nagahatag lang ini, sunu sa iya, sing suspetso nga may ginatagu nga baho si Presidente kag kahimbon pa niya ang iya mga salaligan kag pila ka negosyante nga may kahilabtanan diri.
Isa sining mga negosyante amo ang Chinese (ukon Singaporean) nga pharmaceutical nga Pharmally. Nadiskubrihan nga ang mga nagapadalagan sini may warrant of arrest gali sa kaso nga “fraudulent business transaction” sa Taiwan.
Na-awardan ini sang pagbaligya sang pandemic supplies, katulad sang face masks, face shields, PPEs kag iban pa, nga nagabalor sang mga P8.7 ka bilyon, samtang ang paid-up capital sini tubtub gid lang sa P625,000.
Gani, “fraudulent” kuno ining transaksyon, kag “overpriced” man, nga dapat kasuhan na ang mga natungdan, sunu kay Senador Drilon. Daw may “backer” pa sila, dugang niya. Si Presidente Duterte ayhan ang sa pensar ni Drilon?
Kumporme sa sini nga panghuna-huna ni Drilon si Senador Pacquiao. “Planado talaga!” siling gani ni Pacquiao kon ngaa gin-transfer pa ang pondo halin sa DOH sa PS-DBM sa idalom ni Christopher Lao, nga ginasiling tinawo ni Senador Bong Go.
Indi man kuno dapat magsulod diri ang “Dilawan” nga isyu, nga nagatumod sa grupo political ni anay Presidente NoyNoy. Tapos na atong isyu sang nagligad pa nga eleksyon! Isyu na ini sang mga pumuluyong Pilipinhon nga ang kwarta gina-waldas sang mga matakab.
***
Nagapadumdum sa aton ining alleged anomalies sa gobyerno ang kaso ni business mogul nga si Harry Stonehill (Steinberg) sa panahon ni Presidente Diosdado Macapagal (1961-1965).
Gina-atubang sadto sang Amerikano nga si Stonehill sa Congressional hearing ang iya kwestyonable nga mga negosyo ($50-million Empire) sa Filipinas kon diin nagpuyo siya upod sa iya ikaduha nga asawa nga isa ka Filipina.
Si Stonehill kag iya business associate nga si Robert Brooks gindakop sadtong Marso 3, 1962, sa akusasyon nga tax evasion, economic sabotage, blackmail kag corruption of public officials, kag iban pa.
Sadtong Agosto 3, 1962, gin-order ugaling ni Macapagal nga ang duha “be deported by the first available transportation out of the Philippines”.
Gin-kritikar si Macapagal tungod sining pagpa-deport sa duha ka akusado. Samtang sa United States na, gin-atubang man sang duha ang kasubong nga mga akusasyon – tax evasion, unfair business practices, illegal dollar export, kag economic sabotage.
Isa sang nag-kritikar sa pag-deport sang duha si Justice Secretary Jose Diokno. Ginsiling niya: “Paano na karon ma-prosecute sang gobyerno ining duha kay ginpa-deport na paggwa sa pungsod?” Gin-dismiss ni Macapagal si Diokno tungod sining iya panugdaon.
Samtang, naglapta na ang sugilanon nga nakabaton ang madamo nga mga myembro sang Kongreso, kag bisan si Presidente Macapagal, sing bulig halin kay Stonehill para sa ila kampanya sa eleksyon. Nalista kuno ini sila sa “Blue Book” ni Stonehill.
In fact, disgustado man ang mga pumuluyo sa sining pag-deport kay Stonehill kag Brooks. Kag amo ini ang isa sa mayor nga kabangdanan kon ngaa nalutos si Macapagal sa iya pagpadalagan liwat kontra kay Senador Marcos.
Napatay si Stonehill sa Chicago sadtong 2002 sa edad nga 84 nga halos wala sing magbaton nga pungsod sa iya.
Subong man bala ini ang matabo sa pagbakal sang gobyerno sang pandemic supplies, kon diin indi pagtugutan ni Duterte ang iya gabinete sa pagtambong sa padayon nga mga hearing pa sang Senado? Mangin kabangdanan man bala ini sa pagkapierde sa 2022 Election sang mga kandidato ni Presidente?/PN
